Veistu hvaða valkosti þú hefur?

Æ fleiri spítalar í heiminum bjóða upp á skurðaðgerðir án blóðgjafar. Veistu hvaða meðferðarúrræði þú átt um að velja? Þú þarft að vita það til að geta tekið upplýsta ákvörðun um læknismeðferð og skurðaðgerðir. Horfðu á myndina No Blood — Medicine Meets the Challenge. (Læknismeðferð án blóðgjafar — þörfinni svarað). Hugleiddu síðan það sem þú hefur lært og gerðu það að bænarefni. Notaðu eftirfarandi spurningar til að kanna þekkingu þína og skilning. Athugið: Í myndinni eru stutt myndskeið sem tekin eru á skurðstofum þannig að foreldrar ættu að hugleiða fyrir fram hvort ráðlegt sé að ung börn sjái hana.

(1) Hver er aðalástæðan fyrir því að vottar Jehóva þiggja ekki blóðgjöf? (2) Eftir hverju sækjast vottar Jehóva varðandi læknismeðferð? (3) Hvaða grundvallarréttindi hafa allir sjúklingar? (4) Af hverju er það skynsamleg og ábyrg afstaða að velja læknismeðferð án blóðgjafar? (5) Hvað tvennt er áríðandi fyrir lækna að gera þegar sjúklingur missir mikið blóð? (6) Á hvaða fjórum meginreglum byggist læknismeðferð án blóðgjafar? (7) Hvernig geta læknar (a) dregið úr blóðmissi, (b) varðveitt rauðkornin, (c) örvað rauðkornamyndun og (d) endurunnið blóð sem sjúklingur missir? (8) Lýstu aðferðum sem kallast (a) blóðvökvaaukning í aðgerð (hemodilution) og (b) endurvinnsla blóðs (cell salvage). (9) Hvaða upplýsingar ættirðu að fá um hverja þá meðferð sem beitt er í stað blóðgjafar? (10) Er hægt að gera stórar og flóknar skurðaðgerðir án blóðgjafar? (11) Hvaða jákvæða þróun á sér stað meðal læknastéttarinnar núna?

Í sumum tilfellum er það einstaklingsbundið og háð samvisku hvers og eins hvort menn þiggja þau úrræði sem sýnd eru í myndinni. Hefurðu ákveðið hvaða meðferðarúrræði þú ert tilbúinn til að þiggja sjálfur og samþykkja handa börnum þínum? Hefurðu útfyllt yfirlýsinguna um læknismeðferð? Ítarlega umfjöllun um þessi mál er að finna í „Spurningum frá lesendum“ í Varðturninum 1. júlí og 1. desember 2000. Notaðu síðan vinnublaðið í viðauka Ríkiþjónustunnar í nóvember 2006 („Hvernig á ég að líta á blóðþætti og læknismeðferð þar sem mitt eigið blóð er notað?“) til að ákveða hvaða meðferðarúrræði þú þiggur eða afþakkar. Gerðu síðan nákvæmlega grein fyrir afstöðu þinni á yfirlýsingunni. Þú ættir að upplýsa fulltrúa þína og nánustu ættingja, sem eru ekki vottar, um afstöðu þína.

[Rammi á blaðsíðu 3]

• Hefurðu ákveðið hvaða læknismeðferð og lækningaraðferðir þú þiggur handa sjálfum þér og börnum þínum?

• Berðu á þér útfyllta yfirlýsingu til að tala máli þínu í neyðartilfelli?