Jehova Dẹ Be Wanniẹn Erọnmhọn Nọnsẹmhẹn?

1-2. Bezẹle nọn ha da sabọ dia mhan bhi egbe ghe Jehova iwanniẹn erọnmhọn nesẹmhan?

“MANMAN ha sọnyẹnmhẹn ranmhude Jehova, ọle dẹ ne emhin rebhe nin ọkhọle nọnsẹ guanọ nin uwẹ.” (Ps. 37:4) Ive nọn mhẹn an khọnan nin Jehova ve nin mhan! Ọkpakinọn, ọ be khẹke nin mhan ha riale ghe Jehova dẹ wo re ẹjẹje re emhin nọn hi ki rẹ khin nin mhan bhii ọle nin mhan? Bezẹle nin ọne inọnta nan da khẹke? Bha ji mhan fẹ ene ijiẹmhin nan ghe. Obhio man nin okhuo nọn bha sẹ bọ ọdọ bhii Jehova nan tie ọle bhi Isiku ọsi Ene Tẹmhọn Agbejele. Ọkpakinọn, ikpe ne bunbun rẹ gbera, a bha tie ọle. Obhio mhan nin usẹn okpea bhii Jehova nin ọle hinmhin ọlẹn bhi emianmhẹn nọn manman kaka nin ọle khọnmhọn, beji ọle ha da sabọ manman ha rẹkpa bhi agbotu. Ọrẹyiriọ, eji a ye a ye. Enebiọmọn bhii Jehova nin ọle rẹkpa imọn nesele rẹ sabọ mundia nọnsẹn bhi oga, ọkpakinọn imọn nesele da zẹ rẹ zobọ bhọ rẹ ha ga Jehova.

² Asabọmiẹn uwẹ tobuwẹ sẹyẹ bhii Jehova emhin, ọkpakinọn ọne emhin bha sẹ sẹ uwẹ obọ. Ranmhude ọnan uwẹ sabọ rẹ dọ ha riale ghe Jehova wanniẹn erọnmhọn ọsi ẹbho nekẹle, sokpan ọle iwanniẹn ọsẹ. Uwẹ sabọ rẹ dọ ha riale ghe uwẹ mhọn eji uwẹ da fiobọdọn. Inian emhin dia obhio mhan natiọle Janiceb bhi egbe. Ọle bi ọdọ ọle da taman Jehova bhi erọnmhọn ebi ọ rẹ manman ghọn ele yẹ rẹ dọ ha ga bhi Bẹtẹ. Janice da yọle: “Mẹn wo manman rẹọbhọ ghe a dẹ kẹ tie mhan bhi Bẹtẹ.” Ọkpakinọn, ikpe ne bunbun rẹ gbera a bha tie ele. Janice da yẹ yọle: “Mẹn bha zẹwẹ ha ghọnghọn, sẹyẹ mẹn bha lẹn ebi mẹn ha lu yẹ. Mẹn da ha ria ẹmhọn emhin nin mẹn lu nọn re ẹkẹ mẹn ha khọ Jehova. Mẹn wo nan erọnmhọn ji ọle igba ne bunbun rẹ taman ọlẹn ebi ọ rẹ ghọn mẹn yẹ rẹ dọ ha ga bhi Bẹtẹ. Bezẹle nin ọle bha da wanniẹn erọnmhọn nọnsẹmhẹn?”

3. Be imhan ha zilo nyan bhi ọne uhọnmhọn-ọta nan?

³ Ẹgheso, mhan sabọ rẹ ha riale si Jehova gene kaẹho erọnmhọn nọnsẹmhan. Eria eso ne manman ga Jehova nọnsẹn bhi ẹghe nọn gbera bhọ yẹ ha mhọn iria-eria nọn sẹ inian. (Job 30:20; Ps. 22:2; Hab. 1:2) Be ha rẹkpa uwẹ rẹ rẹọbhọ ghe Jehova dẹ wanniẹn erọnmhọn nọnsẹ? (Ps. 65:2) Nin mhan rẹ sabọ re ewanniẹn ọbhi ọne inọnta nan, mhan dẹ ka zilo nyan ene emhin nan: (1) Be imhan ha sabọ ha mhọn bhi ọkhọle Jehova dẹ lu nin mhan? (2) Be Jehova guanọ bhi obọ mhan? (3) Bezẹle nọn ha da khẹke nin mhan fi emhin eso denọ nin mhan bhii bhi erọnmhọn?

