Dievid An Golaiyat

Jeuova tel Samwel se: ‘Mi waahn yu ga’a Jesi yaad, kaa a wan a fi’im bwai dem a-go bi di neks king fi Izrel.’ So Samwel ga’a Jesi yaad. Wen im si Jesi big son, im se tu imself: ‘A mos dis ya yuut ya Jeuova pik.’ Bot Jeuova tel Samwel se a no da wan de im pik at aal. Jeuova se: ‘Mi no jos luk pan ou piipl tan pan di outsaid, wa riili mata tu mi a wa de iina dem aat.’

Jesi kya out siks muor a im bwai dem fi Samwel si dem. Bot Samwel se: ‘A no non a dem wan ya Jeuova pik. Yu na’av no ada son?’ Jesi se: ‘Mmhm, mi av wan muo bwai, di liklis wan. Im niem Dievid, bot im no de ya. Im gaan tek kier a mi shiip dem.’ Wen Dievid kom, Jeuova tel Samwel se: ‘A da wan ya mi pik!’ So Samwel chuo som ail pan Dievid ed fi shuo se a im Gad pik fi bi di neks king fi Izrel.

Som taim afta dat, di Izrelait dem an di Filistiin dem did a waar. Di Filistiin dem did av sumadi we a fait fi dem we niem Golaiyat. Im a did wan big uol jaiyant an evridie im wuda mak di Izrelait dem. Im shout out an se: ‘Sen out wan a unu man dem fi fait mi. Ef im biit mi, wi a-go ton unu sliev. Bot ef mi win, unu ago ton fi wi sliev.’

Dievid go wich paat di Izrelait aami did de fi kya fuud fi im breda dem we a did suoja. Afta im ier we Golaiyat se, im se: ‘Mi wi go fait im!’ King Saal se tu im se: ‘Bot ya’a jos wan likl bwai.’ Dievid ansa im an se: ‘Jeuova a-go elp mi.’

Saal did waahn Dievid fi wier im aami kluoz, bot Dievid se tu im se: ‘Mi kyaahn fait iina dem kluoz ya.’ So Dievid tek op im sling-shat an ga’a wan likl riva. An im tek op faiv smuud stuon an put dem iina wan likl bag. Den im ron go op tu Golaiyat. Ier wa Golaiyat shout out: ‘Kom ya likl bwai. Mi a-go mek di bod dem an di wail animal dem nyam yu.’ Bot Dievid neehn fried. Im ansa Golaiyat loud loud an se: ‘A wan suod an wan spier yu kom ya fi fait wid, bot mi a kom fait iina Jeuova niem. Yu tingk a wi yu a fait gens? A no wi, a Gad yu a fait gens. Evribadi we de ya a-go si se suod an spier a no notn wen it kom aan tu di powa we Jeuova av. Im a-go mek wi don di wol a unu.’

Dievid tek wan a im stuon dem an put it iina im slingshat an wiil it roun aad aad. Wen im let it go, Jeuova mek di stuon lik Golaiyat iina im farid an it singk dong iina im ed. Golaiyat jrap a grong an ded sed taim. Den aal a di Filistiin dem tek fut an ron. Yu chos iina Jeuova laik ou Dievid did chos iina im?