Við boðum fagnaðarerindi
1 Það eru stórkostleg sérréttindi að vera boðberar ‚fagnaðarboðanna góðu.‘ (Rómv. 10:15) Við höfum hressandi boðskap að færa fólki sem býr við ringulreið og örvæntingu. Hvernig getum við sýnt því fram á að við flytjum ‚fagnaðartíðindi‘? — Jes. 52:7, Biblían 1859.
2 Undirbúðu jákvæða kynningu: Samtöl okkar við fólk í boðunarstarfinu verða uppbyggjandi ef við einbeitum okkur að hinu góða. Þegar við erum að undirbúa kynningu með því að skoða ritið, sem við ætlum að bjóða, þurfum við að leggja áherslu á jákvæða þætti boðskaparins. Við getum búist við góðum árangri ef við komum biblíulegri von okkar á framfæri með sannfæringu og eldmóði. — Orðskv. 25:11.
3 Þótt við finnum til með fólki er það lýsir raunum sínum í versnandi heimi ættum við að benda því á raunverulegu lausnina á vandamálum manna, ríki Guðs. Jafnvel þegar við ræðum um komandi „hefndardag“ Jehóva viljum við leiða fólki fyrir sjónir að þetta er í reynd ‚gleðilegur boðskapur fyrir nauðstadda.‘ (Jes. 61:1, 2) Við viljum fullvissa áheyrendur um að allt sem Jehóva gerir sé fólki ávallt fyrir bestu og til velfarnaðar til langs tíma litið.
4 Kynntu sannleikann af ósvikinni gleði: Fólk er líklegra til að hlusta á okkur þegar það sér gleðina skína úr andliti okkar og heyrir fullvissuna í rödd okkar. Ef við erum bjartsýn í viðmóti skynja áheyrendur að við ‚gleðjumst í voninni‘ og þeir taka fúslegar við fagnaðarerindinu. (Rómv. 12:12) Við höfum því ærna ástæðu til að vera alltaf jákvæð og glöð í bragði í öllum greinum þjónustunnar.
5 Boðberar fagnaðarerindisins gera miklu meira en bara upplýsa aðra. Prédikun þeirra veitir öðrum örugga von um betra líf nú og í framtíðinni. (1. Tím. 4:8) Með því að vera jákvæð þegar við gefum okkur á tal við aðra getum við hjálpað þeim að taka við fagnaðarerindinu. Við skulum hvetja hjartahreint fólk til að taka við þessu stórkostlega fagnaðarerindi, sem við boðum, með því að hugsa um hvað við segjum og hvernig við segjum það.