ILUẸMHIN 15

Rẹman Uwẹ Rẹọ bhi Ebi Uwẹ Ta

1 Thessalonians 1:5

EBI UWẸ HA LU: Rẹman uwẹ manman rẹọbhọ ghe, ọta nin uwẹ rẹman, ẹmhọanta nọn, ghe emhin nọn manman khẹke nin ene uwẹ ne talọ lẹn nọn.

EBI A RẸ LU ỌLE YẸ:

Manman muegbe nọnsẹn. Manman luẹ ebe nin ọne ọta na dagbare sẹbhi eji a da miẹn ghe, uwẹ manman lẹn otọ ọta kpataki ne ribhọ, bi ebi Baibo nan gbẹn rẹkhan ele rẹ rẹman yẹ ghe, ẹmhọanta ene ọta kpataki gene khin. Dọnmhegbe nin uwẹ rẹ noo ikpọta ne lẹkhẹ, ne bha bun gbe, nin uwẹ rẹ re ene ọta kpataki ne ribhọ man. Denọ ẹlo ọbhi ebi ene ọta kpataki ha rẹ rẹkpa ene uwẹ ne talọ yẹ. Bhii Jehova nin ọle re ẹlinmhin nọn khiale nin uwẹ.

Re ẹghe ọbhi otọ rẹ luẹ ọne ọta; ha tale dagbare sade uwẹ luẹ ọle. Bhiriọ, uwẹ ki manman sabọ guẹ ọne ọta nọnsẹn, yẹ re ọle man bhi uwedẹ nọn ha rẹ manman deọbhọ.
Noo ikpọta ne ha rẹman ghe uwẹ manman rẹọ bhi ebi uwẹ ta. Hẹi wo ha noo ikpọta tee beji a wo rẹ gbẹn ele ọbhi ebe nan da re ọne ọta nin uwẹ. Ha noo ikpọta nesi uwẹ. Ji ikpọta nin uwẹ noo rẹman ghe, uwẹ lẹn ebi uwẹ ta.
Talọ bhi uwedẹ nọn ha rẹman ghe, uwẹ gene rẹọ bhi ebi uwẹ ta. Si uru okhun beji ọ rẹ khẹke. Ahamiẹn ọ ida re ẹmhọn re, ha ghe ẹkẹ ẹlo ọsi ene uwẹ ne talọ.

Ranmhude a yọle nin uwẹ talọ bhi uwedẹ nọn ha rẹman ghe uwẹ rẹọ bhi ebi uwẹ ta bha re otọ nin uwẹ rẹ ha talọ beji uwẹ sabọ, la talọ bọsi ghe, uwẹ lẹn nẹ, la, ọne uwẹ tale ha sẹ. Aharẹmiẹn uwẹ lẹnmhin ghe, ẹmhọanta ọta nin uwẹ rẹman khin, re uwedẹ oyẹẹ re ọle man beji ene uwẹ ne talọ ha da sabọ rẹọbhọ.