Bezẹle Nọn Da Khẹke Nin Mhan Ha Mun Ofẹn Jehova?

1-2. Beji Psalm 25:14 rẹman, be ọkhẹke nin mhan lu sade mhan ho nin mhan deba Jehova ha mhọn ikolu nọn ziẹn?

IKPẸ nela uwẹ riale ọkhẹke nin ọria ha mhọn sade ọle ho nin ọle deba ọria ha mhọn ikolu nọn ziẹn? Uwẹ sabọ rẹ yọle ghe ọkhẹke nin imọẹ ọsaje hoẹmhọn egbe, yẹ ha re iyobọ nin egbe. Asabọmiẹn uwẹ ida ha riale ghe emhin nọn khẹke nọn nin imọẹ rẹ ha mun ofẹn egbe. Ọkpakinọn, beji Baibo nọn mun ọne uhọnmhọn-ọta nan mhọn rẹman, ọkhẹke nin ẹbho ne guano ne deba Jehova ha mhọn ikolu nọn ziẹn ha mun ofẹn ọlẹn.—Tie Psalm 25:14.

² Ebi ọ hi ki rẹ bue sẹ yẹ nin mhan mọn da ga Jehova, ọkhẹke nin mhan ha mun ofẹn ọlẹn. Ọkpakinọn, be a re ọle ta nan rẹ ha mun ofẹn Osẹnobulua? Be imhan ha rẹ sabọ ha mun ofẹn Jehova yẹ? Be imhan ha sabọ miẹn luẹ bhi obọ Obedaya, Jehoada nin Ojohẹn, bi Jehoash nin Ojie rẹji nan rẹ ha mun ofẹn Osẹnobulua?

BE A RE ỌLE TA NAN RẸ HA MUN OFẸN OSẸNOBULUA?

3. Tẹmhọn emhin eso ne re mhan mun ofẹn, bi ebi ọne ofẹn rẹ gbega mhan yẹ.

³ Ofẹn sabo rẹ ha mun mhan sade mhan lẹnmhin ghe emhin dẹ sabọ kuan mhan. Ofẹn nọn sẹnian mhẹnmhin ranmhude ọ dẹ sabọ rẹkpa mhan rẹ ze emhin nọn mhẹn rẹ lu. Ofẹn ghe mhan dẹ sabọ kpo dere, re mhan rẹ ẹwanlẹn re oẹ ọbhi otọ sade mhan na eji bha riẹriẹ. Ofẹn ghe mhan dẹ sabọ gbitẹ dẹ re mhan nẹ bhi emhin ne ha sabọ kuan mhan. Ofẹn ghe mhan dẹ sabọ riia ikolu nin mhan bi ọria nin mhan hoẹmhọnlẹn ko mhọnlẹn an re mhan rẹban ọta bi emhin ne ha sabọ khọ ọle bhi ẹke.

4. Unan ofẹn nela Esu guanọ nin mhan ha mhọn da Jehova?

⁴ Esu guanọ nin ẹbho ha mun ofẹn Jehova bhi uwedẹ nọn bha gba. Esu guanọ nin ẹbho ha riale ghe ohu ọkpa wo re Jehova, ghe ọle guanọ nin ọle re oya nin mhan, sẹyẹ mhan ida sabọ lu emhin ne ti ọle bhọ. (Job 4:18, 19) Esu guanọ nin mhan ha mun ofẹn Jehova rẹ sẹbhọ ghe mhan ki zobọ bhọ rẹ ha ga ọle. Ahamiẹn mhan bha ho nin mhan deọbhi ọne ufi nan, ọkhẹke nin mhan luẹ rẹ ha mun ofẹn Jehova bhi uwedẹ nọn khẹke.