BE IMHAN HA SABỌ HA MHỌN BHI ỌKHỌLE JEHOVA DẸ LU NIN MHAN?

4. Beji Jeremiah 29:12 rẹman, be Jehova ve ọle dẹ lu nin mhan?

⁴ Jehova ve ghe ọle dẹ ha kaehọ erọnmhọn nesẹmhan. (Tie Jeremiah 29:12.) Osẹnobulua nọnsẹmhan hoẹmhọn ẹbho ne rẹ ẹkẹata ga ọle, bhiriọ ọle dẹ wo ha kaehọ erọnmhọn nọnsele. (Ps. 10:17; 37:28) Ọkpankinọn, ọnan bha rẹman ghe ọle dẹ ha re emhin rebhe nin mhan bhii ọle nin mhan. Asabọmiẹn mhan dẹ mundia khẹ agbọn ọsọgbọn, ọkuẹsẹ eso bhi emhin nin mhan bhii ọle le sẹ mhan obọ.

5. Be Jehova fẹghe sade ọle kaehọ erọnmhọn nọnsẹmhan? Re otọle man.

⁵ Jehova fẹghe ebi erọnmhọn nọnsẹmhan rẹ diẹn mun iho nọnsọle yẹ. (Isa. 55:​8, 9) Ọkpa bhi emhin nin ọle guanọ hi, nin eria ne hẹnmhọn nanlẹn, nin ọle tobọle gbẹloghe rẹ gba ọne otọ nan. Ọkpakinọn Esu yọle ghe eria ha tobọle ha gbẹloghe egbe ele, ọle ele ha da manman ha ghọnghọn nẹ. (Gen. 3:​1-5) Nin Jehova rẹ rẹman ghe ọbhahoghe Esu khin, ọle da re otọ ne eria rẹ tobọle ha gbẹloghe egbe ele. Ọkpakinọn, ugbẹloghe ọsi eria si ene bun nẹ bhi ọkakale nin eria kuẹlo da ẹlẹnan. (Eccl. 8:9) Mhan lẹnmhin ghe Jehova ida ne ọkakale rebhe kie nin mhan kuẹlo da ẹlenan. Ahamiẹn ọle lu iriọ, ẹbho eso ki ha riale ghe ugbẹloghe ọsi eria gene mhẹn, sẹyẹ ele dẹ sabọ re ọkpẹnlẹn ọbhi ọkakale ọsi eria.

