FORSÍÐUEFNI | INNSÝN Í ANDAHEIMINN
Spurningar um andaheiminn
Hefurðu einhvern tíma velt fyrir þér hvernig andaheimurinn er? Þú ert þá ekki einn um það. Í gegnum aldirnar hefur fólk velt vöngum yfir því. Sumir trúa að forfeður þeirra lifi á andasviðinu og að þá beri að heiðra. Aðrir sjá fyrir sér friðsaman sælustað sem kallaður er himnaríki og að þar séu englar og gott fólk sem hefur dáið. Enn aðrir líta á andaheiminn sem heimkynni hundruð milljóna guða.
Margir segja að við getum ekki vitað neitt um andaheiminn vegna þess að enginn hefur komið þaðan sem getur sagt okkur frá honum. En sú fullyrðing er röng. Jesús Kristur var andavera á himnum áður en hann kom til jarðar. Hann sagði berum orðum við trúarleiðtogana á fyrstu öld: „Ég er stiginn niður af himni, ekki til að gera vilja minn heldur vilja þess er sendi mig.“ Postularnir fengu því upplýsingar frá fyrstu hendi þegar Jesús sagði þeim: „Í húsi föður míns eru margar vistarverur.“ – Jóhannes 6:38; 14:2.
Guð er að sjálfsögðu faðir Jesú. Nafn hans er Jehóva og „hús“ hans er á himnum. (2. Mósebók 6:3, neðanmáls) Engir geta því skýrt betur frá hinu ósýnilega tilverusviði en Jehóva Guð og Jesús Kristur. Þeir opinberuðu trúföstum mönnum heilmikið um andaheiminn með tilkomumiklum sýnum.
Í næstu grein er fjallað um vers í Biblíunni sem lýsa því hvað menn sáu í þessum sýnum. Þegar þú lest um þessar sýnir skaltu hafa í huga að andaheimurinn er ekki eins og efnisheimurinn, með hlutum sem við getum bæði séð og snert. Guð útskýrir ekki andaheiminn á þann hátt sem aðeins andlegar verur geta skilið. Þess í stað gerir hann það með sýnum sem við getum skilið og meðtekið. Þessar sýnir hjálpa okkur að skilja betur andaverurnar í hinum ,mörgu vistarverum‘ himinsins.