5. Be a re ọle ta nan rẹ ha mun ofẹn Osẹnobulua?

⁵ Ọria nọn mun ofẹn Osẹnobulua ki hoẹmhọn ọlẹn. Sẹyẹ, ọle ki ha re egbe nẹ bhi emhin nọn hi ki rẹ khin nọn ha sabọ riia ikolu nin ọle bi Jehova ko mhọnlẹn an. Jesu wo ha mhọn unan ofẹn nọn sẹnian. (Heb. 5:7) Ẹghe bha ha ribhọ nin ọle rẹ ha guọ ranmhude Jehova. (Isa. 11:2, 3) Sokpan, ọle wo ha mhọn oyẹẹ nọn dinmhin da Jehova. Ọnan da wo re ọle ha hẹnmhọn nanlẹn. (John 14:21, 31) Bọsi Jesu, mhan mun ekpẹn nọn dinmhin nin Jehova ranmhude mhan lẹnmhin ghe Osẹ nọn mhọn oyẹẹ, nọn manman mhọn ahu, nọn lu emhin bhi uwedẹ nọn gbale yẹ wanlan ọle khin. Mhan lẹnmhin ghe Jehova manman hoẹmhọn mhan, sẹyẹ ẹlo nin mhan rẹ ghe uhi nesọle rẹso ọle. Ọ ba Jehova bhi egbe sade mhan bha hẹnmhọn nanlẹn. Sokpan, ọ re ọle ghọnghọn sade mhan hẹnmhọn nanlẹn.—Ps. 78:41; Prov. 27:11.

MHAN DẸ SABỌ LUẸ RẸ HA MUN OFẸN OSẸNOBULUA?

6. Uwedẹ ọkpa nela mhan ha rẹ sabọ luẹ rẹ ha mun ofẹn Osẹnobulua? (Psalm 34:11)

⁶ Ọ iyi osukpa ọria rẹ wo munhẹn ha mun ofẹn Jehova; emhin nin mhan ha luẹ nọn. (Tie Psalm 34:11.) Emhin ọkpa nọn ha rẹkpa mhan lu ọnan hi, mhan ki ha gbẹlokotọ bhi emhin nin Osẹnobulua manlẹn. Beji mhan ha rẹ manman ha daghe ẹwanlẹn, ahu, bi oyẹẹ nọn dinmhin nin ọle mhọn da mhan bhi emhin nin ọle manlẹn, iriọ oyẹẹ bi ekpẹn nin mhan mhọn da ọle ha rẹ manman ha tuẹn okhun. (Rom. 1:20) Obhio mhan nin okhuo natiọle Adrienne da yọle: “Ẹwanlẹn nọnsi Jehova nin mẹn daghe bhi emhin nin ọle manlẹn manman wo rẹso mẹn. Ọ yẹ rẹkpa mẹn rẹ lẹn ghe ọle lẹn emhin ne ha mhẹn mẹn bhi egbe.” Emhin nin ọle ria eria nyan da rẹkpa ọle rẹ ta ọnan, “Bezẹle nin mẹn ha da ha ho nin mẹn lu emhin nọn ha de idobolo ọbhi ikolu nin mẹn bi Jehova ko mhọnlẹn nọn re iẹnlẹn nin mẹn?” Uwẹ dẹ sabọ re ẹghe eso bhi ẹkẹ ọne uzana nan rẹ ria eria nyan emhin eso nin Osẹnobulua manlẹn? Uwẹ ha lu iriọ, ọ ki rẹkpa uwẹ rẹ ziẹn oyẹẹ nin uwẹ mhọn da Jehova, yẹ wo ha mun ekpẹn nanlẹn.—Ps. 111:2, 3.

7. Be erọnmhọn ha rẹ sabọ rẹkpa mhan yẹ rẹ ha mhọn unan ofẹn nọn khẹke da Jehova?

⁷ Uwedẹ ọbhebhe nin mhan ha rẹ sabọ ha mun ofẹn Jehova hi, nin mhan rẹ ha nan erọnmhọn ẹghe rebhe. Mhan da ha lu iriọ, ọ ki rẹkpa mhan rẹ ha ghe Jehova bii ọmọẹ. Ẹghe-ẹghe nọn hi ki rẹ khin nin mhan rẹ bhii Jehova nin ọle rẹ ahu nin mhan rẹ sabọ ziẹngbe ọnọghọ, ọ ye mhan re ghe Osẹnobulua manman mhọn ahu. Ẹghe-ẹghe nin mhan rẹ khuẹnmhẹn ọlẹn bhi izọese ọsi Ọmọn nọnsọle, ọ ye mhan re ghe Jehova manman hoẹmhọn mhan. Mhan ha bhii Jehova nin ọle rẹkpa mhan sade mhan ribhi ọnọghọ, mhan ye egbe mhan re ghe Jehova manman wanlan. Erọnmhọn ne sẹnian rẹkpa mhan rẹ manman ha mun ekpẹn nin Jehova. Ọ yẹ rẹkpa mhan rẹ rẹban emhin nọn hi ki rẹ khin nọn ha sabọ riia ikolu nin mhan bi ọle ko mhọnlẹn an.