6. Bezẹle nọn da khẹke nin mhan rẹọbhọ ghe Jehova dẹ wo ha rẹ uwedẹ nọn gbale bi uwedẹ oyẹẹ rẹ nin mhan lu emhin?

⁶ Jehova sabọ re uwedẹ kẹkẹ rẹ wanniẹn emhin ọkpa nin ẹbho bhii ọle le. Bhi ọsi ijiẹmhin, ẹghe nin Hẹzẹkaya nin Ojie rẹ manman ha khọnmhọn, ọle da bhii Jehova nọn re egbe dan ọlẹn. Gene-gene, Jehova da re egbe dan ọlẹn. (2 Ki. 20:​1-6) Bhi obọ nọnkẹle, ẹghe nin Pọl nin odibo rẹ bhii Jehova nin ọle re emhin nọn diabe igbẹn nan diọ ọle bhi efun kie nanlẹn, nọn ha sabọ ha yi emianmhẹn, Ọle bha re ọle kie nanlẹn. (2 Cor. 12:​7-9) Bha yẹ ji mhan fẹ ijiẹmhin ọsi Jemisi bi Pita nin odibo ghe. Hẹrọd nin Ojie da ha guanọ nọn gbono ele veva a. Ene ibhio bhi agbotu da bhii ji Jehova nọn miẹn Pita fan. Asabọmiẹn ele yẹ bhii ji Jehova nọn miẹn Jemisi fan. Ọkpakinọn, a da gbe Jemisi a, sokpan Jehova da noo ẹhi nọnsọle rẹ miẹn Pita fan. (Acts 12:​1-11) Mhan sabọ rẹ ha riale, ‘Bezẹle nin Jehova da hinmhin Pita sokpan nọn bha da hinmhin Jemisi?’ Baibo bha taman mhan.c Ọkpakinọn emhin nin mhan lẹn hi, Jehova ilu emhin nọn bha gba. (Deut. 32:4) Sẹyẹ mhan lẹnmhin ghe Jehova hoẹmhọn Pita bi Jemisi. (Rev. 21:14) Ẹgheso, asabọmiẹn Jehova ida re ewanniẹn ọbhi erọnmhọn nọnsẹmhan beji mhan rẹ ha mhọn bhi ọkhọle. Ọkpakinọn, ranmhude mhan lẹnmhin ghe uwedẹ oyẹẹ bi uwedẹ nọn gbale Jehova rẹ lu emhin, mhan idọ ha kpokpo egbe ba uwedẹ nin ọle zẹ nin ọle rẹ wanniẹn erọnmhọn nọnsẹmhan.—Job 33:13.

7. Emhin nela ọkhẹke nin mhan rẹban? Bezẹle?

⁷ Ọ bha khẹke nin mhan ha re idia nọnsẹmhan rẹ khọkhọ ọsi ẹbho nekẹle. Bhi ọsi ijiẹmhin, asabọmiẹn mhan taman Jehova ebi mhan guanọ tee nin ọle lu nin mhan, ọkpakinọn ebi mhan bhii bha sẹ mhan bhi obọ. Akizẹbue, mhan da dọ lẹn kere ghe, ọria ọbhebhe yẹ bhii Jehova emhin nọn sẹ iriọ, sẹyẹ ọ da diabe ghe Jehova wo re ebi ọ bhii nanlẹn. Obhio mhan nin okhuo natiọle Anna wo miẹn emhin nọn sẹ inian bhi egbe. Ọle da bhii Jehova nọn re egbe dan ọdọ ọle nin Matthew bhi emianmhẹn Kansa nin ọle ha khọnmhọn. Sẹyẹ bhi ọnẹ ẹghe nan, ibhio mhan eva nin ikhuo ne manman wanre da yẹ wo ha ne ọne emianmhẹn dan. Anna da manman bhii ji Jehova nọn re egbe dan ọdọ ọle bi ene ibhio mhan nin ikhuo. Gene-gene, egbe da wo dan ene ibhio mhan nin ikhuo. Ọkpakinọn ọdọ ọle nin Matthew da yu. Bhi ọsi ọhẹnhẹn, Anna da ha riale ghe asabọmiẹn Jehova hi ọnọn re egbe dan ene ibhio mhan nin ikhuo. Ahamiẹn Jehova gene re egbe dan ele, bezẹle nin ọle bha da wanniẹn erọnmhọn ọsi Anna, yẹ re egbe dan ọdọ ọle? Bhi ọsi ẹmhọanta, mhan bha lẹn ebe gene re egbe dan ele. Ọkpakinọn ebi mhan lẹn hi, Jehova dẹ re ọkpẹnlẹn ọbhi iloya rẹbhe, sẹyẹ, ọ ghọn ọlẹn rẹ riọ imọẹ ọle ne yu kpanọ.—Job 14:15.

8. (a) Beji Isaiah 43:2 rẹman, be Jehova rẹ rẹkpa mhan yẹ? (b) Be erọnmhọn ha rẹ sabọ rẹkpa mhan yẹ sade mhan kuẹlo da ọkakale nọn bha lẹkhẹ? (Fẹ ọne ividio nọn yọle, Erọnmhọn Rẹkpa Mhan Rẹ Ziẹngbe Ọnọghọ.)

