Wan Kindom We Plit Iina Tuu

So langks Salaman did a worship Jeuova di rait wie, tingz did a gwaan gud iina Izrel. Bot Salaman marid nof uman we a neehn Izrelait we did a worship faalz gad. So likl bai likl, Salaman staat fi chienj an staat worship faalz gad tu. Dis did mek Jeuova beks bad. So im tel Salaman se: ‘Yu fambili naa go ruul uova di wol a Izrel agen; Izrel a-go plit iina tuu. An wan a yu sorvant a-go ruul uova di biga paat, an fi yu fambili a-go ruul uova di likla paat.’

Jeuova did du sitn els fi shuo se a dat im did a-go du. Wan die, wan a Salaman sorvant we niem Jerobuom, did a chravl pan wan ruod an im si di prafit we niem Ayaija. Ayaija tek im uona ruob an tier it op iina twelv piis an tel Jerobuom se: ‘Jeuova naa go mek Salaman fambili ruul uova di wol a Izrel no muo, Izrel a-go plit iina tuu set a piipl. Tek ten piis a dem ya kaaz a yu a-go ton king uova ten a di chraib dem.’ Wen King Salaman ier bout it, im did waahn kil Jerobuom! So Jerobuom ron we go a Iijip. Afta a wail, Salaman ded an im son Reyobuom ton king. So Jerobuom go baka Izrel kaa im did fiil sief ya nou.

Di uolda man dem iina Izrel tel Reyobuom se: ‘Yu si ef yu chriit di piipl dem gud, dem naa go tap sopuot yu.’ Bot Reyobuom yongga brejrin dem tel im se: ‘Mek di piipl dem si se a yu ron tingz! No iiz dem op, gi dem iivn muo wok fi du!’ Reyobuom no du a ting muo dan go fala we im fren dem se. Im did wikid tu di piipl dem, so dem ton gens im. Dem mek Jerobuom ton king fi ten a di chraib dem, an da kindom de did niem Izrel. Di ada tuu chraib dem we did stil a bak Reyobuom, fi dem kindom did niem Juuda. So Izrel twelv chraib dem did plit iina tuu.

Jeruusilem a did paat a di ieriya we Reyobuom did a ruul uova. An Jerobuom neva waahn im piipl dem fi go de go worship. Yu nuo wa mek? A kaa im did fried se di piipl wuda ton gens im an staat bak Reyobuom. So im mek tuu kou kyaaf stachu outa guol an tel im piipl se: ‘Jeruusilem de tuu faar man. Unu kyan worship ya-so.’ So dem staat fi worship di kou kyaaf dem an ton dem bak pan Jeuova agen.