Hvert er tákn hinna ,síðustu daga‘ eða „tíma endalokanna“?

Svar Biblíunnar

Biblían lýsir atburðum, ástandi og viðhorfum sem myndu einkenna „lokaskeið [núverandi] heimsskipanar“, eða ,endalok veraldar‘. (Matteus 24:3, Biblían 1981) Í Biblíunni er þetta tímabil kallað ,síðustu dagar‘ og ,tími endalokanna‘. – 2. Tímóteusarbréf 3:1; Daníel 8:19.

Hverjir eru nokkrir af spádómum Biblíunnar varðandi ,síðustu daga‘?

Biblían sagði fyrir um margt sem ætti að gerast og mynda „táknið“ um síðustu daga. (Lúkas 21:7) Skoðum nokkur dæmi:

Stríð um allan heim. Jesús sagði fyrir: „Þjóð mun ráðast gegn þjóð og ríki gegn ríki.“ (Matteus 24:7) Á svipaðan hátt talar Opinberunarbókin 6:4 um táknrænan reiðmann sem stendur fyrir hernað og myndi „taka friðinn burt af jörðinni“.

Hungursneyðir. Jesús sagði fyrir: „Það verða hungursneyðir.“ (Matteus 24:7) Opinberunarbókin talar um annan táknrænan reiðmann sem myndi valda mikilli hungursneyð. – Opinberunarbókin 6:5, 6.

Miklir jarðskjálftar. Jesús sagði að það yrðu „jarðskjálftar á einum stað eftir annan“. (Matteus 24:7; Lúkas 21:11) Þessir miklu jarðskjálftar um allan heim myndu valda meiri þjáningum og dauða en hefur áður sést.

Sjúkdómar. Jesús sagði að það yrðu drepsóttir, eða faraldrar af völdum ,hræðilegra sjúkdóma‘. – Lúkas 21:11, Contemporary English Version.

Glæpir. Þó að glæpir hafi verið til í aldaraðir sagði Jesús að á síðustu dögum myndi „illskan magnast“. – Matteus 24:12.

Eyðing jarðar. Opinberunarbókin 11:18 sagði fyrir að menn myndu „eyða jörðina“. Þeir myndu gera það á margan hátt, ekki aðeins með ofbeldi og siðspillingu heldur myndu þeir líka fara illa með umhverfið.

Siðferðileg hnignun. Í 2. Tímóteusarbréfi 3:1–4 sagði Biblían fyrir að menn almennt myndu vera „vanþakklátir, ótrúir … ósáttfúsir, rógberar, hafa enga sjálfstjórn, grimmir, elska ekki hið góða, sviksamir, þverir, yfirlætisfullir“. Þessir eiginleikar yrðu svo áberandi að það væri réttilega hægt að segja að á þessu tímabili yrðu „hættulegir og erfiðir tímar“.

Sundraðar fjölskyldur. Biblían sagði fyrir í 2. Tímóteusarbréfi 3:2, 3 að margir yrðu „kærleikslausir“ í garð fjölskyldu sinnar og að börn yrðu ,óhlýðin foreldrum‘.

Kærleikurinn til Guðs kólnar hjá flestu fólki. Jesús sagði fyrir: „Kærleikur flestra [mun] kólna.“ (Matteus 24:12) Hann var að tala um að kærleikur flestra til Guðs myndi kólna. Í 2. Tímóteusarbréfi 3:4 segir að á síðustu dögum myndi þetta fólk „elska nautnir frekar en Guð“.

Trúarleg hræsni. Í 2. Tímóteusarbréfi 3:5 er sagt fyrir að fólk myndi sýnast guðrækið en í rauninni ekki lifa eftir siðferðisreglum Guðs.

Aukinn skilningur á spádómum Biblíunnar. Í Daníelsbók segir að á „tíma endalokanna“ myndu margir fá aukna þekkingu á sannleika Biblíunnar, þar á meðal nákvæman skilning á þessum spádómum. – Daníel 12:4, neðanmáls.

Boðun um allan heim. Jesús sagði fyrir: „Fagnaðarboðskapurinn um ríkið verður boðaður um alla jörðina.“ – Matteus 24:14.

Sinnuleysi og háð útbreitt. Jesús sagði fyrir að fólk myndi almennt hunsa skýrar vísbendingar um að endirinn væri nálægur. (Matteus 24:37–39) Þar að auki er spáð í 2. Pétursbréfi 3:3, 4 að sumir myndu gera gys að vísbendingunum og neita að taka nokkurt mark á þeim.

Allir spádómarnir rætast. Jesús sagði að ,síðustu dagar‘ myndu einkennast af því að allir þessir spádómar uppfylltust á sama tíma, ekki bara nokkrir þeirra eða jafnvel flestir. – Matteus 24:33.

Lifum við á „síðustu dögum“?

Já. Ástandið í heiminum og tímatal Biblíunnar sýna að síðustu dagar hófust 1914, sama ár og fyrri heimsstyrjöldin braust út. Horfðu á þetta myndband til að sjá hvernig ástandið í heiminum sýnir að við lifum á síðustu dögum:

Árið 1914 tók Guðsríki til starfa á himnum og eitt fyrsta verkefni þess var að reka Satan Djöfulinn og illu andana frá himnum og takmarka áhrif þeirra við jörðina. (Opinberunarbókin 12:7–12) Áhrif Satans á mannkynið sjást á vondum verkum og viðhorfum fólks sem gera það að verkum að ,síðustu dagar‘ eru „hættulegir og erfiðir tímar“. – 2. Tímóteusarbréf 3:1.

Þessir hættulegu tímar valda mörgum áhyggjum. Þeir óttast að fólk kunni ekki lengur að lifa saman á jörðinni. Sumir hafa meira að segja áhyggjur af því að mennirnir muni tortíma hver öðrum.

En aðrir sem hafa líka áhyggjur af ástandinu í heiminum eiga von um bjartari framtíð. Þeir eru sannfærðir um að ríki Guðs taki brátt í taumana og leysi öll vandamál heimsins. (Daníel 2:44; Opinberunarbókin 21:3, 4) Þeir bíða þolinmóðir eftir að Guð efni loforð sín og finna hughreystingu í þessum orðum Jesú: „Sá sem er þolgóður allt til enda mun bjargast.“ – Matteus 24:13; Míka 7:7.