⁸ Jehova dẹ wo ha rẹkpa mhan. Beji a miẹn Aba nọn mhọn oyẹẹ Jehova khin, ọ iti ọle bhọ sade ọle daghe mhan ribhi ọbalọ. (Isa. 63:9) Ọrẹyiriọ, ọle ilu ọle nin ọkakale nan ha rẹ sabọ khọkhọ ẹdẹ la eranlẹn hẹi sẹ mhan bhi egbe hiehie. (Tie Isaiah 43:2.) Ọkpakinọn, ọle ve ghe ọle dẹ rẹkpa mhan rẹ “na ẹkẹ” ele gbera. Ọkakale nọn hi ki rẹ khin nin mhan kuẹlo da ẹlẹnan nian, Jehova dẹ rẹkpa mhan yẹ rẹ sabọ ha ga ọle. Rẹ deba ọnan, Jehova rẹ ẹlinmhin nọn khiale nọnsọle rẹ rẹkpa mhan rẹ sabọ ha ziẹngbe ọkakale. (Luke 11:13; Phil. 4:13) Ranmhude ọnan, mhan dẹ sabọ ha mhọn ọne izebhudu ghe, ọle dẹ wo ha ne emhin ne khẹke nin mhan beji mhan ha da sabọ ziẹngbe, yẹ sabọ sun rẹkhan ọlẹn.d

BE JEHOVA GUANỌ BHI OBỌ MHAN?

9. Beji James 1:​6, 7 rẹman, bezẹle nọn da khẹke nin mhan ha mhọn ọne izebhudu ghe Jehova dẹ rẹkpa mhan?

⁹ Jehova guanọ nin mhan mun udu nyan ọlẹn. (Heb. 11:6) Ẹgheso, mhan sabọ rẹ ha riale ghe mhan ida sabọ ziẹngbe ọkakale nin mhan ye. Mhan sabọ rẹ munhẹn dọ ha riale si Jehova dẹ gene rẹkpa mhan. Ọkpakinọn, Baibo ji mhan lẹn ghe, bhi ahu nọnsi Osẹnobulua mhan dẹ sabọ “san ra ogba.” (Ps. 18:29) Bhiriọ, nin mhan rẹ dọ ha mhọn edandan nọn sẹ inian, ọkhẹke nin mhan re ọkhọle rebhe nan erọnmhọn ji Jehova, ha mhọn ọne izebhude ghe ọle dẹ wanniẹn erọnmhọn nọnsẹmhan.—Tie James 1:​6, 7.

10. Re otọle man ebi mhan ha rẹ sabọ lu rẹkhan erọnmhọn nin mhan nan yẹ.

¹⁰ Jehova guanọ nin mhan lu ene khẹke mhan sade mhan nan erọnmhọn fo. Bhi ọsi ijiẹmhin, obhio mhan nin okpea sabọ rẹ bhii Jehova nọn rẹkpa ọle beji ha da rẹ ẹghe nanlẹn bhi eji ọle da wẹnna rẹ yo usikoko nọn nẹ nọnsẹmhan. Uwedẹ eso nela Jehova ha rẹ sabọ re ewanniẹn ọbhi erọnmhọn nọn sẹnian? Jehova sabọ rẹ re izebhudu nin one obhio mhan rẹ dọ ne ọwanlẹn nọnsọle talọ. Ọkpakinọn, ọ dẹ yẹ khẹke nin ọne obhio mhan lu ọnọn khẹke ọle. Ọnin hi, nin ọle rẹ dọ bu ọne ọwanlẹn dọ taman ọlẹn ebi ọle guanọ. Asabọmiẹn ọle dẹ bhii ọne ọwanlẹn igba ne bunbun. Ọle bhọ sabọ rẹ taman ọne ọwanlẹn ghe, ọle dẹ bhii ọria nin ele ko wẹnna nọn nanlẹn miẹn ẹsọn nọnsọle beji ọle rẹ khian usikoko, ọle ha ki vae, ọle ki miẹn ọsi ọne ọria. Sẹyẹ ahamiẹn ọkhẹke, ọle sabọ rẹ taman ọne ọwanlẹn ghe nọn re igho ọsi ikpẹdẹ ea sibhi igho nan ha ọle le re.

