Gerum okkar ýtrasta
1 Þegar við vígðum okkur Jehóva hétum við því að gefa honum það allra besta sem við eigum. Það er því vel við hæfi að Pétur postuli skuli hafa hvatt kristna menn á fyrstu öld til að kosta kapps um að gera stöðu sína frammi fyrir Jehóva vissa. (2. Pét. 1:10) Við viljum vissulega gera okkar ýtrasta til að geðjast Jehóva í þjónustunni við hann nú á tímum. Hvað leiðir það af sér? Þegar samband okkar við Jehóva verður æ innilegra og við ígrundum allt það sem hann hefur gert fyrir okkur, knýr hjartað okkur til að gera alltaf það besta sem við getum í þjónustu hans. Við viljum efla boðunarstarfið að gæðum og, hvenær sem því verður við komið, að magni líka. — Sálm. 34:9; 2. Tím. 2:15.
2 Ungur bróðir, sem vildi gera meira í boðunarstarfinu, komst að raun um að reglulegt nám í orði Guðs lét hann meta Jehóva enn meir að verðleikum og glæddi með honum aukna kostgæfni. Það fékk hann til að sækja um brautryðjandastarfið. Systir, sem átti erfitt með að tala við ókunnuga, æfði sig í að nota nokkur kynningarorðanna í Rökræðubókinni og var fljótlega farin að ná meiri árangri í boðunarstarfinu. Hún gat stýrt biblíunámskeiði með hjónum sem tóku við sannleikanum.
3 Gleðstu yfir því sem þú getur gert: Sum okkar mega þola erfiðar aðstæður, eins og lélega heilsu, andspyrnu innan fjölskyldunnar, fátækt eða daufar undirtektir fólks á starfssvæði okkar. Mörg önnur vandamál, sem algeng eru á þessum síðustu dögum, kunna að hamla þjónustu okkar. (Lúk. 21:34; 2. Tím. 3:1) Þýðir það að við höfum ekki staðið við vígsluheit okkar til Jehóva? Nei, ekki ef við þjónum honum eins vel og aðstæður okkar leyfa.
4 Það er ekki skynsamlegt að dæma sjálfan sig út frá því sem aðrir geta afkastað. Öllu heldur hvetur Ritningin hvern og einn til að ‚rannsaka breytni sjálfs sín.‘ Ef við leggjum fram krafta okkar í þeim mæli sem við höfum tök á gleður það Jehóva og gefur okkur „hrósunarefni.“ — Gal. 6:4; Kól. 3:23, 24.
5 Megum við taka til okkar orð Péturs um að ‚kappkosta að reynast að lokum flekklaus og lýtalaus frammi fyrir Guði í friði.‘ (2. Pét. 3:14) Það viðhorf mun veita okkur öryggistilfinningu og færa okkur þann hugarfrið sem aðeins Jehóva getur veitt. — Sálm. 4:9.