8. Be ha rẹkpa mhan rẹ wo ha mun ofẹn Osẹnobulua?

⁸ Mhan yẹ luẹ rẹ ha mun ofẹn Osẹnobulua sade mhan luẹ emhin bhi ijiẹmhin ọsi ẹbho bhi Baibo ne lu emhin ne mhẹn bi emhin ne imhẹn. Bha ji mhan zilo nyan ijiẹmhin ọsi ikpea eva ne ga Jehova nọnsẹn. Ọhẹnhẹn, Obedaya nọn gbẹloghe uwa ọsi Ehab nin Ojie, bi Jehoada nin Ojohẹn. Sẹyẹ, mhan ki fẹ ebi mhan ha sabọ miẹn luẹ bhi obọ Jehoash nin Ojie ọsi Juda nọn wo rẹ ha ga Jehova nọnsẹn akizẹbue ọle da fikeke gbe ọle.

HA MHỌN IZEBHUDU BII OBEDAYA

9. Be ofẹn Jehova nin Obedaya ha mhọn re ọle lu? (1 Kings 18:3, 12)

⁹ Inian Baibo rẹ munhẹn tẹmhọn Obedayab: “Obedaya manman wo mun ofẹn Jehova.” (Tie 1 Kings 18:3, 12.) Be ofẹn Osẹnobulua nin Obedaya ha mhọnlẹn re ọle lu? Ọ da re ọle ha yi ọria nan sabọ gbaẹkẹ ọle, bi ọria nọn ta ẹmhọanta. Ọnan zẹle nin Ehab nin ojie da mun ọne ẹsọn nanlẹn nin ọle rẹ ha gbẹloghe uwa nọnsọle. (Yẹ fẹ Nehemiah 7:2 ghe.) Sẹyẹ, ofẹn Osẹnobulua nin Obedaya ha mhọnlẹn da rẹkpa ọle rẹ manman ha mhọn izebhudu—ikpẹ nọn wo gene khẹke nin ọle ha mhọnlẹn. Ẹghe nin Ehab rẹ ha gbẹloghe Obedaya rẹ nyẹnlẹn. Ehab wo lu emhin ebe bhi ẹlo nọnsi Jehova gbera ene ijie ne ka gbẹloghe ọkuẹsẹ ọle bhi egbe. (1 Ki. 16:30) Okhuo ọle nin Jezibẹl nọn ga Bel he Jehova sẹbhọ ghe, ọle da ha ho nin ọle fuẹn ọrebhe ne ga Jehova sibhi otọ Izrẹl re. Ọle bhọ da gbono akhasẹ ne bunbun nesi Osẹnobulua a. (1 Ki. 18:4) Bhi ọsi ẹmhọanta, ẹghe nin otọ bha rẹ fure, ọle Obedaya rẹ ga Jehova.

10. Be Obedaya rẹ re izebhudu man yẹ?

¹⁰ Be Obedaya rẹ re izebhudu man yẹ? Ẹghe nin Jezibẹl rẹ munhẹn ha guanọ akhasẹ nesi Osẹnobulua khian beji ọle ha da gbono ele a, Obedaya da ne itue 100 bhi ẹwẹ ele, yẹ gha ele ọbhi usun eva dọ ne ele he bhi ẹlẹ udo. Ọle da wo ha muno brẹdi bi amẹn ji ele. (1 Ki. 18:13, 14) Jezibẹl ha lẹn sẹbhọ ghe Obedaya lu emhin nọn sẹnian, ọ ki gbe ọle a. Bhi ọsi ẹmhọanta, Obedaya bha ho nin ọle yu. Ọkpakinọn, ọle hoẹmhọn Jehova bi ẹbho ne ga Ọle gbera iẹnlẹn nọnsọle.