11. Bezẹle nọn bha da khẹke nin mhan zobọ bhọ rẹ ha taman Jehova emhin nin mhan guanọ?

¹¹ Jehova guanọ nin mhan ha tẹmhọn emhin nin mhan guanọ man ọlẹn ẹghe rebhe. (1 Thess. 5:17) Ẹmhọn nin Jesu tale rẹkpa mhan rẹ lẹn ghe, asabọmiẹn ọ iyi emhin rebhe nin mhan bhii da sẹ mhan obọ ẹjẹje. (Luke 11:9) Ọrẹyiriọ, hẹi ji egbe lọ ẹ! Wo ha rẹ ọkhọle rebhe nan erọnmhọn ji Jehova, yẹ nanlẹn ẹghe rebhe. (Luke 18:​1-7) Ahamiẹn mhan bha zobọ bhọ rẹ ha bhii Jehova emhin nin mhan guanọ, mhan ki rẹman ọlẹn ghe emhin nin mhan guanọ gene lu uhọnmhọn emhin rẹ ji mhan. Mhan ki yẹ rẹman ghe mhan rẹọbhọ ọle dẹ sabọ rẹkpa mhan.

BEZẸLE NỌN HA DA KHẸKE NIN MHAN FI EMHIN ESO NIN MHAN BHII BHI ERỌNMHỌN DENỌ?

12. (a) Inọnta nela mhan ha sabọ nọọn egbe mhan le rẹji ebi mhan bhii Jehova le? Bezẹle? (b) Be imhan ha rẹ rẹman Jehova yẹ ghe mhan mun ekpẹn nanlẹn bhi uwedẹ nin mhan rẹ bhii? (Fẹ ọne ẹkpẹti ghe nọn yọle, “Emhin Nin Mẹn Nan Bhi Erọnmhọn Be Rẹman Ghe Mẹn Mun Ekpẹn Nin Jehova?”)

¹² Ahamiẹn emhin nin mhan bhii bha sẹ sẹ mhan obọ, mhan sabọ rẹ nọọn egbe mhan ene inọnta ea nan. Ọhẹnhẹn, ‘Emhin nọn khẹke mẹn gene bhii bhi erọnmhọn?’ Bhi ọsi ẹmhọanta, mhan kẹ wo riale ghe mhan lẹn ebe ha mhẹn mhan bhi egbe, ọkpakinọn, asabọmiẹn ọ iyi emhin nọn ha mhẹn mhan bhi egbe nẹ mhan dọ ha bhii Jehova le bhi erọnmhọn. Ahamiẹn emhin ribhọ nin mhan bhii Jehova nin ọle lu nin mhan, asabọmiẹn uwedẹ non mhẹn gbera ọnin mhan mhọn bhi ọkhọle nin ọle lu nin mhan bhọ ribhọ. Sẹyẹ asabọmiẹn emhin eso nin mhan bhii Jehova le bha diẹn mun iho nọnsọle. (1 John 5:14) Bhi ọsi ijiẹmhin, bha ji mhan kie fẹ ijiẹmhin ọsi ene enebiọmọn nin mhan ka tẹmhọnlẹn. Ele da bhii Jehova nin ọle rẹkpa imọn nọnsele rẹ sabọ mundia nọnsẹn bhi oga. Ọnin diabe emhin esili nin ele bhii Jehova le. Ọrẹyiriọ, Jehova ida sua mhan soso ọbhọ nin mhan rẹ ga ọle. Ọle guanọ nin mhan rebhe, rẹ dọ sẹbhi imọn nesẹmhan zẹ rẹ ga ọle. (Deut. 10:​12, 13; 30:​19, 20) Bhiriọ, asabọmiẹn emhin nọn khẹke nin ọne aba bi inẹn bhii Jehova le hi, nin ọle rẹkpa ele rẹ sabọ rẹ ẹmhọanta sẹ ene imọn bhi ọkhọle, beji ele ha da hoẹmhọn Jehova yẹ kiẹn imọẹ ọle.—Prov. 22:6; Eph. 6:4.

