Be Elin Nọnsi Jehova Lu Uhọnmhọn-emhin Sẹ Yẹ Rẹji Jesu?

1-2. (a) Be Jesu lu bhi ọne ukpasọn ọkuẹsẹ a gbe ọle a? (b) Inọnta nela mhan ha zilo nyan bhi ọne uhọnmhọn-ọta nan?

BHI ọsemuan ẹdẹ Tọzde, Nisan 14, bhi ukpe 33 C.E., ọne ẹghe da sẹ na ha rẹ mun Jesu, bhu ọle ohiẹn, re obọ oya mun ọlẹn, yẹ gbe ọle a. Ọle wo la deba etuegbe nesọle le ebale fo bhi ugha nọn ribhi okhun uwa. Bhi ẹghe nin ele ki rẹ le ebale fo, Jesu da ta ọta ikoudure man ene etuegbe nesọle. Ọkuẹsẹ ele sibhi ọne ugha nan re, Jesu da nan erọnmhọn kpataki. Jọni nin odibọ gbẹn ọne erọnmhọn nan ọbhi otọ. Mhan dẹ miẹn ọlẹn tie bhi ebe ọsi Jọni uhọnmhọnlẹn nọnzi 17.

² Be erọnmhọn nin Jesu nan rẹ rẹman ebi ọle ha ria ẹmhọnlẹn bhi ọne ẹghenin? Be ọne erọnmhọn nin rẹman rẹji ebe lu uhọnmhọn-emhin nẹ rẹji Jesu bhi ẹghe nin ọle rẹ ha ribhi ọne otọ nan? Bha ji mhan guanọ ewanniẹn rẹji ene inọnta nan.

“MẸN RẸKPA ELE RẸ LẸN ELIN NỌNSẸ”

3. Be Jesu tale rẹji elin nọnsi Jehova? Be ọle re ọnan ta? (Jọni 17:​6, 26)

³ Bhi ọne erọnmhọn nin Jesu nan, ọle da yọle: “Mẹn rẹkpa ele rẹ lẹn elin nọnsẹ.” Bhi ọsi ẹmhọanta, igba eva Jesu yọle ghe ọle rẹkpa edibo nesọle rẹ lẹn elin nọnsi Jehova. (Tie Jọni 17:​6, 26.) Be Jesu re ọnan ta? Elin nin ele bha lẹn ọle be ha man ele le? Ibhokhan Ju edibo nesi Jesu ha khin, bhiriọ, ele bhọ ki ka lẹn elin nọnsi Osẹnobulua fo nọn yi Jehova. Ọne elin nin dagbare igba ne bunbun bhi Baibo nan re urolo Hibru gbẹn. Bhiriọ, ọ i yi elin nọnsi Osẹnobulua Jesu ha man ele le, sokpan, ebi ọne elin nin mundia nan ọle ha man ele le. Ọle wo rẹkpa edibo nesọle rẹ manman lẹn Jehova nọnsẹn rẹ dọ sẹbhi iho nọnsọle, iwẹnna obọ nesọle bi ikpe esili nin ọle mhọn. Jesu wo manman lẹn Jehova nọnsẹn, ọnan zẹle nin ọle da sabọ man edibo nesọle ene emhin nan.

4-5. (a) Be elin nọnsi ọria ha rẹ manman dọ lu uhọnmhọn-emhin yẹ? Re ijiẹmhin ọbhọ (b) Uwedẹ nela edibo nesi Jesu rẹ dọ manman lẹn Jehova yẹ?

