SPURNING 5
Er skynsamlegt að trúa Biblíunni?
Hefurðu einhvern tíma gert þér rangar hugmyndir um aðra manneskju? Kannski heyrðirðu talað um hana eða vitnað í hana. Þú bjóst ekki við að þér myndi líka við hana en þegar þú kynntist henni uppgötvaðir þú að þú hafðir fengið ranga mynd af henni. Margir hafa upplifað eitthvað svipað varðandi Biblíuna.
Það er býsna algengt að menntafólk hafi lítið álit á Biblíunni. Af hverju ætli það sé? Oft er talað um hana eða vitnað í hana með þeim hætti að hún virðist órökrétt, óvísindaleg eða fari hreinlega með rangt mál. Er hugsanlegt að margir hafi fengið villandi mynd af henni?
Kom það þér á óvart þegar þú last þennan bækling að Biblían skuli vera vísindalega nákvæm? Þú ert ekki einn um það. Margir eru líka hissa á því að Biblían skuli ekki segja sumt sem mörg trúfélög fullyrða að hún segi. Sumir halda því til dæmis fram að Biblían kenni að Guð hafi skapað alheiminn og allt líf í honum á sex sólarhringum. En í rauninni stendur ekkert í Biblíunni sem er í mótsögn við hugmyndir vísindamanna um aldur alheimsins eða jarðarinnar.a
Stutt yfirlit Biblíunnar um það hvernig Guð myndaði lífið hér á jörð gefur auk þess mikið svigrúm fyrir vísindalegar rannsóknir og kenningar. Biblían segir einfaldlega að Guð hafi skapað allt líf og að allt sem lifir hafi verið skapað „eftir sinni tegund“. (1. Mósebók 1:11, 21, 24) Þetta getur stangast á við ýmsar vísindakenningar en það stríðir ekki gegn viðurkenndum vísindalegum staðreyndum. Saga vísindanna sýnir að kenningar koma og fara en staðreyndirnar breytast ekki.
Margir hika samt við að kynna sér Biblíuna vegna þess að þeir hafa orðið fyrir vonbrigðum með trúarbrögðin. Þeir tengja trúarbrögðin við hræsni, spillingu og stríðsæsingar. En er sanngjarnt að dæma Biblíuna eftir hegðun sumra sem segjast fara eftir henni? Marga vísindamenn hryllir við því hvernig sumir ofstækismenn hafa notað þróunarkenninguna til að réttlæta kynþáttahatur og ofbeldi. Væri sanngjarnt að dæma þróunarkenninguna á þeim grundvelli? Það er miklu betra að skoða um hvað kenningin snýst og bera það saman við fyrirliggjandi staðreyndir.
Við hvetjum þig til að skoða Biblíuna með svipuðum hætti. Það kemur þér kannski á óvart hve kenningar hennar eru ólíkar því sem flest stóru trúfélögin halda á lofti. Biblían ýtir alls ekki undir stríð eða kynþáttaofbeldi. Hún kennir að þjónar Guðs eigi ekki að taka þátt í stríðsátökum og eigi jafnvel að varast hatrið sem er undirrót þess konar ofbeldis. (Jesaja 2:2–4; Matteus 5:43, 44; 26:52) Biblían hvetur ekki til trúarofstækis. Hún aðhyllist ekki að menn trúi í blindni heldur kennir hún að sönn trú verði að byggjast á rökum og að skynsemin sé ómissandi þáttur í að þjóna Guði. (Rómverjabréfið 12:1; Hebreabréfið 11:1) Í stað þess að berja niður forvitni og fróðleikslöngun hvetur Biblían okkur til að leita svara við einhverjum stærstu og erfiðustu spurningum sem menn hafa staðið frammi fyrir.
Hefurðu velt þessari spurningu fyrir þér: Ef Guð er til, hvers vegna leyfir hann þá alla illskuna í heiminum? Biblían svarar því og mörgum öðrum spurningum.b Við hvetjum þig til að leita svara við spurningum þínum. Þú getur fundið hrífandi og skynsamleg svör – byggð á sannfærandi rökum. Og það er engin tilviljun.
a Nánari upplýsingar er að finna í bæklingnum Var lífið skapað? sem er gefinn út af Vottum Jehóva.
b Sjá 26. kafla bókarinnar Von um bjarta framtíð, gefin út af Vottum Jehóva.