GINC 7
Tin-Hungh Nyei Guoqv Se Haaix Nyungc?
1. Tin-Hungh nyei Guoqv se haaix nyungc?
Weic haaix diuc Yesu puix duqv benx Hungh?—MAAKO 1:40-42.
Tin-Hungh nyei Guoqv se benx yietc norm hungh jaa yiem tin-dorngh. Tin-Hungh nyei Guoqv oix zorqv guangc nzengc ih zanc maaih nyei yietc zungv hungh jaa yaac oix zoux ziangx Tin-Hungh nyei eix yiem tin-dorngh caux yiem baamh gen. Naaiv fienx gorngv taux Tin-Hungh nyei Guoqv oix hnangv naaiv zoux se longx haic. Dongh baamh mienh oix maaih longx nyei hungh jaa wuov, maiv lauh Tin-Hungh nyei Guoqv oix benx naaic norm hungh jaa bun ninh mbuo buangv hnyiouv nzengc. Naaic norm hungh jaa oix bun dauh dauh yiem naaiv baamh gen horpc fim dongh eix nyei yaac maaih dongh diuc hnyiouv.—Doqc Ndaaˆniˆen 2:44; Matvˆtaai 6:9, 10; 24:14.
Yietc norm guoqv m’daaih a’zuqc maaih dauh hungh gunv. Yeˆhoˆwaa orn ninh nyei Dorn, Yesu Giduc, zoux Hungh yiem Ninh nyei Guoqv.—Doqc Laauc Yaangh 11:15.
Mangc fangx-nangh Tin-Hungh Nyei Guoqv Se Haaix Nyungc?
2. Weic haaix diuc Yesu zoux Hungh se horpc jiex?
Tin-Hungh nyei Dorn zoux Hungh se horpc jiex weic zuqc ninh se hnyiouv longx, ninh yaac dingc hnyiouv zoux baengh fim nyei jauv. (Matvˆtaai 11:28-30) Ninh maaih qaqv henv haih tengx duqv mienh weic zuqc taux ninh gunv nyei ziangh hoc, ninh ziouc yiem tin-dorngh gunv njiec baamh gen. Dongh ninh daic mingh aengx nangh daaih wuov, ninh faaux tin-dorngh mingh ziouc zueiz jienv Yeˆhoˆwaa nyei mbiaauc maengx bung zuov taux ninh duqv gunv. (Hipvˆlu 10:12, 13) Nqa’haav, Tin-Hungh ziouc bun ninh maaih lingc maaih hatc maaz jiez gorn gunv aqv.—Doqc Ndaaˆniˆen 7:13, 14.
3. Haaix dauh caux Yesu gunv?
Maaih guanh heuc “cing-nzengc baeqc fingx [“cing-nzengc mienh wuov deix,” NWT ]” duqv caux Yesu yiem tin-dorngh gunv. (Ndaaˆniˆen 7:27) Ginv ndaangc benx cing-nzengc mienh wuov deix se Yesu nyei hnyiouv zingx nyei gong-zoh mbuo. Yiem naaic daaih, taux ih zanc, Yeˆhoˆwaa ginv hnyiouv zingx nyei m’jangc dorn caux m’sieqv dorn benx cing-nzengc mienh wuov deix. Naaiv deix mienh daic mingh, ninh mbuo hnangv Yesu nor aengx duqv nangh daaih, sin maiv maaih orv maiv maaih nziaamv.—Doqc Yoˆhan 14:1-3; 1 Koˆlinˆto 15:42-44, 50.
Maaih mbuoqc ziex dauh mienh duqv faaux tin-dorngh? Maaih 144,000 dauh duqv faaux. Yesu heuc ninh mbuo zoux yietc “guanh zoqc nyei mienh.” (Lugaa 12:32) Ninh mbuo duqv caux Yesu gunv njiec baamh gen.—Doqc Laauc Yaangh 14:1.
4. Dongh Yesu jiez gorn gunv wuov, maaih haaix nyungc sic cuotv?
Yiem 1914 wuov norm hnyangx, Tin-Hungh nyei Guoqv ziouc jiez gorn gunv aqv.a Yietv benx Hungh daaih, Yesu zoux nyei daauh nyungc gong se zorqv Saadaan caux Saadaan nyei fin-mienh waaic zoi njiec baamh gen. Saadaan ziouc qiex jiez haic, ziouc zoux cuotv ziex nyungc ciouv nyei sic gormx naaiv baamh gen. (Laauc Yaangh 12:7-10, 12) Yiem naaic daaih, ziex nyungc sic hoic mienh zuqc kouv se jaa camv jienv faaux. Deic-bung mborqv jaax nyei jauv, mienh ngorc hnaangx nyei jauv, butv domh wuon-baengc nyei jauv, caux ndau dongz nyei jauv yietc zungv se benx “jangx-hoc” bun cing maiv lauh Tin-Hungh nyei Guoqv oix gunv nzengc baamh gen nyei sic aqv.—Doqc Lugaa 21:7, 10, 11, 31.
5. Tin-Hungh nyei Guoqv zoux jienv haaix nyungc aqv?
Weic mienh ei Tin-Hungh nyei eix zunh jienv Tin-Hungh nyei doz gormx naaiv lungh ndiev, Tin-Hungh nyei Guoqv bun mienh camv yiem norm-norm deic-bung maaih horpc fim dongh eix nyei jauv. Maaih ziex baeqv waanc dauh mienh nyiemc ganh zoux faix daaih benx Tin-Hungh nyei Guoqv nyei baeqc fingx, bun Yesu gunv ninh mbuo. Taux Tin-Hungh nyei Guoqv oix mietc nzengc naaiv norm baamh gen nyei orqv sic wuov zanc, Tin-Hungh nyei Guoqv oix beu jienv ninh mbuo. Hnangv naaic, haaix dauh oix benx Tin-Hungh nyei Guoqv nyei baeqc fingx nor, oix zuqc ei jienv Yesu nyei waac zoux.—Doqc Laauc Yaangh 7:9, 14, 16, 17.
Yiem 1,000 hnyangx gu’nyuoz, Tin-Hungh nyei Guoqv oix zoux ziangx zinh ndaangc Tin-Hungh jiez gorn wuov norm za’eix dongh ninh oix bun baamh mienh wuov. Naaiv norm baamh gen oix benx yietc norm nzueic haic, kuv-yiem haic nyei domh orn-lorqc huingx. Nqa’haav, Yesu ziouc jiu naaic norm Guoqv daaux nqaang bun ninh nyei Die. (1 Koˆlinˆto 15:24-26) Meih maaih haaix dauh meih oix gorngv taux Tin-Hungh nyei Guoqv bun muangx nyei fai?—Doqc Singx Nzung 37:10, 11, 29.