⁴ Nan rẹ re ijiẹmhin ọbhọ, nan man yọle ghe iwẹnna dọkitọ ọwanlẹn ọkpa natiọle David bhi agbotu nọnsẹ lu. Ikpe ne bunbun ọ ki ye nian nin uwẹ lẹn ọne obhio mhan nan. Ọkpakinọn ẹdẹ ọkpa, uwẹ da ha khọnmhọn emianmhẹn iguaguako. A da mun uwẹ diọbhi họspita nin ọne obhio mhan da wẹnna. Ọle da wo noo ebi ọle guẹle rẹ hinmhin uwẹ. Uwẹ da kie dọ manman hoẹmhọn ọlẹn ranmhude ebi ọle lu nin uwẹ. Ẹghe-ẹghe nin uwẹ rẹ hẹnmhọn elin nọnsọle, uwẹ ki wo ha yere ebi ọle lu nin uwẹ. Ranmhude ọnan, ọ i yẹ yi ọwanlẹn ọkpa David ki khin rẹji uwẹ bhi agbotu, ọkpakinọn, dọkitọ ọle yẹ khin rẹji uwẹ, ranmhude nin ọle rẹ miẹn uwẹ fan.

⁵ Iriọ sẹyẹ nọn, edibo nesi Jesu ka lẹn elin nọnsi Jehova fo. Ọkpakinọn, ọne elin nan kie wo dọ manman lu uhọnmhọn-emhin rẹji ele ranmhude Jesu rẹkpa ele rẹ manman dọ lẹn Jehova nọnsẹn. Bezẹle nin mhan da ta iriọ? Ranmhude, Jesu wo re unan ọria nin Aba ọle gene khin man bhi uwedẹ nin ọle rẹ ha talọ bi bhi uwedẹ nin ọle rẹ ha lu emhin. Bhiriọ, edibo nesọle da wo dọ lẹn Jehova nọnsẹn ranmhude nin ele rẹ ha gbẹlokotọ bhi uwedẹ nin Jesu rẹ man emhin bi uwedẹ nin ọle rẹ ne ẹbho lu emhin.—Jọni 14:9; 17:3.

“ELIN NỌNSẸ NIN UWẸ TIE MUN MẸN”

6. Be Jesu ha tẹmhọnlẹn bhi ẹghe nin ọle rẹ yọle ghe a tie elin nọnsọle mun ọsi Jehova? (Jọni 17:​11, 12)

⁶ Bhi erọnmhọn nin Jesu nan, ọle da nan erọnmhọn nin edibo nesọle, ọle da yọle: “Gbẹloghe ele ranmhude elin nọnsẹ nin uwẹ tie mun mẹn.” (Tie Jọni 17:​11, 12.) Ọnan ki be rẹman ghe a dẹ sabọ ha tie Jesu Jehova? Eye. Gbẹlokotọ bhọ ghe bhi erọnmhọn nin Jesu nan, ọle da ta ọnan rẹji elin nọnsi Jehova. Ọle da yọle “elin nọnsẹ.” Bhiriọ, Jesu bha yọle ghe elin nọnsi Jehova ki hi elin nọnsọle. Be Jesu ki re ọle ta bhi ẹghe nin ọle rẹ yọle ghe a tie ọle mun elin nọnsi Aba ọle? Bhi ọsi ẹmhọanta, Jesu hi ọria nin Jehova re mundia nọn ha nanlẹn nin ẹbho talọ. Ọle da vae dọ mundia nin elin nọnsi Jehova, yẹ re ọne elin ha lu emhin ọhan-ilo kẹkẹ. (Jọni 5:43; 10:25) Rẹ deba ọnin, ebe elin nọnsi Jesu mundia na hi “Jehova hi umiẹnfan.” Bhi ọsi ẹmhọanta, ebe elin nọnsi Jesu mundia nan yẹ wo diẹn mun elin nọnsi Jehova.

