Dievid An Saal

Afta Dievid kil Golaiyat, King Saal put im inchaaj a im aami. A no likl waar Dievid win, an kaaz a dat nof piipl did nuo bout im. Enitaim Dievid kom fram waar, di uman dem wuda kom out a sing an daans an a se: ‘Saal kil nof piipl, bot Dievid kil ten taim muo!’ So Saal staat fi bad main Dievid an did waahn fi kil im.

Dievid kuda plie di aap gud. Wan die Dievid did a plie di aap fi Saal, an Saal siel im spier aafa im. Dievid dok an di spier go jam chriet iina di waal. Afta dat, Saal chrai fi kil Dievid nof muo taim. So Dievid ron we an go aid iina di dezot.

Saal kya 3,000 suoja wid im fi go ont dong Dievid. An ges wich paat dem en op? No di sed kiev we Dievid an im brejrin dem did a aid. Dievid brejrin dem wispa tu im an se: ‘Si Saal de, yu kyan go kil im ef yu waahn.’ Dievid tek im taim go we Saal de an kot aaf piis a im ruob. Saal neva nuo wa did a gwaan. Afta dat, Dievid kanchens did a kil im kaa im neva shuo rispek fi di king we Jeuova pik. So im tel di man dem fi no du notn tu Saal. Wen Saal kom outa di kiev, Dievid shout an tel im se im kuda kil im bot im neva dwi’it. Yu tingk Saal wuda tap ont dong Dievid ya nou?

Nuo sa. Saal neehn tap at aal. Wan nait Dievid an Abishai, we did fi kaal Dievid ongkl, aid an go we Saal dem did a kyamp out. Saal an im suoja dem did a sliip, aal im badigyaad we niem Abna tu. Abishai se: ‘Si Saal de! Mek mi kil im.’ Dievid se: ‘Lef im tu Jeuova mek im diil wid im. Mek wi jos tek op im spier an im waata jog an lef ya-so.’

Dievid klaim op wan mountn nier we Saal dem kyamp out. Im shout out tu dem an se: ‘Abna, yu naa du yu wok. Wich paat Saal jog an spier de?’ Saal pik op se a Dievid a taak an se: ‘Bwai, yu kuda weehn kil mi, bot yu neva dwi’it. Mi nuo se a yu a-go bi di neks king fi Izrel.’ Den Saal lef an gu baka im palis. Bot yu did nuo se a no evribadi iina Saal fambili did iet Dievid?