11. Be eguọmhandia nesi Jehova ẹlẹnan rẹ ha re egbe khọkhọ Obedaya yẹ? (Yẹ fẹ ifoto ghe.)

¹¹ Ẹlẹnan nian, ene bunbun bhi eguọmhandia nesi Jehova nyẹnlẹn bhi agbaẹbho nan da mun idobolo ọbhi iwẹnna oga nọnsẹmhan. Ene ibhio mhan nan mun ekpẹn nin ene gbẹloghe. Ọkpakinọn, bọsi Obedaya, ele yẹ wo re oga nọn khẹke Jehova ji ọle. (Matt. 22:21) Ele hẹnmhọn nin Jehova gbera eria, nin ele rẹ rẹman ghe ele mun ofẹn ọlẹn. (Acts 5:29) Ele lu ọnan bhi uwedẹ nin ele rẹ dọnmhegbe rẹ ha tẹmhọn Osẹnobulua, bi uwedẹ nin ele rẹ re ẹwanlẹn si egbe koko rẹ do ikolo. (Matt. 10:16, 28) Ele dọnmhegbe rẹ rẹkpa ibhiọ ele rẹ ha mhọn emhin ne ha rẹkpa ele rẹ manman sikẹ Jehova. Bha ji mhan fẹ ijiẹmhin ọsi Henri ghe nọn nyẹnlẹn bhi otọ Africa, bhi eji a da mun idobolo ọbhi iwẹnna oga nọnsẹmhan bhi ẹgheso. Bhi ọne ẹghe nan, Henri da zegbere nin ọle rẹ ha gha ebe nesẹmhan nin ibhio ọle nin ele ko ga. Ọle da yọle: “Ọria nin ẹkhọ lo mẹn khin, bhiriọ, mẹn rẹọbhọ ghe ekpẹn nọn dinmhin nin mẹn mhọn da Jehova re izebhudu nin mẹn rẹ sabọ lu ọnan.” Uwẹ be ghe egbe uwẹ bii ọria nọn ha sabọ re izebhudu man beji Henri lu? Uwẹ dẹ sabọ lu bii ọle sade uwẹ wo ha mun ofẹn Jehova.

SUN RẸKHAN JEHOVA BEJI JEHOADA NIN OJOHẸN LU

12. Be Jehoada nin Ojohẹn bi okhuo ọle rẹ sun rẹkhan Jehova yẹ?

¹² Jehoada nin Ojohẹn wo ha mun ofẹn Jehova. Ọnan da rẹkpa ọle rẹ sun rẹkhan Jehova, yẹ rẹ rẹkpa ẹbho ebhebhe rẹ ha ga ọle. Mhan wo daghe ọnan bhi ẹghe nin ọmọn okhuo ọsi Jezibẹl natiọle Atalaya rẹ ha ho nin ọle re idudu rẹ re egbe ọle kiẹn ojie bhi Juda. Ene ẹbho wo ha mhọn emhin ne ha re ele ha mun ofẹn Atalaya. Ọle wo manman gbin bhi ọkhọle yẹ guanọ ahu sẹbhọ ghe, ọle da muegbe nin ọle rẹ fuẹn ọrebhe a ne na bhi ulin uwa ọsi ojie vae, rẹ sẹbhi ọmọn eyẹ nọnsọle. (2 Chron. 22:10, 11) Jehoash nọn yi ọkpa bhi ene imọn da miuhọnmhọn ranmhude Jehoshabiat nọn yi okhuo Jehoada da re ọle nẹgbe. Jehoshabiat bi ọdọ ọle da re ọne ọmọn nẹhe yẹ gbẹloghe ọle. Bhiriọ, ele veva da lu ọle beji a ha da miẹn ghe, ọria nọn na bhi ulin uwa ọsi Devid vae ki ha ribhọ nọn ha gbẹloghe. Jehoada wo sun rẹkhan Jehova, ọle bha ha mun ofẹn ranmhude Atalaya.—Prov. 29:25.

13. Ẹghe nin Jehoash rẹ ha ribhi ikpe ihinlọn, be Jehoada rẹ gbo kie re asun-rẹkhan man yẹ?

