Jeremía
5 Gangið um stræti Jerúsalem,
lítið vandlega í kringum ykkur.
Leitið á torgunum og kannið
hvort þið finnið nokkurn sem stundar réttlæti+
og leitast við að vera trúfastur.
Þá mun ég fyrirgefa borginni.
2 Þótt menn segi: „Svo sannarlega sem Jehóva lifir,“
sverja þeir samt falskan eið.+
3 Jehóva, leita augu þín ekki að trúfesti?+
Þú slóst þá en það hafði ekkert að segja.
Þú gerðir næstum út af við þá en þeir streittust á móti aganum.+
4 En ég hugsaði með mér: „Þetta hlýtur að vera lágstéttarfólk.
Það hegðar sér heimskulega af því að það þekkir ekki veg Jehóva,
kröfur Guðs síns.
5 Ég ætla að fara til stórmennanna og tala við þau.
Þau hljóta að þekkja veg Jehóva,
kröfur Guðs síns.+
En þau hafa öll brotið okið
og rifið af sér fjötrana.“*
6 Þess vegna kemur ljón úr skóginum og ræðst á þau,
úlfur úr eyðimörkinni og herjar á þau.
Hlébarði liggur í leyni við borgir þeirra.
Allir sem fara út úr þeim verða rifnir í sundur
því að afbrot þeirra eru mörg,
ótrúmennska þeirra mikil.+
7 Hvernig get ég fyrirgefið þér þetta?
Synir þínir hafa yfirgefið mig
og þeir sverja við falsguð.+
Ég gaf þeim allt sem þeir þurftu
en þeir frömdu hjúskaparbrot hvað eftir annað
og flykktust að húsi vændiskonu.
8 Þeir eru eins og taumlausir graðhestar
og hneggja eftir konu annars manns.+
9 „Ætti ég ekki að draga þá til ábyrgðar fyrir þetta?“ segir Jehóva.
„Ætti ég ekki að hefna mín á þjóð sem hegðar sér svona?“+
10 „Farið og eyðileggið víngarðsstalla hennar
en gereyðið þeim ekki.+
Takið burt nýsprottnar greinar hennar
því að þær tilheyra ekki Jehóva.
11 Ísraelsmenn og Júdamenn
hafa svikið mig illa,“ segir Jehóva.+
12 „Þeir hafa afneitað Jehóva og segja:
Engin ógæfa kemur yfir okkur,
við munum hvorki sjá sverð né hungursneyð.‘+
13 Spámennirnir blaðra út í loftið
og orðið* býr ekki í þeim.
Orð þeirra komi þeim í koll!“
14 Þess vegna segir Jehóva, Guð hersveitanna:
„Af því að þessir menn segja þetta
geri ég orð mín að eldi í munni þínum.+
Þetta fólk er viðurinn
sem eldurinn gleypir.“+
15 „Ísraelsmenn, ég leiði gegn ykkur þjóð sem býr langt í burtu,“+ segir Jehóva.
„Þessi þjóð er gamalgróin,
hún er ævaforn.
Þið kunnið ekki tungumál hennar
og skiljið ekki hvað hún segir.+
16 Örvamælir hennar er eins og opin gröf,
þeir eru allir stríðskappar.
17 Þeir gleypa í sig uppskeru þína og brauð,+
syni þína og dætur.
Þeir gleypa í sig sauði þína og nautgripi,
vínviði þína og fíkjutré.
Með sverði tortíma þeir víggirtu borgunum sem þú treystir á.“
18 „En jafnvel þá,“ segir Jehóva, „mun ég ekki gereyða ykkur.+ 19 Þegar fólk spyr: ‚Af hverju hefur Jehóva Guð okkar gert okkur allt þetta?‘ skaltu svara: ‚Þið yfirgáfuð mig til að þjóna útlendum guði í landi ykkar. Þess vegna munuð þið þjóna útlendingum í landi sem er ekki ykkar.‘“+
20 Tilkynnið þetta meðal afkomenda Jakobs
og boðið það í Júda:
21 „Hlustaðu á þetta, þú heimska og óskynsama þjóð:+
22 ‚Óttist þið mig ekki?‘ segir Jehóva.
‚Ættuð þið ekki að skjálfa frammi fyrir mér?
Ég setti sandinn sem mörk fyrir hafið,
varanlegan tálma sem það kemst ekki yfir.
Þótt öldurnar komi með miklum ofsa bíða þær alltaf ósigur,
þótt þær drynji komast þær ekki yfir hann.+
23 En þetta fólk er þrjóskt og uppreisnargjarnt í hjarta sínu.
Það hefur beygt út af veginum og fer sínar eigin leiðir.+
24 Það hugsar ekki með sér:
„Óttumst Jehóva Guð okkar,
hann sem gefur regn á réttum tíma,
haustregnið og vorregnið,
hann sem tryggir okkur ákveðnar uppskeruvikur.“+
25 Afbrot ykkar hafa hrifsað þetta frá ykkur,
syndir ykkar svipt ykkur því sem er gott.+
26 Illmenni eru meðal þjóðar minnar.
Þau fylgjast með bráðinni eins og fuglafangarar í felum.
Þau leggja dauðagildrur
og veiða menn.
27 Eins og búr full af fuglum,
þannig eru hús þeirra full af svikum.+
Þess vegna eru þau orðin voldug og rík.
28 Þau eru feit og með stinna húð,
þau eru uppfull af illsku.
Þau verja ekki mál hinna föðurlausu+
heldur hugsa bara um eigin velgengni.
Þau leyfa hinum fátæku ekki að ná rétti sínum.‘“+
29 „Ætti ég ekki að draga þau til ábyrgðar fyrir þetta?“ segir Jehóva.
„Ætti ég ekki að hefna mín á þjóð sem hegðar sér svona?
30 Það sem á sér stað í landinu er skelfilegt og hryllilegt:
31 Spámennirnir bera fram lygar+
og prestarnir beita valdi sínu til að drottna yfir fólkinu,
og þjóð minni líkar það vel.+
En hvað ætlið þið að gera þegar endalokin koma?“