Stríð eru hryllingur
Fátt hefur jafn djúpstæð áhrif á fólk og stríð og vopnuð átök. Hermenn og óbreyttir borgarar um allan heim sem hafa upplifað stríð þekkja þann harmleik af eigin raun.
HERMENN
„Dauði og tortíming eru allt í kring um mann og sært fólk sem mun aldrei ná sér aftur. Manni finnst maður aldrei öruggur.“ – Gary, Bretlandi.
„Ég fékk skot í bakið og andlitið og sá marga drepna, þar á meðal börn og gamalmenni. Stríð valda tilfinningadoða gagnvart þjáningum og dauða.“ – Wilmar, Kólumbíu.
„Þegar þú sérð einhvern skotinn fyrir framan þig losnarðu aldrei við þá mynd úr huganum. Þú heyrir kveinin aftur og aftur í huganum og getur aldrei gleymt þeim.“ – Zafirah, Bandaríkjunum.
ÓBREYTTIR BORGARAR
„Mér leið eins og ég gæti aldrei orðið hamingjusöm aftur. Ég óttaðist um líf mitt. En ég óttaðist enn meira um líf fjölskyldu minnar og vina.“ – Oleksandra, Úkraínu.
„Það var skelfilegt að þurfa að standa í röð til að ná í mat frá því klukkan tvö um nóttina til ellefu næsta kvöld, vitandi að við gætum hvenær sem er orðið fyrir skoti.“ – Daler, Tadsíkistan.
„Foreldrar mínir voru drepnir í stríði. Ég stóð ein eftir með engan til að hugga mig eða sjá um mig.“ – Marie, Rúanda.
Þessir einstaklingar hafa fundið hughreystingu þrátt fyrir skelfilegar afleiðingar stríðs. Þeir eru auk þess sannfærðir um að öll stríð og vopnuð átök taki bráðlega enda. Í þessu tölublaði Varðturnsins er Biblían notuð til að útskýra hvernig því verður komið til leiðar.