„Fagnaðarboðskapurinn um ríkið verður boðaður“

„Fagnaðarboðskapurinn um ríkið verður boðaður um alla jörðina til að allar þjóðir fái að heyra hann, og síðan kemur endirinn.“ – MATTEUS 24:14.

Hvað þýðir það? Guðspjallaritarinn Lúkas segir að Jesús ,hafi farið borg úr borg og þorp úr þorpi og boðað fagnaðarboðskapinn um ríki Guðs‘. (Lúkas 8:1) Jesús sagði sjálfur: „Ég þarf líka að flytja öðrum borgum fagnaðarboðskapinn um ríki Guðs því að til þess var ég sendur.“ (Lúkas 4:43) Hann sendi lærisveina sína til að boða fagnaðarboðskapinn í bæjum og þorpum og sagði síðar við þá: „Þið verðið vottar mínir … til endimarka jarðar“. – Postulasagan 1:8; Lúkas 10:1.

Hvernig fylgdu kristnir menn á fyrstu öld þessu fordæmi? Lærisveinar Jesú brugðust fljótt við því sem Jesús sagði þeim að gera. „Þeir fóru daglega í musterið og hús úr húsi og héldu sleitulaust áfram að kenna og boða fagnaðarboðskapinn um Krist.“ (Postulasagan 5:42) Það voru ekki aðeins fáeinir útvaldir sem sáu um að boða trúna. Sagnfræðingurinn Neander tók eftir því að „Celsus sem var fyrstur til að skrifa gegn kristninni trú hæddist að þeirri staðreynd að ullariðnaðarmenn, skósmiðir, sútarar og ólærður almúginn voru ákafir prédikarar fagnaðarboðaskaparins“. Í bók sinni The Early Centuries of the Church segir Jean Bernardi: „[Kristnir menn] áttu að fara út og tala alls staðar og við alla – á þjóðvegunum og í borgunum, á torgunum og á heimilunum, hvort sem þeir voru velkomnir eða óvelkomnir … til endimarka jarðarinnar.“

Hverjir fylgja þessu fordæmi nú á dögum? „Ein ástæðan fyrir andlegu sinnuleysi á okkar dögum er sú að kirkjunum hefur mistekist hrapallega að boða og kenna trúna,“ segir biskupakirkjupresturinn David Watson. Í bók sinni Why Are the Catholics Leaving? skrifar José Luis Pérez Guadalupe um vakningarprédikara, aðventista og aðra og bendir á að „þeir fara ekki hús úr húsi“. Hann skrifar um votta Jehóva: „Þeir fara skipulega hús úr húsi.“

Jonathan Turley bendir á athyglisverða staðreynd í ritinu Cato Supreme Court Review 2001–2002: „Þegar minnst er á votta Jehóva hugsa flestir um trúboða sem banka upp á á óhentugum tíma. Það er ekki bara til að styrkja stöðu sína sem vottar Jehóva reyna að telja fólk á sína skoðun þegar þeir fara hús úr húsi heldur er það nauðsynlegt þeirra eigin trú.“

[Rammi]

Kemurðu auga á einkenni sannrar kristni?

Hvaða söfnuður heldur þú að hafi þau einkenni sannrar kristni sem Biblían nefnir og er rætt um í þessari greinaröð? Tugir þúsunda hópa og sértrúarsafnaða halda því fram að þeir séu kristnir en gleymdu ekki að Jesús sagði við fylgjendur sína: „Ekki munu allir sem segja við mig: ,Drottinn, Drottinn,‘ ganga inn í himnaríki heldur aðeins þeir sem gera vilja föður míns sem er á himnum.“ (Matteus 7:21) Að bera kennsl á þá sem gera vilja föðurins – hafa einkenni sannrar kristni – og sækja samkomur með þeim getur haft í för með sér eilífa blessun undir stjórn Guðsríkis. Við hvetjum þig til að biðja votta Jehóva um frekari upplýsingar um Guðsríki og blessunina sem það mun færa. – Lúkas 4:43.