7. Be Jesu ha rẹ sabọ mundia nin Jehova yẹ? Re ijiẹmhin ọbhọ.

⁷ Nin mhan rẹ sabọ lẹn otọ ebezẹle nin Jesu ha da sabọ ha talọ nin Jehova, bha ji mhan fẹ ọne ijiẹmhin nan ghe. Ọria nọn gbẹloghe dẹ sabọ ji ọria nọn dọ mundia nanlẹn, yẹ nanlẹn ne ẹbho ha talọ. Bhiriọ, ọta nin ọne ọria ha ta dẹ yẹ ha mhọn ahu bọsi ọnọn ji ọle nọn gbẹloghe. Iriọ yẹ nọn, Jesu wo mundia nin Jehova yẹ nin Jehova ne ẹbho nọnsọle ha talọ.—Mat. 21:9; Luk 13:35.

8. Be Jesu ka rẹ mundia nin Jehova yẹ ọkuẹsẹ ọle vae bhi ọne otọ nan? (Exodus 23:​20, 21)

⁸ Baibo da tie Jesu ọne Ọta ranmhude ọle Jehova ha noo rẹ taman ene ẹhi bi eria ebi ọle guanọ nin ele lu. (Jọni 1:​1-3) Asabọmiẹn Jesu hi ọne ẹhi nin Jehova je nọn dọ gbẹloghe ibhokhan Izrẹl bhi ẹghe nin ele rẹ ha ribhi ojẹgbo. Bhi ẹghe nin Jehova rẹ ha taman ibhokhan Izrẹl nin ele re obọ rẹkhan ebi ọne ẹhi taman ele, ọle da yọle: “Imẹn je ọle re.”a (Tie Exodus 23:​20, 21.) Jehova da ta ọnan ranmhude ọle hi ọnọn je Jesu re nọn dọ mundia nanlẹn. Sẹyẹ, Jesu hi ọria nọn manman rẹman ghe emhin rebhe nin Jehova lu gbamhin, sẹyẹ ọle khiamhin.

“ABA RE UYI NIN ELIN NỌNSẸ”

9. Be elin nọnsi Jehova lu uhọnmhọn-emhin sẹ yẹ rẹji Jesu? Gbotọle fanọn an.

⁹ Beji mhan sẹ zilo ọle, mhan dọ kere ghe elin nọnsi Jehova wo manman lu uhọnmhọn-emhin rẹji Jesu ọkuẹsẹ ọle vae bhi ọne otọ nan. Ọnan zẹle nan da miẹn ghe beji ọle ribhi ọne otọ nan, ọle da wo ha rẹman bhi emhin rebhe nin ọle lu ghe elin nọnsi Jehova manman lu uhọnmhọn-emhin nẹ rẹji ọle. Ọ ki kẹ khere nin Jesu rẹ lu iwẹnna itẹmhọn Osẹnobulua fo nin ọle ha lu bhi ọne otọ nan, ọle da taman Aba ọle yọle: “Aba re uyi nin elin nọnsẹ.” Ẹjẹje, Aba ọle da na bhi okhun re ukpuru nọn deziẹn rẹ wanniẹn ọlẹn yọle: “Mẹn ka re uyi nin elin nọnsẹmhẹn, mẹn dẹ yẹ kie lu ọle.”—Jọni 12:28.

10-11. (a) Be Jesu rẹ re uyi nin elin nọnsi Jehova yẹ? (Yẹ fẹ ifoto ghe.) (b) Bezẹle nọn da khẹke nan kpe elin nọnsi Jehova khia yẹ rẹman ghe emhin rebhe nin ọle lu gbamhin?

¹⁰ Jesu tobọle yẹ re uyi nin elin nọnsi Aba ọle. Be ọle rẹ lu ọle yẹ? Uwedẹ ọkpa nin ọle rẹ lu ọnan hi, nin ọle rẹ ji ẹbho lẹn ikpẹ esili nin Aba ọle mhọn, bi emhin ọhan-ilo kẹkẹ nin ọle lu. Ọrẹyiriọ, ọle da yẹ lu emhin ọbhebhe rẹ re uyi nin elin nọnsi Aba ọle. Ọ da khẹke nin Jesu rẹman ghe emhin rebhe nin Jehova lu gbamhin, sẹyẹ elin nọnsọle khiamhin. Jesu da rẹman ebi ọnan lu uhọnmhọn-emhin sẹ yẹ bhi erọnmhọn nin ọle man edibo nesọle le. Ọle da yọle: “Aba mhan nọn ribhi okhun, ji ẹbho rebhe kpe elin nọnsẹ khia.”—Mat. 6:9.

