Árangursrík biblíunámskeið

6. hluti: Þegar nemandi spyr spurninga

¹ Þegar búið er að koma biblíunámskeiði af stað er yfirleitt betra að fara skipulega yfir efnið en að flakka milli efnisatriða. Það hjálpar nemandanum að öðlast nákvæma þekkingu og taka framförum í trúnni. (Kól. 1:9, 10) En það gerist oft að nemendur spyrja spurninga um margvísleg málefni meðan á námsstund stendur. Hvernig er best að svara þeim?

² Vertu skarpskyggn: Spurningum, sem vakna og tengjast efninu, er yfirleitt hægt að svara um leið og þær koma upp. Ef fjallað er um spurninguna seinna í námsefninu nægir að benda á að henni verði svarað síðar. En ef spurningin tengist ekki námsefninu eða krefst rannsóknar til að hægt sé að svara henni á viðunandi hátt er ef til vill betra að ræða málið eftir námsstundina eða við annað tækifæri. Sumum boðberum finnst gott að skrifa spurninguna niður. Þannig fullvissa þeir nemandann um að spurningin hafi verið tekin alvarlega og koma um leið í veg fyrir að námsefnið, sem til umfjöllunar er, missi marks.

³ Ýmsar biblíukenningar eru aðeins teknar lauslega fyrir í aðalnámsbókum okkar. Hvað ef nemandanum finnst erfitt að viðurkenna ákveðna kenningu eða rígheldur í falskenningu? Gagnlegt getur verið að taka fyrir aukaefni sem fjallar ítarlega um hvað Biblían segir um málið. Ef nemandinn lætur samt ekki sannfærast er gott að geyma spurninguna til betri tíma og halda áfram með námsefnið. (Jóh. 16:12) Þegar hann öðlast meiri þekkingu á Biblíunni og tekur framförum í trúnni gæti hann sannfærst um þá biblíukenningu.

⁴ Vertu hæverskur: Ef þú ert ekki með svar við spurningu á reiðum höndum skaltu ekki láta freistast til að giska á það. (2. Tím. 2:15; 1. Pét. 4:11) Segðu að þú munir kanna málið og svara síðar. Þú gætir jafnvel notað tækifærið til að kenna nemandanum að leita svara. Sýndu honum smám saman hvernig hann getur notað hin ýmsu hjálpargögn sem söfnuður Jehóva sér okkur fyrir. Þá mun hann um síðir vera fær um að leita svara við eigin spurningum. — Post. 17:11.

Tilkynningar

◼ Ritatilboðið í febrúar: Nálægðu þig Jehóva. Mars: Haltu vöku þinni! Ef áhugi er fyrir hendi má bjóða Þekkingarbókina með það fyrir augum að hefja biblíunámskeið. Apríl og maí: Varðturninn og Vaknið! Gott væri að bjóða bókina Sameinuð í tilbeiðslu þegar við heimsækjum aftur áhugasamt fólk og þá sem hafa verið viðstaddir minningarhátíðina eða aðrar samkomur en eru ekki virkir í safnaðarstarfinu. Markmiðið ætti að vera að hefja biblíunámskeið og þá sérstaklega hjá þeim sem þegar hafa farið yfir Þekkingarbókina og Kröfubæklinginn.

◼ Umsjónarmaður í forsæti eða einhver sem hann tilnefnir á að endurskoða reikningshald safnaðarins 1. mars eða eins fljótt þar á eftir og mögulegt er. Ef til er sérstakur byggingar- eða viðhaldssjóður á einnig að endurskoða bókhald hans. Þegar þessu er lokið skal tilkynna það söfnuðinum eftir að næsta reikningshaldsskýrsla er lesin upp.

◼ Ritari safnaðarins og starfshirðir skulu fara yfir starfsemi allra reglulegra brautryðjenda. Ef einhver á erfitt með að uppfylla tímakröfurnar ættu öldungarnir að gera ráðstafanir til að aðstoða hann. Tillögur er að finna í árlegum bréfum deildarskrifstofunnar til öldungaráða vegna brautryðjenda (S-201).

◼ Stef sérræðunnar vorið 2005 verður: „Hvers vegna þurfti Jesús að þjást og deyja?“ Sjá tilkynningu í Ríkisþjónustu okkar í september 2004.

◼ Við hvetjum alla til að vera viðstaddir samkomuna sunnudaginn 20. mars. Þá verður lesin sérstök tilkynning sem allir boðberar ættu að hafa áhuga á.

◼ Deildarskrifstofan afgreiðir ekki ritabeiðnir einstakra boðbera beint. Umsjónarmaður í forsæti ætti að láta lesa upp tilkynningu í hverjum mánuði áður en mánaðarleg ritapöntun safnaðarins er send til deildarskrifstofunnar svo að allir sem vilja geti pantað rit hjá bókaþjóninum. Vinsamlegast hafið í huga hvaða rit eru sérpöntunarvara.