Meih Nyei Hmuangv-Doic Hnangv Haaix Nor Haih Duqv Njien-Yiouh?

1. Weic haaix diuc a’zuqc tong leiz nyei dorng jaa hmuangv-doic cingx njien-yiouh?

Wuov kuv fienx se yiem Yeˆhoˆwaa daaih. Yeˆhoˆwaa se njien-yiouh orn-lorqc nyei Tin-Hungh. (1 Tiˆmoˆtai 1:11, NWT ) Ninh oix hmuangv-hmuangv mienh duqv njien-yiouh orn-lorqc. Ninh se dongh liepc dorng jaa nyei jauv daaih bun baamh mienh wuov dauh. M’jangc caux m’sieqv tong leiz nyei dorng jaa se jienv haic bun hmuangv-doic njien-yiouh. Hnangv naaic zoux se bun naaic deix i hmuangv caux ninh mbuo nyei fu’jueiv haiz gauh maaih dorngx kaux. Giduc Mienh oix zuqc ziux ninh mbuo yiem nyei deic-bung nyei dorng jaa leiz zoux cai-doix sou.​—Doqc Lugaa 2:1, 4, 5.

Tin-Hungh hnangv haaix nor mangc taux dorng jaa nyei jauv? Dorng jaa nyei jauv se m’jangc dorn dorh m’sieqv dorn daaih zoux auv caux ninh puix seix, yietc seix bun ninh mbuo benx cai-doix. Yeˆhoˆwaa oix dauh dauh nqox caux auv zoux hnyiouv zingx nyei bun doic. (Hipvˆlu 13:4) Ninh nzorng leih cai-doix nyei jauv. (Maaˆlaaˆki 2:16) Mv baac se gorngv nqox fai auv mingh hienx zuqc ganh dauh nor, Tin-Hungh bun maiv zoux dorngc wuov dauh haih leih nqoi aengx ganh longc siang.​—Doqc Matvˆtaai 19:3-6, 9.

2. Nqox caux auv oix zuqc maaih haaix nyungc eix-leiz?

Yeˆhoˆwaa zeix m’jangc dorn caux m’sieqv dorn daaih puix doic zoux cai-doix. (Tin Deic Douh 2:18) Nqox se benx hmuangv-doic nyei ziouv. Ninh oix zuqc liuc leiz goux hmuangv-doic bun ninh mbuo maaih dongh ninh mbuo qiemx zuqc longc nyei ga’naaiv yaac njaaux ninh mbuo Tin-Hungh nyei leiz. Ninh oix zuqc hnamv ninh nyei auv gauh camv hnamv ninh ganh. Nqox caux auv oix zuqc hnamv doic, taaih doic. Weic nqox caux auv maiv dunh yunh, ninh mbuo a’zuqc laanh hoqc guangc laanh nyei zuiz. Naaiv se zoux gorn-ndoqv bun ninh mbuo i hmuangv haih njien-yiouh baengh orn nyei yiem.​—Doqc Eˆfeˆso 4:31, 32; 5:22-25, 33; 1 Bide 3:7.

3. Dorng jaa liuz haiz maiv a’hneiv nor, nqox caux auv horpc zuqc leih doic aqv fai?

Se gorngv meih mbuo nqox caux auv ganh maaih dorngx maiv horpc doic nor, meih mbuo ganh i hmuangv oix zuqc zoux laanh hnamv laanh nyei eix-leiz. (1 Koˆlinˆto 13:4, 5) Tin-Hungh nyei Waac maiv zeiz njaaux cai-doix bun nqoi yiem daaih zorc ninh mbuo nyei pou-tong sic.​—Doqc 1 Koˆlinˆto 7:10-13.

4. Fu’jueiv aac, Tin-Hungh oix meih duqv haaix nyungc?

Yeˆhoˆwaa oix bun meih nyei hnyiouv njien-yiouh. Ninh bun meih longx jiex nyei waac-njaaux tengx meih lunx nyei ziangh hoc duqv kuv-yiem. Ninh oix meih nyei diex maac zoux jiex daaih nyei kuv nyungc zeiv caux maaih nyei cong-mengh njaaux meih duqv longx. (Koˆloˆsi 3:20) Yeˆhoˆwaa yaac oix meih duqv njien-yiouh weic zoux nyungc-nyungc bun Zeix meih daaih Wuov Dauh caux ninh nyei Dorn.​—Doqc Gorngv Seix Zaangc 11:9–12:1; Matvˆtaai 19:13-15; 21:15, 16.

5. Diex maac aac, meih nyei fu’jueiv hnangv haaix nor haih lorz duqv buatc njien-yiouh nyei jauv?

Meih oix zuqc longc hnyiouv zoux gong daaih maaih lai hnaangx bun meih nyei fu’jueiv nyanc, maaih biauv bun ninh mbuo yiem, caux maaih lui houx bun ninh mbuo zuqv. (1 Tiˆmoˆtai 5:8) Mv baac oix bun meih nyei fu’jueiv haih lorz duqv buatc njien-yiouh nyei jauv nor, meih yaac a’zuqc njaaux ninh mbuo hnamv Tin-Hungh caux muangx ninh nyei waac. (Eˆfeˆso 6:4) Meih zoux nyei nyungc zeiv hnamv Tin-Hungh se gengh haih tengx meih nyei fu’jueiv aengx haih hnamv Tin-Hungh. Haaix zanc meih ziux Tin-Hungh nyei Waac njaaux, meih nyei waac haih tengx meih nyei fu’jueiv hnamv longx nyei jauv.​—Doqc Nzamc Leiz-Latc 6:4-7; Cong-Mengh Waac 22:6.

Haaix zanc meih ceng yaac kuinx meih nyei fu’jueiv nor se tengx duqv ninh mbuo. Ninh mbuo mv baac a’zuqc longc mienh gorngv-njaaux caux mborqv njaaux ninh mbuo nyei. Hnangv naaic njaaux ninh mbuo se beu jienv ninh mbuo, maiv bun ninh mbuo sueih ganh nyei hnyiouv zoux ziouc maiv haih duqv njien-yiouh orn-lorqc. (Cong-Mengh Waac 22:15) Mv baac, gorngv-njaaux fai mborqv njaaux nyei ziangh hoc, maiv dungx zoux ba’laqc ciouv jiex ndaangc fai zoux doqc bun.​—Doqc Koˆloˆsi 3:21.

Yeˆhoˆwaa nyei Zorng-Zengx yienx duqv maaih camv-buonv sou lengc jeiv nyei fiev daaih njaaux diex maac caux fu’jueiv. Naaiv deix sou se ziux Ging-Sou nyei jauv fiev daaih.​—Doqc Singx Nzung 19:7, 11.