13. Beji Hebrews 4:16 rẹman, ẹghela Jehova ha rẹ rẹkpa mhan? Re otọle man.

¹³ Inọnta nọnzi eva nin mhan ha sabọ nọọn egbe mhan le hi, ‘Ẹghe nin Jehova ha rẹ wanniẹn erọnmhọn nọsẹmhẹn be sẹ khọnan?’ Ọ sabọ rẹ dia mhan bhi egbe nin Jehova wanniẹn erọnmhọn nọnsẹmhan ẹjẹje. Bhi ọsi ẹmhọanta, Jehova lẹn ẹghe nọn mhẹn nẹ nin ọle ha rẹ rẹkpa mhan. (Tie Hebrews 4:16.) Ahamiẹn ebi mhan bhii bhi erọnmhọn bha kẹ sẹ mhan obọ ẹjẹje, mhan sabọ rẹ ha riale ghe ebi Jehova taman mhan hi, ‘Mẹn ida re ebi uwẹ guanọ nin uwẹ.’ Ọkpakinọn, asabọmiẹn ebi ọle taman mhan hi, ‘Ọne ẹghe bha sẹ sẹ.’ Bhi ọsi ijiẹmhin, bha ji mhan kie ria ẹmhọn ọne obhio mhan nin okpea nọn bhii Jehova nọn re egbe dan ọlẹn bhi emianmhẹn nin ọle ha khọnmhọn. Ahamiẹn Jehova gene re uwedẹ ọhan-ilo rẹ re egbe dan ọlẹn, Esu sabọ rẹ ha riale ghe ranmhude Jehova re egbe dan ọlẹn zẹle nin ọle da sẹyẹ ha ga ọle. (Job 1:​9-11; 2:4) Rẹ deba ọnin, Jehova mhọn ẹghe nin ọle rẹ yi nin ọle ha rẹ re ọkpẹnlẹn ọbhi emianmhẹn rebhe. (Isa. 33:24; Rev. 21:​3, 4) Ọkuẹsẹ ẹghe nin, mhan ida rẹ ẹlo ọbhọ ghe ọle dẹ re uwedẹ ọhan-ilo rẹ re egbe dan mhan. Bhiriọ, ọne obhio mhan sabọ rẹ bhii Jehova nọn re ahu bi ọkhọle nọn lọre nanlẹn rẹ sabọ ha ziẹngbe ọne emianmhẹn, yẹ rẹ sabọ ha ga ọle khian.—Ps. 29:11.

14. Be uwẹ miẹn luẹ bhi okha ọsi Janice?

¹⁴ Bha ji mhan kie fẹ ijiẹmhin ọsi Janice ghe, nọn bhii Jehova nan tie ọle bhi Bẹtẹ. Ikpe isẹn gbera ọkuẹṣe ọle dọ lẹn otọ ebi Jehova rẹ wanniẹn erọnmhọn nọnsọle yẹ. Ọle da yọle: “Jehova noo ene ẹghe nan rẹ manman man mẹn emhin, yẹ rẹkpa rẹ ha lu nọnsẹn bhi oga. Mẹn da kere ghe ọkhẹke nin mẹn manman ha mun udu nyan Jehova, nin mẹn ha lu re alo bhi uwedẹ nin mẹn rẹ luẹ Baibo, sẹyẹ, nin mẹn luẹ rẹ ha ghọnghọn bhi eji ọ hi ki rẹ khin nin mẹn da ga Jehova.” Akizẹbue, a da yọle nin Janice bi ọdọ ọle dọ ha lu iwẹnna ọfẹotughe. Janice da ta ọnan rẹji ene ẹghe rebhe ne gbera ọkuẹsẹ ele munhẹn ha lu iwẹnna ọfẹotughe. Ole da yọle: “Jehova wo wanniẹn erọnmhọn nesẹmhẹn arẹmiẹn ọ iyi uwedẹ nin mẹn rẹ ha mhọn bhi ọkhọle ọle rẹ lu ọle. Ọ re mẹn ẹghe ọkuẹsẹ mẹn dọ daghe uwedẹ nọn mhẹn an nin ọle rẹ wanniẹn erọnmhọn nọnsẹmhẹn. Ọ manman wo ti mẹn bhọ ghe, mẹn mhọn ọne isẹhoa rẹ miẹn oyẹẹ bi ifuẹkẹ nọnsọle bhi egbe.”

