Sýnum aðgát í boðunarstarfinu
1. Hvers vegna er nauðsynlegt að sýna aðgát í starfinu?
1 Þjónar Guðs eru eins og,sauðir meðal úlfa‘ þegar þeir boða fagnaðarerindið „meðal rangsnúinnar og gerspilltrar kynslóðar“. (Matt. 10:16; Fil. 2:15) Ógnvekjandi fréttir af mótmælum, skrílslátum og grimmilegum mannránum eru algengar. Það er til vitnis um að vondir menn eru að „magnast í vonskunni“. (2. Tím. 3:13) Hvaða meginreglur Biblíunnar geta hjálpað okkur að sýna aðgát í boðunarstarfinu? – Matt. 10:16.
2. Við hvaða aðstæður gæti verið skynsamlegt að yfirgefa starfssvæðið og halda áfram annars staðar?
2 Sýndu skynsemi: Orðskviðirnir 22:3 leggja áherslu á viskuna í því að,fela sig‘ fyrir ógæfunni. Vertu athugull. Aðstæður geta breyst óvænt í hverfi sem er að öllu jöfnu öruggt. Kannski tekurðu eftir óvenjumikilli lögregluumferð eða því að fólk er að hópast saman. Kannski varar vinsamlegur húsráðandi þig við hættu. Í stað þess að doka við af forvitni er skynsamlegt að yfirgefa svæðið án tafar og halda áfram annars staðar. – Orðskv. 17:14; Jóh. 8:59; 1. Þess. 4:11.
3. Hvernig á meginreglan í Prédikaranum 4:9 við í boðunarstarfinu?
3 Starfið saman: „Betri eru tveir en einn,“ segir í Prédikaranum 4:9. Þú ert kannski vanur að geta starfað einn án þess að hafa áhyggjur af öryggi þínu. En er það enn þá öruggt? Á sumum svæðum er það í lagi en á öðrum er óráðlegt fyrir systur eða ungt fólk að fara hús úr hús eitt síns liðs, sérstaklega á kvöldin. Reynslan hefur sýnt að athugull starfsfélagi er ómetanlegur. (Préd. 4:10, 12) Hafðu auga með öðrum boðberum í hópnum og gerðu það að vana þínum að láta vita þegar þú yfirgefur svæðið.
4. Hvernig getum við stuðlað að öryggi allra í söfnuðinum?
4 Öldungarnir,vaka yfir sálum okkar‘ og bera ábyrgð á að gefa hagnýt ráð eftir aðstæðum á hverjum stað. (Hebr. 13:17) Við getum verið viss um blessun Jehóva þegar við sýnum hógværð og fylgjum leiðsögn þeirra. (Míka 6:8; 1. Kor. 10:12) Við skulum öll eiga þátt í að gefa góðan vitnisburð á starfssvæðinu, en alltaf gæta fyllsta öryggis.