„Munu allir menn nokkurn tíma elska hver annan?“

¹ Fallegur, áhrifamikill og uppörvandi boðskapur verður kunngerður um allan heim á 169 tungumálum. Hvaða boðskapur er það? Og hvernig verður honum komið á framfæri?

² Boðskapurinn er um náungakærleika. Hann er að finna í Fréttum um Guðsríki nr. 35 sem bera titilinn „Munu allir menn nokkurn tíma elska hver annan?“ Þessar Fréttir um Guðsríki kanna stuttlega núverandi ástand mála um alla jörð og sýna fram á að kærleiksskorturinn meðal manna sé meginástæða þess hve mikið sé um hugarangur og kvöl. Þær sýna hvers vegna náungakærleikur hafi, einkum á okkar dögum, kólnað og hvað það þýðir fyrir framtíðina.

³ Jafnframt sýna Fréttir um Guðsríki nr. 35 að sannan náungakærleika er að finna meðal milljóna manna sem núna búa í þessum heimi. Þær auðkenna þá sem taka þátt í að endurvekja frumkristnina — fyrstu aldar tilbeiðsluna sem einkenndist af þeim náungakærleika sem Jesús Kristur kenndi. — Lúk. 10:25-37.

⁴ Fréttum um Guðsríki nr. 35 lýkur með útskýringu á því hvernig allur mannheimurinn mun innan tíðar iðka náungakærleika undir stjórn Guðsríkis í höndum Krists. Lesendur þessa boðskapar eru hvattir til að verða sér úti um bæklinginn Hvers krefst Guð af okkur? og læra hvernig verða megi hluti af þessari kærleiksríku tilhögun sem nær um allan heim og lýst er nákvæmlega í Biblíunni.

⁵ Hverjir munu færa fólki þennan boðskap? Vottar Jehóva um heim allan munu deila þessum boðskap um náungakærleika með kunningjum sínum, nágrönnum og ættingjum í október- og nóvembermánuði. Allir sem til þess eru hæfir eru hvattir til að taka þátt í að dreifa Fréttum um Guðsríki nr. 35 út til manna.

⁶ Endanlegt markmið þessarar herferðar er að örva áhuga fólks á að nema Biblíuna, annaðhvort með hjálp Kröfubæklingsins eða Þekkingarbókarinnar. Heilshugar þátttaka hvers og eins af þjónum Jehóva mun þar fyrir utan verða til stórkostlegs vitnisburðar um Guð kærleikans, Jehóva, og son hans, Jesú Krist.