¹³ Ẹghe nin Jehoash rẹ ha ribhi ikpe ihinlọn, Jehoada da gbo kie re asun-rẹkhan nin ọle mhọn da Jehova man. Ọle da mhanmhan emhin nin ọle ho nin ọle lu. Ọne emhin ha deọbhọ, Jehoash nọn gene na bhi ulin uwa ọsi Devid vae ki kiẹn ojie. Ọkpakinọn, ahamiẹn ọne emhanmhan bha kiọnlẹn, asabọmiẹn Jehoada ki re uhọnmhọn ọbhọ. Jehova da re ọne emhanmhan kiọnlẹn. Jehoada bi ene ekhamhọn rẹ deba ene Livai da re Jehoash kiẹn ojie, yẹ gbe Atalaya a. (2 Chron. 23:1-5, 11, 12, 15; 24:1) Ọle ki lu ọnan fo, ọle da re ọne ojie bi ene ẹbho rẹ deba Jehova ve akovẹn, ghe ele dẹ wo ha ga Jehova khian. (2 Ki. 11:17) Jehoada da yẹ wo ne ẹbho ọbhọ ne ha khẹ igeti ọsi uwa oga nọnsi Jehova beji a ha da miẹn ọria nọn bha khia bha nabhọ.—2 Chron. 23:19.

14. Be a rẹ mun ekpẹn Jehoada bhi egbe yẹ nin ọle rẹ mun ekpẹn nin Jehova?

¹⁴ Jehova ka ta ọle ọbhi otọ ghe, ene mun ekpẹn nanlẹn ọle da mun ekpẹn nan. Ọle da wo gene re ọnan man bhi egbe Jehoada. (1 Sam. 2:30) Bhi ọsi ijiẹmhin, ọle da ji a gbẹn emhin esili nin Jehoada lu ọbhi Baibo, beji mhan ha da miẹn emhin luẹ bhọ. (Rom. 15:4) Sẹyẹ, ẹghe nin Jehoada ki rẹ yu, a da mun ekpẹn kpataki ọle bhi egbe dọ re ọle tọ “deba enijie bhi agbaẹbho ọsi Devid, ranmhude ọle wo lu emhin esili bhi otọ Izrẹl bhi ẹmhọn Osẹnobulua ọsi ẹmhọanta bi uwa Nọnsọle.”—2 Chron. 24:15, 16.

15. Be imhan ha sabọ miẹn luẹ bhi okha ọsi Jehoada? (Yẹ fẹ ifoto ghe.)

¹⁵ Okha ọsi Jehoada dẹ sabọ rẹkpa mhan rebhe rẹ ha mun ofẹn Osẹnobulua. Ene ewanlẹn dẹ sabọ re egbe khọkhọ Jehoada sade ele wo ha guanọ uwedẹ kẹkẹ nin ele ha rẹ ha gbega ibhio ele. (Acts 20:28) Ijiẹmhin ọsi Jehoada dẹ sabọ rẹkpa ene wanre rẹ lẹn ghe, ele ha sun rẹkhan Jehova yẹ ha mun ofẹn ọlẹn, ọle ki noo ele rẹ lu iho nọnsọle. Ọle ire ẹlo gbe ele a. Ene usẹn dẹ yẹ miẹn emhin luẹ bhi uwedẹ nin Jehova rẹ nin Jehoada lu emhin. Ọkhẹke nin ele re egbe khọkhọ Jehova bhi uwedẹ nin ele ha rẹ ha re ekpẹn bi idegbere rẹ nin ene wanre lu emhin, manman nọn ene mọn da ga Jehova. (Prov. 16:31) Bhi ọkike ọle, mhan rebhe dẹ miẹn emhin luẹ bhi obọ ene ekhamhọn bi ene Livai ne re iyobọ nin Jehoada. Bha ji mhan wo ha re iyobọ nin ‘ene rẹ mhan khian’ bhi uwedẹ nin mhan ha rẹ ha hẹnmhọn nin ele.—Heb. 13:17.

