ILUẸMHIN 11

Ọyaya

Romans 12:11

EBI UWẸ HA LU: Re ọhubhudu ha talọ, nin ọta nin uwẹ ta da ha yẹẹ ẹne uwẹ ne talọ, bi nin ele da ha mhọn ọtibhọ rẹ lu ebi uwẹ tale.

Mun ọkhọle ọbhọ. Ahamiẹn uwẹ muegbe ọta, manman ria eria nyan ebi ọne ọta ha rẹ rẹkpa eria yẹ. Manman luẹ ọta nọnsẹ nọnsẹn sẹbhi eji a da miẹn ghe, ebi uwẹ ta ki ha na bhi ọkhọle nọnsẹ vae.
Ha mhọn eria nin uwẹ ha ne talọ bhi ọkhọle. Ria eria nyan ebi ọne ebe nin uwẹ ha tie, la, ebi ọne ọta nin uwẹ ha rẹman ha rẹ rẹkpa ẹbho yẹ. Ria ẹmhọn uwedẹ kẹkẹ nin uwẹ ha rẹ re ọne ọta man, nin ene uwẹ ne talọ da sabọ lẹn nọnsẹn, ebi ele ha rẹ miẹn elele bhọ yẹ.
Ra ahu ọbhi ọta nọnsẹ. Re ọhubhudu ha talọ. Ha noo obọ, egbe, bi ẹlo nọnsẹ rẹ talọ bhi uwedẹ nin ọrebhe ha rẹ lẹn ebi ọne ọta gene dia uwẹ yẹ bhi egbe. Ọkpakinọn, hẹi ji ọle ha yi ọsi nan-ba-daghe-mẹn.

Gbẹlokotọ bhi uwedẹ nin uwẹ rẹ re ọbọ, egbe, bi ẹlo talọ, ranmhude, ahamiẹn uwedẹ ọkpa nin uwẹ rẹ lu ọnan kiẹn emhin nin uwẹ guẹle, ọle-ọle ọkpa uwẹ da wo ha lu. Ọnan ene uwẹ ne talọ ki da ha ghe. Ji uwedẹ nin uwẹ rẹ re obọ, egbe, bi ẹlo talọ ha rẹkhan ebi uwẹ ta bhi unun. Manman re ọyaya man sade uwẹ re ene ọta kpataki ne ribhi ọne ọta man, bi sade uwẹ ho nin uwẹ re ene uwẹ ne talọ ha mhọn ọtibhọ rẹ lu rẹkhan ebi ele họn. Hẹi ji ọyaya nọnsẹ bun gbe, ranmhude, ọnan dẹ sabọ re egbe ọne ọta lọ ene uwẹ ne talọ.