Tin-Hungh Se Haaix Dauh?

1. Weic haaix diuc mbuo oix zuqc zangc Tin-Hungh?

Zien Tin-Hungh se dongh Zeix cuotv maanc muotc Wuov Dauh. Yiem loz-hnoi taux nqa’haav hingv ninh m’daaih yietc liuz yiem. (Singx Nzung 90:2) Kuv fienx yiem Ging-Sou se Tin-Hungh bun daaih. (1 Tiˆmoˆtai 1:11) Weic Tin-Hungh bun maengc mbuo, mbuo horpc zuqc kungx zangc ninh ganh nduqc dauh hnangv.​—Doqc Laauc Yaangh 4:11.

2. Tin-Hungh se hnangv haaix nor?

Maiv maaih haaix dauh baamh mienh duqv buatc jiex Tin-Hungh, weic zuqc ninh se mangc maiv buatc nyei ga’naaiv. Ninh nyei sin se maiv zeiz hnangv baamh mienh nyei sin nor maaih orv maaih nziaamv. Naaiv se gorngv ninh se zoux gauh hlo ninh zeix daaih yiem baamh gen nyei ga’naaiv. (Yoˆhan 1:18) Maiv gunv mbuo mangc maiv buatc ninh, mbuo haih hiuv duqv ninh nyei fiem-fingx yiem mbuo samx mangc ninh zeix daaih nyei ga’naaiv. Gorngv nyungc zeiv se hnangv naaiv, ziex nyungc biouv caux biangh se bun mbuo hiuv ninh maaih cong-mengh yaac hnamv mbuo. Mangc lungh caux ndau nyei ga’naaiv ndongc haaix hlo ndongc haaix jangv se bun mbuo hiuv duqv ninh nyei domh qaqv.​—Doqc Lomaa 1:20.

Mbuo doqc Ging-Sou nor, mbuo haih hiuv duqv Tin-Hungh nyei fiem-fingx gauh camv deix. Ging-Sou bun mbuo hiuv duqv Tin-Hungh oix caux maiv oix nyei jauv, ninh hnangv haaix nor goux mienh, caux hnangv haaix nor mangc taux nyungc-nyungc sic.​—Doqc Singx Nzung 103:7-10.

3. Tin-Hungh maaih mbuox nyei fai?

Yesu gorngv: “Yie mbuo nyei tin-dorngh Diex aah! Tov bun mienh taaih meih nyei cing-nzengc mbuox.” (Matvˆtaai 6:9) Tin-Hungh maaih camv-nyungc heuc nyei, hnangv Ziouv fai Zangc Diex, mv baac ninh maaih nduqc norm mbuox hnangv. Yietc fingx maaih yietc fingx nyei waac heuc. Yiem Iu-Mienh waac nor, naaic norm mbuox se heuc “Yeˆhoˆwaa.” Mv baac maaih deix mienh heuc “Yaweh.”​—Doqc Cuotv Iˆyipv 17:15, mangc sou-juoqv nzaangc; Singx Nzung 83:18.a

Maaih camv-buonv Ging-Sou se maiv maaih Tin-Hungh nyei mbuox weic zuqc mienh zorqv cuotv mingh, liuz tiuv an Ziouv fai Tin-Hungh. Zinh ndaangc fiev daaih nyei Ging-Sou se maaih Tin-Hungh nyei mbuox fiev jienv camv zoqc se leih maiv go 7,000 nzunc. Dongh wuov zanc Yesu njaaux mienh Tin-Hungh nyei jauv wuov, ninh bun mienh hiuv duqv Tin-Hungh nyei mbuox nyei.​—Doqc Yoˆhan 17:6, mangc sou-juoqv nzaangc; 17:26.

Mangc fangx-nangh Tin-Hungh Maaih Mbuox Nyei Fai?

4. Yeˆhoˆwaa nzauh heix taux mbuo nyei fai?

Lungh ndiev maaih kouv naanc buangv nzengc, hoic jienv mienh maanh. Naaic se weic Yeˆhoˆwaa Tin-Hungh maiv nzauh heix taux mbuo fai? Maaih deix mienh gorngv ninh zoux bun mbuo diev kouv weic seix mbuo, mv baac se maiv zeiz hnangv naaic.​—Doqc Yaagorpc 1:13.

Tin-Hungh bun baamh mienh maaih leiz ginv oix zoux haaix nyungc, weic ninh maiv mangc faix mbuo. Naaic maiv zoux bun mbuo oix ginv fu-sux Tin-Hungh fai? (Yoˆsuˆwaa 24:15) Mv baac mienh camv nyei ginv zoux waaic bun dieh deix. Hnangv naaic, mienh cingx zuqc diev kouv. Yeˆhoˆwaa buatc maiv baengh fim nyei jauv se zoux bun ninh hnyiouv mun.​—Doqc Tin Deic Douh 6:5, 6.

Yeˆhoˆwaa se nzauh heix taux mbuo nyei. Ninh oix mbuo duqv njien-yiouh. Maiv lauh ninh zorqv guangc nzengc kouv naanc aqv, liemh jienv dongh zoux waaic wuov deix. Ih zanc se maaih diuc jauv ninh cingx maiv gaengh zorqv guangc baamh gen nyei kouv naanc. Yiem da’betv wuov ginc, mbuo cingx daaih hoqc taux naaic diuc jauv.​—Doqc 2 Bide 2:9; 3:7, 13.

5. Mbuo hnangv haaix nor haih gauh nitv Tin-Hungh?

Yeˆhoˆwaa heuc mbuo daux gaux weic bun mbuo haih mingh nitv ninh. Ninh mangc taux mbuo yietc dauh yietc dauh nyei. (Singx Nzung 65:2; 145:18) Ninh oix guangc mbuo nyei zuiz. Maiv gunv maaih ziangh hoc mbuo haih zoux dorngc ninh, ninh buatc dongh mbuo longc hnyiouv zoux horpc ninh wuov nyei. Ih zanc mbuo maiv dunh yunh, mv baac mbuo gengh haih mingh nitv ninh nyei, yaac haih caux ninh jiu tong.​—Doqc Singx Nzung 103:12-14; Yaagorpc 4:8.

Weic zuqc Yeˆhoˆwaa bun maengc mbuo, mbuo zuqc hnamv ninh gauh camv mbuo hnamv nyei mienh. (Maako 12:30) Se gorngv meih hoqc hiuv duqv Tin-Hungh camv jienv faaux yaac ei jienv ninh nyei waac zoux, bun ninh hiuv duqv meih hnamv ninh, meih ziouc haih nitv ninh gauh fatv.​—Doqc 1 Tiˆmoˆtai 2:4; 1 Yoˆhan 5:3.