¹¹ Bezẹle nọn da khẹke nan kpe elin nọnsi Jehova khia, yẹ rẹman ghe emhin rebhe nin ọle lu gbamhin? Ranmhude ebe sunu bhi ogba ọsi Idẹn. Bhi enin, Esu da bha Osẹnobulua nin Jehova ohoghe. Ọle da yọle ghe ọbhahoghe Jehova khin, sẹyẹ, ọle i guanọ ọmhẹn ọsi Adam bi Ivi. (Gen. 3:​1-5) Esu da yẹ yọle ghe uwedẹ nin Jehova rẹ lu emhin bha gba. Ọne emhin nan nin Esu lu da wo re itọn sin elin nọnsi Jehova. Akizẹbue bhi ẹghe nọnsi Jobu, Esu da gbo yọle ghe ranmhude emhin nin ẹbho miẹn bhi obọ Jehova zẹle ghe ele ga ọle. Ebi ọle ta nan da wo rẹman ghe eria bha re ọkhọle rebhe hoẹmhọn Jehova, ghe ele dẹ zẹ Jehova obọ bhi ẹghe ekpokpo. (Job 1:​9-11; 2:4) Ọnan dẹ wo manman re ẹghe nan rẹ gene lẹn ọnọn bha ohoghe, si Jehova nọn la Esu.

MẸN ZẸ IẸNLẸN NỌNSẸMHẸN OBỌ

12. Be Jesu muegbe nin ọle rẹ lu ranmhude oyẹẹ nin ọle mhọn da elin nọnsi Jehova?

¹² Ranmhude oyẹẹ nin Jesu mhọn da Jehova, ọ da wo ha ghọn Jesu nin ọle rẹ lu eka nin ọle ha sabọ lu rẹ kpe elin nọnsi Jehova khia, yẹ rẹman ghe emhin rebhe nin Jehova lu gbamhin. Jesu da yọle: “Mẹn re iẹnlẹn nọnsẹmhẹn fia.” (Jọni 10:​17, 18) Bhi ọsi ẹmhọanta, ọle da wo muegbe nin ọle rẹ yu beji ọle ha da sabọ kpe elin nọnsi Jehovab khia. Adam bi Ivi ne yi eria ọhẹnhẹn nin Jehova ka man da fikekegbe Jehova, ele da deba Esu. Jesu bha diabe ele. Ọle da wo muegbe nin ọle rẹ vae bhi ọne otọ nan yẹ rẹman ghe ọle hoẹmhọn Jehova. Jesu da wo gene re ọnan man bhi uwedẹ nin ọle rẹ ha nyẹn iẹnlẹn esili yẹ hẹnmhọn nin Jehova. (Hib. 4:15; 5:​7-10) Ọle da wo gene mundia nin Jehova rẹ dọ sẹbhi ẹdẹ nin ọle yu uyumhin oya bhi okhun eran nan khan ọle i. ( Hib. 12:2) Ọne emhin nan nin ọle lu ọle rẹ rẹman ghe ọle gene hoẹmhọn Jehova bi Elin nọnsọle.

