Við erum í skuld við aðra

¹ Páli postula fannst hann skuldbundinn til að prédika fyrir fólki. Hann vissi að Jehóva hafði með dýrmætu blóði sonar síns gert alls konar fólki mögulegt að bjargast. (1. Tím. 2:3-6) Páll sagði því: „Ég er í skuld bæði við Grikki og útlendinga, vitra og fávísa.“ Hann vann þrotlaust að því að greiða skuldina við aðra með því að segja þeim frá fagnaðarerindinu. — Rómv. 1:14, 15.

² Kristnir menn nú á dögum leitast við að segja öðrum frá fagnaðarerindinu hvenær sem tækifæri gefst líkt og Páll. ,Þrengingin mikla‘ nálgast óðfluga þannig að það er brýnt að leita að hjartahreinum mönnum. Ósvikinn kærleikur til fólks ætti að knýja okkur til að vera ötul í þessu björgunarstarfi. — Matt. 24:21; Esek. 33:8.

³ Að borga skuldina: Helsta leiðin sem við notum til að ná tali af fólki er að prédika hús úr húsi. Á svæðum þar sem fáir eru heima er gagnlegt að halda nákvæmar skrár og fara aftur á mismunandi tímum því að þannig getum við hitt fleira fólk. (1. Kor. 10:33) Við getum einnig náð tali af fólki á viðskiptasvæðum, á götum úti, í almenningsgörðum, á bílastæðum og með hjálp síma. Við gætum spurt okkur: „Reyni ég eftir bestu getu að nýta allar tiltækar leiðir til að prédika hjálpræðisboðskapinn?“ — Matt. 10:11.

⁴ Brautryðjandasystur fannst hún hafa þá ábyrgð að hitta alla á svæðinu sínu. Í einu húsinu var alltaf dregið fyrir og aldrei neinn heima. En dag einn þegar systirin var ekki í starfinu tók hún eftir bíl fyrir framan húsið. Hún vildi ekki að tækifærið rynni sér úr greipum og hringdi því dyrabjöllunni. Maður kom til dyra og fyrsta samtalið varð til þess að systirin og eiginmaður hennar fóru aftur nokkrum sinnum. Að lokum þáði hann biblíunámskeið og er núna skírður bróðir. Hann er þakklátur fyrir að þessari systur fannst hún skuldbundin til að prédika fyrir öðrum.

⁵ Þar sem tíminn er óðum að renna út er núna brýnt að gjalda skuld okkar við náungann með því að leggja okkur kappsamlega fram um að boða fagnaðarerindið. — 2. Kor. 6:1, 2.

11. hluti: Árangursrík biblíunámskeið

Nýjum boðberum hjálpað að fara í endurheimsóknir

¹ Þegar biblíunemandi fer að taka þátt í boðunarstarfinu hittir hann fólk sem sýnir fagnaðarerindinu áhuga. Hvernig getum við hjálpað nýja boðberanum að ná árangri í endurheimsóknum og glæða áhugann sem hann verður var við?

² Undirbúningur fyrir endurheimsókn hefst í fyrstu heimsókninni. Hvettu nemandann til að sýna viðmælendunum einlægan áhuga. (Fil. 2:4) Þjálfaðu hann smám saman í að fá þá til að tjá sig, hlusta á athugasemdir þeirra og taka eftir því sem þeim er umhugað um. Þegar einhver sýnir áhuga skaltu láta nýja boðberann skrifa niður viðeigandi upplýsingar um heimsóknina. Notaðu upplýsingarnar til að hjálpa honum að skipuleggja frekari umræður.

³ Undirbúningur fyrir endurheimsókn: Rifjaðu upp fyrstu heimsóknina og sýndu nemandanum hvernig farið er að því að velja efni sem höfðar til húsráðanda. (1. Kor. 9:19-23) Undirbúið saman stutta kynningu með ritningarstað ásamt efnisgrein í námsriti. Til viðbótar skuluð þið undirbúa spurningu sem hægt er að varpa fram í lok samræðnanna til að leggja grunn að næstu heimsókn. Sýndu nýja boðberanum hvernig hann getur í hverri heimsókn aukið þekkingu viðmælandans á orði Guðs.

⁴ Einnig er gagnlegt að kenna nemandanum einfalda kynningu. Þegar hann hefur heilsað húsráðanda gæti hann sagt: „Mér fannst ánægjulegt að tala við þig síðast og ég er kominn aftur til að segja þér frá fleiru sem stendur í Biblíunni um [nefndu umræðuefnið].“ Þú gætir einnig þurft að sýna nýja boðberanum hvernig hann eigi að bregðast við ef einhver annar kemur til dyra.

⁵ Fylgdu áhuganum dyggilega eftir: Hvettu nemandann til að sýna gott fordæmi og fara aftur til allra sem sýna áhuga. Til að hitta á fólk heima getum við þurft að vera iðin við að fara í endurheimsóknir. Kenndu nemandanum að ákveða tíma fyrir næstu heimsókn og hjálpaðu honum að skilja hve nauðsynlegt sé að koma aftur eins og lofað var. (Matt. 5:37) Æfðu nýja boðberann í að vera vingjarnlegur, nærgætinn og kurteis þegar hann leitar að sauðumlíku fólki og glæðir áhuga þess. — Tít. 3:2.