Spurningakassinn

◼ Að hvaða marki ætti boðberi að mæta á samkomur og fara í boðunarstarfið áður en hægt er að mæla með því að hann láti skírast?

Skírnin er mikilvægasta ákvörðun sem nokkur getur tekið. Þess vegna verður sá hinn sami að vita, upp að vissu marki, hvers Guð ætlast til af honum áður en hægt er að mæla með því að hann láti skírast. Þar að auki ætti hann þá þegar að sýna í verki að hann vilji lifa eftir vilja Guðs.

Kristnir menn hafa fengið það boð að vanrækja ekki safnaðarsamkomurnar og því ætti óskírður boðberi að vera duglegur að sækja þær. (Heb. 10:24, 25) Undir eðlilegum kringumstæðum ætti hann líka að vera byrjaður að svara á samkomum. Að öllum líkindum er hann orðinn nemandi í Boðunarskólanum en það er þó ekki skilyrði.

Þar sem kristnum mönnum hefur einnig verið falið að boða fagnaðarerindið og gera fólk að lærisveinum ætti óskírður boðberi að taka virkan þátt í boðunarstarfinu áður en hann lætur skírast. (Matt. 24:14; 28:19, 20) Hversu marga mánuði ætti hann að eiga að baki sem boðberi áður en hann skírist? Það má færa rök fyrir því að hann ætti að fá nægan tíma til að sýna fram á að hann sé staðfastur og ötull boðberi um nokkurra mánaða skeið. (Sálm. 78:37) Það þarf þó ekki að líða mjög langur tími frá því hann byrjar að boða trúna og þangað til hann lætur skírast, ef til vill aðeins fáeinir mánuðir. Hversu margir tímar ættu að vera á starfsskýrslu hans? Um það gilda engar strangar reglur. Öldungar ættu að líta á kringumstæður hvers boðbera fyrir sig og sýna sanngirni. – Lúk. 21:1-4.

Þegar öldungar (eða safnaðarþjónar þar sem mjög fáir öldungar eru til staðar) ræða við skírnþega ættu þeir að muna að einstaklingar eru ólíkir og ættu því að sýna góða dómgreind þegar þeir ákveða hvort boðberi sé hæfur til að skírast. Boðberinn ætti að hafa raunverulega löngun til að gerast vottur Jehóva og sýna þakklæti fyrir þann heiður að fá að umgangast söfnuðinn og taka þátt í boðunarstarfinu. Öldungarnir gera sér grein fyrir því að hann hefur ekki náð fullum þroska í trúnni eða náð sömu hæfni og reyndur skírður boðberi. Ef öldungunum finnst eins og hann sé ekki tilbúinn til að skírast ættu þeir að segja honum vingjarnlega frá biblíulegum rökum niðurstöðu sinnar og hjálpa honum svo að taka andlegum framförum.