Notaðu þá aðferð sem virkar best
1. Hvað getum við lært af þeim mismunandi aðferðum sem kristnir menn á fyrstu öld notuðu í boðunarstarfinu?
1 Kristnir menn á fyrstu öld boðuðu fagnaðarerindið fólki með mismunandi trú og af ólíkum menningarheimum. (Kól. 1:23) Þeir boðuðu öllum boðskapinn um Guðsríki en notuðu mismunandi aðferðir eftir því við hverja þeir voru að tala. Pétur byrjaði til dæmis á því að vitna í Jóel spámann þegar hann talaði við Gyðinga sem báru mikla virðingu fyrir Ritningunni. (Post. 2:14-17) En taktu svo eftir hvernig Páll rökræddi við Grikki eins og lesa má í Postulasögunni 17:22-31. Á sumum svæðum ber fólk virðingu fyrir Biblíunni og við getum hiklaust vísað í hana þegar við förum hús úr húsi. En við gætum þurft að fara hægar í sakirnar þegar við tölum við þá sem hafa engan áhuga á Biblíunni eða trúmálum og eru jafnvel ekki kristinnar trúar.
2. Hvernig getum við notað ritatilboðin bæði til að hjálpa þeim sem bera virðingu fyrir Biblíunni og þeim sem trúa ekki á hana?
2 Notaðu ritatilboðin vel: Ritatilboðin á þessu þjónustuári breytast á tveggja mánaða fresti og leggja áherslu á blöðin, bæklinga og smárit. Jafnvel þótt fólk á svæðinu okkar hafi almennt ekki áhuga á Biblíunni ættum við að geta sýnt því eitthvað sem höfðar til þess. Við lesum kannski ekki upp úr Biblíunni í fyrstu heimsókn eða vísum beint í hana en getum farið aftur til þeirra sem sýna áhuga með það markmið að hjálpa þeim að byggja upp trú á skaparann og innblásið orð hans. Ef við erum hins vegar í boðunarstarfinu á svæðum þar sem fólk ber virðingu fyrir Biblíunni getum við valið kynningu og rit í samræmi við það. Hvert sem tilboð mánaðarins er getum við alltaf boðið bókina Hvað kennir Biblían? eða bæklinginn Hlustaðu á Guð og lifðu að eilífu. Aðalatriðið er að nota þá aðferð sem virkar best.
3. Af hverju má líkja hjörtum fólks á svæðinu við jarðveg?
3 Undirbúðu jarðveginn: Hjörtu fólks eru eins og jarðvegur. (Lúk. 8:15) Stundum þarf að undirbúa jarðveginn töluvert áður en sáðkorn sannleikans getur fest þar rætur og náð að vaxa. Boðberar á fyrstu öldinni sáðu í alls konar jarðveg og það færði þeim mikla gleði og ánægju. (Post. 13:48, 52) Starf okkar getur líka verið árangursríkt ef við erum vakandi fyrir því hvernig við getum höfðað til fólks.