Jeuova Mek Samsn Chrang Bad

Nof a di Izrelait dem did staat worship faalz Gad agen, so Jeuova mek di Filistiin dem tek kanchuol a dem lan. Bot yu did av som Izrelait we did stil lov Jeuova. Wan a dem a did wan man niem Manowa. Im an im waif neehn av no pikni. Wan die Jeuova sen wan ienjel tu Manowa waif. Di ienjel tel ar se: ‘Yu a-go av wan son. An a im a-go siev Izrel fram di Filistiin dem. Im a-go bi wan Nazarait.’ Yu nuo uu dem kaal wan Nazarait? Dem a did som a Jeuova speshal sorvant dem, we neehn fi kot dem ier.

Afta a taim, Manowa bwai baan, an im kaal im Samsn. Wen Samsn ton big man, Jeuova mek im chrang bad. Im did so chrang dat im kuda kil wan laiyan wid im suo-so an dem. Wan taim, im wan aal kil 30 a di Filistiin dem. Di Filistiin dem did iet im laik a duos a paizn an did a chrai aad fi kil im. Wan nait Samsn did de a wan plies niem Gaaza a sliip, an di Filistiin dem go a di siti giet go lie-wiet im kaa dem did waahn fi kil im iina di maanin. Bot Samsn git op iina di migl a di nait an ga’a di siti giet an tier it aafa di waal. Im put di giet pan im shuolda an kya it go aal di wie a di tap a wan mountn we de nier Ebran!

Som taim afta dat, di Filistiin dem go tu Samsn gorlfren we niem Dilaila, an se tu ar se: ‘Wi a-go gi yu wol iip a moni ef yu fain out a wa mek dis ya man ya so chrang. Kaa wi waahn fi kech im an lak im op iina prizn.’ Dilaila did waahn di moni, so shi se shi wuda dwi’it. No mata ou shi did a chrai, Samsn neehn tel ar wa mek im so chrang. Bot shi no tap ningi-ningi iina im iez til im kudn tek it no muo, so im en op tel ar im siikrit. Im tel ar se: ‘Kaa mi a wan Nazarait, mi neva kot mi ier yet. Ef mi kot it, mi naa go so chrang agen.’ Samsn did mek wan big mistiek fi tel ar dat, duohn?

Dilaila neehn ich. Shi go tel di Filistiin dem se: ‘Mi fain out im siikrit!’ Shi mek Samsn jrap a sliip wid im ed iina ar lap, den shi mek sumadi kot aaf im ier. Afta dat, Dilaila shout out: ‘Samsn, di Filistiin dem de ya!’ Wen Samsn wiek op, im si se im neehn chrang agen. So di Filistiin dem grab im, blain im yai dem, an lak im op iina prizn.

Wan die, wol iip a Filistiin gyada op a di plies we dem worship dem gad we niem Diegan. Dem shout out: ‘A fi wi gad mek wi kyapcha Samsn! Unu kya im kom! Mek wi ton im iina laafin stak.’ Dem put im fi tan op bitwiin tuu big kalom, an staat fi mak im. Samsn baal out tu Jeuova an se: ‘Jeuova mi Gad, du, mek mi chrang wan muo taim.’ Bai dem taim ya, Samsn ier did get bak lang agen. Im yuuz aal a im chrent an shub dong di kalom dem. Di wol bildin tombl dong an kil aaf aal a di piipl dem, an aal Samsn ded tu.