Fos Ting Fos bifuo Yu Go iina di JNT

Di Jamiekan Langwij

Jamiekan, we muos piipl kaal Jamiekan Kriyuol ar Patwa, a wan langwij we bilang tu Jamieka — a ya-so it kom fram. Bout 2.7 miliyan piipl liv ya, an outa aal a dem piipl de, iina evri onjrid, ieti-faiv a dem chat Jamiekan fos bifuo dem chat notn els. So it a dem fos langwij. Iina da konchri ya we wi kyan se av tuu langwij, a Jamiekan de rait saida Ingglish. Ingglish a di langwij we di govament pik an se fi yuuz iina wi kuot, skuul an fi aal dem sitn de. Wi av di tuu mien langwij dem, bot wi av uol iip a difrant difrant vorzhan a di tuu a dem iina di migl. Som komiin muo laik Ingglish dan som.

Jamiekan a wan Kriyuol langwij we tek aafa Ingglish iina som wie. A uova chrii onjrid ier nou it kom bout kaa piipl we chat difrant langwij miit op. Afrikan piipl fram aal uova Afrika, we taak aal kaina difrant difrant langwij did kom a Jamieka fi wok pan di big big shuga faam. Dem taim de a Ingglan did a ron Jamieka. Wen wi tingk bout Jamiekan wi kyaahn figet se Jamiekan kom bout jos siek-a sliev wok, an aal we did a apm wen wi yuus tu av sliev wok. So kaa wi tingk da wie de nou, uol iip a piipl put di Kriyuol iina wan rang gruup. Dem kaal it bad Ingglish ar mishi mashi Ingglish, wen notn no go so. Fi luk pan di langwij da rang wie de did mek di langwij an di piipl dem we chat it luk bad fi wan lang lang taim, bot piipl we stodi langwij fain se Jamiekan piipl staat si Jamiekan iina wan difrant wie. Nou piipl staat se Jamiekan a sitn wi fi proud a, an it a paat a uu wi bi. Plos dem si se Jamiekan av yuus. Wi kyan yuuz it fi se wateva wi waahn an it wok gud! Iina 2005, di Jamiekan Langwij Yuunit go aal uova di ailan an aks piipl som kwestiyan, dem fain se outa di touzn piipl we dem aks, iina evri onjrid, seventi-nain an a aaf tingk se Jamiekan av evriting we mek wan langwij wan riil langwij, an so it a wan riil langwij fi chuu. Dem fiil se it kyan yuuz fi se wat-eva piipl waahn, wateva piipl a tingk, wat-eva dem a si ar eniting we dem a tingk op iina dem ed, jos laik eni a di worl tap-a-tap langwij dem.

Aal a lang, muos a di taim wen wi yuuz Jamiekan, a taak, sing an dem kain-a sitn de wi yuuz it fa – wi neehn tuu yuuz it fi rait. Bot a dat apm wid muos langwij; wi yuuz langwij fi chat an dem sitn de bifuo wi rait iina it. So, duo muos taim a chat wi chat an sing iina it, dat no miin se a dem sitn de wan it kyan du. No langwij no de bout fi onggl yuuz fi chat ar sing. Di wok we Luwiiz Benit-Kuovali du, we wi lov so, plos ada wok, aal a dem sitn de shuo se wi kyan rait iina di Jamiekan langwij.

Di Baibl iina Jamiekan

Wen wi put di Baibl iina Jamiekan, dat chrech iivn forda wa wi kyan yuuz di langwij fi du. It chrech it orda dan aal a di ada wok dem we did du bifuo. Siek-a dis ya, wi niid wan wie fi rait so dat evribadi no du dem uon ting. Di wie wi yuuz fi rait it afi shuo se di langwij n wan langwij pan it uon. Siek-a dat, wen wi did a spel di wod dem iina di Jamiekan Nyuu Testiment, a di Kyasidi-JLU wie wi yuuz fi rait it. A wan man niem Frejrik Kyasidi, iina di 1960’z, kom op wid da wie ya fi rait di Jamiekan langwij. Im a wan Jamiekan we stodi op bout langwij. Likl lieta di Jamiekan Langwij Yuunit a di Yuunivorsiti a di Wes Indiz did chienj op som a di sitn dem we Frejrik Kyasidi did kom op wid.

Yu kyan kaal it se, piipl fi se evri leta ar gruup a leta jos laik ou dem si it rait dong, kaa evri leta onggl mek fi gi wan soun iina di langwij. Dis mek piipl kech di langwij iiziya wen dem si it rait dong, speshali di piipl dem we onggl taak Jamiekan, di wan dem we a yuuz Jamiekan fi lorn fi riid an rait, di wan dem we jos jos a lorn fi riid an rait an di wan dem we onggl rait an riid it wan an tuu taim. Bot iivn duo it maita no so aad fi riid di langwij, wi stil put iin sitn fi elp yu riid an rait Jamiekan. An fi aal uu rada fi lisn di baibl wi no onggl rait it dong fi unu riid, it de iina wan faam we unu kyan lisn tu.

Di Baibl wi Chansiliet fram an ou wi Chansiliet

Wen unu luk iina di Jamiekan Nyuu Testiment, unu a-go fain se iina di kaana yu av di King Jiemz vorzhan ef unu waahn check it tu wen unu a riid. Dis no miin se wa iina di Jamiekan Baibl a wod fi wod wa iina di KJV. Az a matarafak, wi no tek wod fi wod fram no Ingglish Baibl wen wi a du di Jamiekan wan, duo wi chek dem out an yuuz uol iip a dem fi elp wi. Di Jamiekan Baibl bies aafa wa rait dong iina di fos fos Baibl, di Griik, azkaadn tu wa wi riili riili andastan se it a se wen wi tingk bout it wel aad. Di gruup we tek di aibl fram Griik tu Jamiekan neehn wok pan dem uon, dem eva did a ton tu uol iip a difrant difrant piipl we nuo bout di Baibl an riid we dem rait se. Dem riid we dem se bout wa did a gwaan iina Baibl taim, bout uu rait di difrant difrant buk dem we iina di Baibl an wa dem raita de miin wen dem se wa dem se. Di gruup riid aal a dem sitn ya fi mek shuor se dem get wa di raita riili did a se. Wen di Baibl a chransiliet iina Jamiekan, di mien sitn wi set out fi du a mek shuor se wa di Griik se an wa di Griik miin a dat de di Jamiekan Baibl se an miin tu. Wi set out fi rait it, no wod fi wod from di Griik, bot iina wan wie we piipl kyan andastan wen dem riid an lisn it. Wi set fi du it iina wan wie we Jamiekan piipl kyan se, ‘ye, dat soun Jamiekan fi chuu!’ Wi uop se wa wi set fi du, a dat wi du.

Di Baibl Sosaiyeti a di Wes Indiz