Ana Prie Fi Wan Bwai Pikni

Yu did av wan Izrelait man we niem Elkiena. Im did av tuu waif we niem Ana an Penina, bot a Ana im did lov di muos. Kaa Penina did av wol iip a pikni an Ana neehn av non, Penina did a tek set pan ar. Evri ier Elkiena wuda kya im fambili go a Shailo fi go worship Jeuova. Wan a di taim wen dem de de, im si se Ana did sad bad. So im se tu ar se: ‘Ana, no baal. Memba se yu av mi ino. An mi lov yu.’

Lietaraan, Ana go we go prie bai arself. Wen shi de de a prie, shi kudn tap baal. Shi beg Jeuova fi elp ar. Shi se: ‘Jeuova, ef yu gi mi wan bwai pikni, mi a-go gi’im bak tu yu, an im a-go sorv yu fi di wol a im laif.’

Wen Ana did a prie an a baal, di liida fi di priis dem we niem Iilai si ar an tingk se a jongk shi jongk. Bot Ana tel im se: ‘Nuo, a no jongk mi jongk sa, a taak mi a taak tu Jeuova bout sitn we riili a bada mi.’ Iilai si se im did rang so im tel ar se: ‘Mi uop se Gad gi yu evriting we yu aks im fa.’ Ana did fiil beta an shi go bout ar bizniz. Nat iivn wan ier afta dat, Ana get pregnant an av wan bwai pikni an shi kaal im Samwel. Ana glad-bag mos did bos, no chuu?

Ana neehn figet wa shi did pramis Jeuova se. Az Samwel tap tek bres so, shi kyari im fi go sorv a Gad ous. Shi tel Iilai se: ‘A da bwai ya mi did prie fa. An mi a-go gi’im tu Jeuova fi di res a im laif.’ Evri ier Elkiena an Ana go luk fi Samwel, an evri taim dem go dem kya wan ruob we naa no sliiv fi im. Jeuova mek Ana av chrii muo son an tuu daata.