HẸI RE EGBE KHỌKHỌ JEHOASH NIN OJIE

16. Be rẹman ghe Jehoash nin Ojie iyi ọria?

¹⁶ Jehoada wo rẹkpa Jehoash nin ojie rẹ ha yi ọria esili. (2 Ki. 12:2) Ranmhude ọnan, Jehoash nin ojie da muegbe nin ọle rẹ ha lu emhin ne ti Jehova bhọ. Ọkpakinọn, beji Jehoada ki yu, Jehoash da dọ ha ka imọn ọsi ijie ehọ ne fikeke gbe Jehova. Be ki nabhọre? Ọle bi ẹbho nin ọle gbẹloghe da munhẹn ha ga ẹbọ bi ikazi kẹkẹ. (2 Chron. 24:4, 17, 18) Arẹmiẹn ọnan wo ba Jehova bhi egbe, ọle da sẹyẹ ha ji akhasẹ nesọle bu ele beji ele ha da fikie bu ọle re. Ọkpakinọn, ele bha ka ele ehọ. Sẹyẹ ele bha ka Zẹkaraya nin ọmọn ọsi Jehoada ehọ. Rẹ gbera ghe akhasẹ bi ohẹn nọnsi Jehova Zẹkaraya khin, ibhio ọle bi Jehoash ko khin. Jehoash nin Ojie bhọ da gbe Zẹkaraya a nan miẹn ghe aba ọle bi inẹn ọlẹn zẹle ọle bhọ ribhọ.—2 Chron. 22:11; 24:19-22.

17. Be ki sunu ji Jehoash?

¹⁷ Jehoash nin Ojie da zobọ bhọ rẹ ha mun ofẹn Jehova. Ranmhude ọnan, emhin bha kiọnlẹn nanlẹn. Jehova ka tale ghe, ọle dẹ re obọ oya mun ẹbho ne bha ka hẹnmhọn nanlẹn. (1 Sam. 2:30) Eyokhọnlẹn ọsi Siria ne bha sẹ emhin soso da khọn eyokhọnlẹn ọsi Jehoash ne manman bunbun miotọ, yẹ manman kuan Jehoash tobọle. Eyokhọnlẹn ọsi Siria ki kpanọ fo, ọguamhandia nọnsi Jehoash da gbe ọle a ranmhude nin ọle rẹ gbe Zẹkaraya a. Beji ọle yu, a bha ka re ọle tọ bhi eji a da re ene ijie tọ ranmhude emhin ebe nọnsọle.—2 Chron. 24:23-25; fẹ “son of Barachiah” ghe bhi study note nọn ribhi Matthew 23:35.

18. Beji Jeremiah 17:7, 8 rẹman, be imhan ha lu beji a ha da miẹn mhan bha dọ diabe Jehoash?

¹⁸ Be imhan miẹn luẹ bhi ebe sunu ji Jehoash? Inian Jehoash diabe eran nin iniẹn nọnsọle bha ziẹn bhi otọ, nọn re egbe tẹ oran ọbhebhe nin ọ hẹi dere. Ẹghe nin Jehoada nọn diabe eran nin ọle re egbe tẹ rẹ yu, sẹyẹ, ọle munhẹn ha re ehọ ọbhi ọta ọsi ẹbho ne fikeke gbe Jehova, ọle da de sibhi oga re. Ọne ijiẹmhin nan rẹkpa mhan rẹ lẹn ghe, ọ iyi ranmhude ẹbho bhi azagba-uwa nọnsẹmhan, la bhi agbotu re ijiẹmhin esili ọbhi otọ nin mhan ọkpa ha zẹ nin mhan ha da ha ga Jehova. Nin mhan rẹ sabọ sikẹ Jehova nọnsẹn, ọkhẹke nin mhan ziẹn oyẹẹ bi ekpẹn nin mhan mhọn da ọle. Mhan dẹ sabọ lu ọnan sade mhan tie Baibo ẹghe rebhe, ria eria nyan ebi mhan tie, yẹ nan erọnmhọn.—Tie Jeremiah 17:7, 8; Col. 2:6, 7.

19. Be Jehova guanọ bhi obọ mhan?

¹⁹ Ebi Jehova guanọ bhi obọ mhan bha kpọnọ gbe. Ebi ọle guanọ ribhi Ecclesiastes 12:13. Enin yọle: “Ha mun ofẹn Osẹnobulua ọsi ẹmhọanta, yẹ re obọ rẹkhan uhi nesọle, ranmhude, ọnan hi emhin rebhe nọn khẹke nin eria ha lu.” Ahamiẹn mhan mun ofẹn Osẹnobulua, mhan ki sabọ ziẹngbe emhin nọn hi ki rẹ khin nọn ha sunu bhi ẹghe odalo, yẹ rẹ sabọ sun rẹkhan ọlẹn beji Obedaya bi Jehoada lu. Emhin soso ida ha ribhọ nọn ha sabọ riia ikolu nin mhan bi Jehova ko mhọnlẹn an.