Vissir þú?

Hvernig styður forn áletrun frásögu Biblíunnar?

Í BIBLE Lands Museum í Jerúsalem getur að líta stein með áletrun frá sjöundu öld f.Kr. Hann fannst í grafarhelli skammt frá Hebron í Ísrael. Áletrunin hljóðar svo: „Bölvaður sé Hagaf sonur Hagav af Jahve Sabaot.“ Hvernig styður þessi áletrun frásögu Biblíunnar? Hún sýnir að nafn Guðs, Jehóva eða Jahve, ritað JHVH með fornhebresku letri, var vel þekkt á biblíutímanum og að fólk notaði það í daglegu lífi. Aðrar áletranir í grafarhellunum sýna að þeir sem hittust þar og földu sig rituðu nafn Guðs á veggina ásamt öðrum sérnöfnum sem fela í sér mynd af nafni hans.

Dr. Rachel Nabulsi við University of Georgia segir um þessar áletranir: „Ítrekuð notkun nafnsins JHVH segir mikla sögu. [Biblíu-]textarnir og áletranirnar sýna að JHVH skipaði stóran sess í daglegu lífi í Ísrael og Júda.“ Þetta rennur stoðum undir frásögu Biblíunnar en í henni kemur nafn Guðs fyrir mörg þúsund sinnum, ritað JHVH með hebresku letri. Sérnöfn fólu oft í sér nafn Guðs.

Áletrunin „Jahve Sabaot“ á steininum merkir ,Jehóva hersveitanna‘. Þetta virðist benda til þess að ekki aðeins nafn Guðs heldur líka orðasambandið ,Jehóva hersveitanna‘ hafi verið almennt notað á biblíutímanum. Það samræmist notkun Biblíunnar á hugtakinu ,Jehóva hersveitanna‘ en það kemur fyrir oftar en 250 sinnum í Hebresku ritningunum, aðallega í bókum Jesaja, Jeremía og Sakaría.