13. Bezẹle nan da miẹn ghe Jesu hi ọria nọn ha sabọ rẹman ghe ọbhahoghe Esu khin? (Yẹ fẹ ifoto ghe.)

¹³ Emhin rebhe nin Jesu lu bhi iẹnlẹn nọnsọle wo rẹman ghe Esu hi ọne ọbhahoghe, ọ i yi Jehova! (Jọni 8:44) Jesu hi ọnọn lẹn Jehova nẹ gbera ọria nọn hi ki rẹ khin nọn sẹ nyẹnlẹn. Sade ẹmhọanta ribhi ebi Esu tale rẹji Jehova nọn, Jesu ha rẹ sabọ lẹn. Ọkpakinọn, Jesu da wo muegbe nin ọle rẹ kpe elin nọnsi Jehova khia. Ẹghe nọn rẹ diabe ghe Jehova fikekegbe Jesu, Jesu bha fikekegbe Aba ọle. Ọle da wo muegbe nin ọle rẹ yu.—Mat. 27:46.c

“MẸN MIẸN ẸSỌN NIN UWẸ MUN NIN MẸN FO”

14. Be Jehova rẹ nan erọnmhọn nin Jesu yẹ ranmhude uwedẹ nin ọle rẹ sun rẹkhan ọlẹn?

¹⁴ Bhi erọnmhọn nin Jesu nan bhi ọne ukpasọn ọkuẹsẹ ọle yu, ọle da yọle: “Mẹn miẹn ẹsọn nin uwẹ mun nin mẹn fo.” Jesu wo ha mhọnlẹn bhi ọkhọle ghe Jehova dẹ re ihaosa nanlẹn nin ọle rẹ sun rẹkhan ọlẹn. (Jọni 17:​4, 5) Nin Jesu rẹ mun udu nyan Aba ọle bha ha yi ihoho, ranmhude Jehova bha gene ye Jesu a bhi ẹghe nin ọle rẹ ha ribhi idin. (Iwẹn. 2:​23, 24) Jehova da riọ Jesu kpanọ, yẹ re ọle bhi ihe kpataki bhi okhun. (Fil. 2:​8, 9) Akizẹbue, Jesu da ha yi Ojie bhi Agbejele nọnsi Osẹnobulua, yẹ ha gbẹloghe. Emhin nela ọne Ejele nan ha lu? Obọ nọnkẹle bhi erọnmhọn nin Jesu man edibo nesọle le da yọle: “Ji Agbejele nọnsẹ vae. Ji a ha lu iho nọnsẹ [Jehova] bhi ọne otọ nan beji a rẹ lu ọle bhi okhun.”—Mat. 6:10.

15. Emhin ebhebhe nela Jesu ha lu?

¹⁵ Bhi ẹghe odalo, Jesu dẹ mun okhọn bu eghian nọnsi Osẹnobulua yẹ dunmhun eria ọbe a bhi okhọn Amagẹdọn. (Arẹm. 16:​14, 16; 19:​11-16) Jesu ha ki lu ọnin fo, ọle ki mun Esu ọbhi “uhio nọn imhọn ọkpẹnlẹn,” ọle i da yẹ sabọ ha lu emhin soso. (Arẹm. 20:​1-3) Bhi ọne ẹghe Ikpe Uli nin Jesu ha rẹ gbẹloghe, ọfure ki gba ọne otọ nan, sẹyẹ, ọrebhe ki ha yi eria ne gbale. Ọle dẹ riọ ene yu kpanọ, yẹ re ọne otọ nan kiẹn otọ ọfubhegbe. Bhi ọne ẹghe nin, iho nọnsi Jehova ki munsẹ!—Arẹm. 21:​1-4.

16. Be ha sunu sade Ikpe Uli nin Jesu ha rẹ gbẹloghe sotọ?

¹⁶ Be ha ki sunu sade Ikpe Uli nin Jesu ha rẹ gbẹloghe sotọ? Olukhọ i da yẹ ha ribhọ, sẹyẹ, ọrebhe ki kiẹn eria ne gbale. Eria i yẹ da ha bhii Jehova nọn rẹhunmhan olukhọ nọnsele, ranmhude izọese nọnsi Jesu lu ọle fo. Ele i da yẹ ha guanọ ọsuọnmhan la ohẹn nọn ha rẹkpa ele rẹ manman sikẹ Osẹnobulua. Sẹyẹ, “a ki gbe uu nin oghian mhan nọn kike khuelo sẹsẹsẹ.” Ọria soso i da yẹ ha ribhi idin. Bhi ọne ẹghe nin, a ki riọ ene yu kpanọ dọ ha nyẹnlẹn. Ọ ki wo gba nin ọrebhe bhi ọne otọ nan.—1 Kọr. 15:​25, 26.