15. Bezẹle nin mhan ha da sabọ yọle ghe ọ iyi emhin nin mhan wo guanọ tee ọkpa mhan da ha bhii Jehova bhi erọnmhọn? (Yẹ fẹ ene ifoto ghe.)

¹⁵ Inọnta nọnzi ea nin mhan ha sabọ nọọn egbe mhan le hi, ‘Ọ dẹ be khẹke nin mẹn bhii Jehova emhin ọbhebhe?’ Bhi ọsi ẹmhọanta emhin nọn mhẹn nọn nin mhan rẹ ha taman Jehova ebi mhan guanọ tee bhi erọnmhọn. Ọkpakinọn nin mhan rẹ sabọ lẹn ebi iho nọnsi Jehova khin rẹji mhan, ọ iyi ebi mhan guanọ tee ọkpa mhan da wo ha bhii Jehova ẹghe rebhe. Bha ji mhan kie fẹ ijiẹmhin ọsi ọne obhio mhan nin okhuo nọn bha sẹ bọ ọdọ ghe, nọn mọn da bhii Jehova nan tie ọle bhi Isiku ọsi ene Tẹmhọn Agbejele. Ọle da ha guanọ nin ọle yo ọne isiku beji ọle ha da sabọ dọ ha rẹkpa bhi eji a da manman guanọ urẹkpa. Bhiriọ, beji ọle sẹyẹ rẹ bhii Jehova nan tie ọle bhi ọne isiku, ọle sabọ rẹ bhii ji Jehova nọn rẹkpa ọle rẹ daghe uwedẹ ọbhebhe nin ọle ha rẹ sabọ ha lu re alo bhi iwẹnna itẹmhọn Osẹnobulua. (Acts 16:​9, 10) Ọle ha re inian bhii ji Jehova fo, ọle sabọ rẹ nọọn ọfẹotughe nọnsele si agbotu ribhọ nọn sikẹ eji ọle ye nin ekanẹfan imanman ye. La, ọle sabọ rẹ gbẹn ebe ji Bẹtẹ rẹ nọọn ele eji a da manman guanọ urẹkpa bhi iwẹnna itẹmhọn Osẹnobulua.e

16. Izebhudu nela mhan ha sabọ ha mhọn?

¹⁶ Beji mhan luẹ bhi ọne uhọnmhọn-ọta nan, mhan dẹ sabọ ha mhọn ọne izebhudu ghe, Jehova dẹ re uwedẹ oyẹẹ bi uwedẹ nọn gbale rẹ wanniẹn erọnmhọn nọnsẹmhan. (Ps. 4:3; Isa. 30:18) Ẹgheso, asabọmiẹn Jẹhova ida wanniẹn erọnmhọn nọnsẹmhan bhi uwedẹ nin mhan rẹ guanọ ọle. Ọkpakinọn, a ida miẹn ọle bha wanniẹn ele. Ọle manman hoẹmhọn mhan, sẹyẹ ọle ida fikeke gbe mhan. (Ps. 9:10) Bhiriọ, wo ha “mun udu nyan ọlẹn ẹghe rebhe,” yẹ ha taan ọkhọle nọnsẹ a man ọlẹn bhi erọnmhọn.—Ps. 62:8.