Gidiyan Win Di Fait Gens Di Midiyanait Dem

Afta a wail, di Izrelait dem ton dem bak pan Jeuova an staat fi worship faalz gad agen. So fi sevn ier, di Midiyanait dem wuda mash op di sitn dem we di Izrelait dem plaant an tiif dem animal dem. Kaa di Izrelait dem did fried a dem, dem go aid iina som kiev an som mountn. Dem beg Jeuova fi elp dem. So Jeuova sen wan ienjel go taak tu wan yuut we niem Gidiyan. Di ienjel se tu im se: ‘Jeuova pik yu fi go fait fi im piipl dem.’ Gidiyan aks im se: ‘Mi! Ou mi fi go siev Izrel? Afta mi a no nobadi.’

A ou Gidiyan wuda nuo se Jeuova pik im fi chuu? Im put wan piis a wul pan di grong an tel Jeuova se: ‘Ef a maanin mi git op an si di wul wet wid juu-waata bot di grong jrai, den mi wuda nuo se yu waahn mi fi go siev Izrel.’ Di neks maanin, Gidiyan si se di wul did wet til it suok bot di grong did jrai laka chip! Bot afta dat Gidiyan aks Jeuova fi mek di wul jrai an di grong wet di neks maanin, an a dat did apm. Kaaz a dat, Gidiyan did nuo fi shuor se a im Jeuova pik. So im an im suoja dem redi op demself fi go fait di Midiyanait dem.

Jeuova tel Gidiyan se: ‘Mi a-go mek di Izrelait dem win. Bot kaaz a so moch a unu, unu mait go fiil se a dat mek unu win. So ier wa, tel di man dem we fried se dem fi go bak uom.’ So 22,000 a di man dem gu baka dem yaad, an 10,000 a dem tan wid Gidiyan. Afta dat Jeuova se: ‘Tu moch suoja stil de ya man. Kya dem go dong a di riva an tel dem fi jringk som waata. Yu si di wan dem we a jringk waata an stil a luk out fi di enimi dem, a dem wan de yu fi kip.’ Wen yu tek a stak, a onggl 300 a di man dem did du dat. Jeuova se a dem likl bit a man ya im a-go yuuz fi don di Midiyanait dem, iivn duo a 135,000 suoja dem did av.

Da sed nait de, Jeuova tel Gidiyan se: ‘A taim nou fi yu go rosh di Midiyanait dem!’ So Gidiyan gi im suoja dem som aan, an som big jaar wid taach aid iina dem. Im tel dem se: ‘Unu wach mi an evriting we unu si mi du, dwi’it.’ So Gidiyan bluo im aan, mash fi’im jaar, an wiev di taach iina im an, an shout out: ‘Jeuova suod an Gidiyan suod!’ Den aal a di 300 man dem du di sed ting tu. Di Midiyanait dem kech dem fried an staat skyata skyata aal bout. Dem did so kanfyuuz dat dem staat ton pan dem wan aneda. An a so Jeuova elp di Izrelait dem fi don dem enimi dem agen.