17-18. (a) Be ha sunu bhi ẹghe nin Ikpe Uli nin Jesu ha rẹ gbẹloghe ha rẹ sotọ? (b) Be Jesu ha lu yẹ sade ugbẹloghe nọnsọle sotọ? (1 Kọrint 15:​24, 28) (Yẹ fẹ ifoto ghe.)

¹⁷ Emhin ọbhebhe nela ha sunu sade Ikpe Uli nin Jesu ha rẹ gbẹloghe sotọ? Emhin kpataki dẹ sunu bhi ọne ẹghe nin. A i da yẹ miẹn ọria soso nọn ha mhọn edandan si Jehova gbẹloghe nọnsẹn, la si ọle khiamhin. Bezẹle? Bhi ogba ọsi Idẹn, Esu da yọle ghe ọbhahoghe Jehova khin, sẹyẹ, ghe ọ i yi oyẹẹ Jehova rẹ gbẹloghe ẹbho nesọle. Bhiriọ, bhi ẹghe nin Ikpe Uli nin Jesu ha rẹ gbẹloghe ha rẹ sotọ, a ki kpe elin nọnsi Jehova khia fo sẹsẹsẹ. Bhi ọne ẹghenin, ọ ki khia bhi ẹlo a ghe, Aba nọn gene mhọn oyẹẹ Jehova khin.

¹⁸ Ẹghe nin Ikpe Uli nin Jesu ha rẹ gbẹloghe ha rẹ sotọ, ọrebhe ki dọ lẹn ghe ohoghe Esu bha Jehova le. Be Jesu ha lu sade ọ bu ẹghe nin ugbẹloghe nọnsọle ha rẹ sotọ? Ọle dẹ be re egbe khọkhọ Esu, yẹ sọtẹ da Jehova? Eye! (Tie 1 Kọrint 15:​24, 28.) Jesu dẹ mun ọne Ejele fikie nin Aba ọle. Ọle dẹ re obọ bhi ugbẹloghe nọnsi Jehova. Bhi ọsi ẹmhọanta, Jesu bha diabe Esu. Jesu wo muegbe nin ọle rẹ zẹ emhin rebhe obọ nin Jehova ranmhude oyẹẹ nin ọle mhọn da ọle.

19. Be elin nọnsi Jehova lu uhọnmhọn-emhin sẹ yẹ rẹji Jesu?

¹⁹ Edandan i ribhọ ghe ọnan bhọ zẹle nin Jehova da tie elin nọnsọle mun elin nọnsi Jesu. Jesu wo re unan ọria nin Aba gene khin man. Bhiriọ, be elin nọnsi Jehova lu uhọnmhọn-emhin sẹ yẹ rẹji Jesu? Ọ wo manman lu uhọnmhọn-emhin rẹji ọle bhi emhin rebhe. Jesu da wo muegbe nin ọle rẹ yu nin ọne elin nin. Sẹyẹ, ọle wo muegbe nin ọle rẹ mun emhin rebhe Jehova obọ sade ẹghe nin Ikpe Uli nin ọle ha rẹ gbẹloghe sotọ. Be mhan ha rẹ sabọ re obọ rẹkhan ijiẹmhin nọnsi Jesu yẹ? Mhan dẹ miẹn ewanniẹn rẹji ọne inọnta nan bhi uhọnmhọn-ọta nọn ki sẹ ọle bhi egbe.