Ilaija An Di Bieyal Prafit Dem Pan Mount Kaamel

A wol iip a bad king did a ruul uova di ten-chraib paat a Izrel, bot Ieyab a did wan a di wos wan. Im waif, Jezibel a did wan wikid uman we worship di faalz gad niem Bieyal. Ieyab an Jezibel did a kil aaf Jeuova prafit dem an did a chrai fi mek di piipl dem worship Bieyal. A wa yu tingk Jeuova did du bout it? Jeuova sen im prafit we niem Ilaija fi go gi Ieyab wan mesij.

Ilaija tel King Ieyab se kaaz a im iip a wikidnis, no rien naa go faal iina Izrel. So fi muo dan chrii ier, di tingz we dem plaant iina Izrel neehn a gruo an di piipl dem did onggri. Som taim afta dat, Jeuova sen bak Ilaija go taak tu Ieyab. Ieyab tel im se: ‘A yu mek dem sitn ya a apm. A bie prablem yu kaaz fi wi!’ Bot Ilaija ansa im an se: ‘A no mi mek di plies jrai so. A yu, kaa yu a worship Bieyal. Mek wi ron wan tes fi si uu a di chuu Gad. Tel di piipl an di Bieyal prafit dem fi kom kom miit op pan di tap a Mount Kaamel.’

Di piipl dem gyada op pan di mountn. Ilaija tel dem se: ‘Mek op unu main bout wa unu a-go du. Ef Jeuova a di chuu Gad, den du wa im se. Bot ef a Bieyal, den gwaan go fala im. Ier we a-go gwaan. Di 450 Bieyal prafit dem fi get wan sakrifais redi fi gi Bieyal an kaal out tu im, an mi a-go get wan sakrifais redi fi gi Jeuova an kaal out tu im. Yu si eni wan a dem we ansa wid faiya, a im a di chuu Gad.’ Di piipl dem did aarait wid dat.

So di Bieyal prafit dem get dem sakrifais redi. An wol die, dem di de a kaal out tu dem gad an a se: ‘Bieyal wi gad, ansa wi no!’ Ilaija staat mak Bieyal kaaz im neehn a ansa dem. Im se: ‘Unu kaal louda man, kaa miebi im jrap asliip an sumadi afi go wiek im op.’ Aal wen iivnin kom dong, di Bieyal prafit dem did stil a kaal out tu im. Bot nat a suol neehn ansa dem.

Ilaija put fi’im sakrifais pan wan alta an duos it wid waata. Den im prie: ‘Jeuova mi Gad, du, mek dem piipl ya si se a yu a di chuu Gad.’ Az im se so, braps! Jeuova sen dong faiya an bon op di sakrifais. Di piipl dem baal out: ‘A Jeuova a di chuu Gad!’ Ilaija se: ‘No mek non a di Bieyal prafit dem get we!’ So da die de, dem kil aaf di wol 450 Bieyal prafit dem.

Wen Ilaija si wan likl kloud kom op uova di sii, im se tu Ieyab: ‘Staam a kom. Get yu aas an bogi kyaat redi an gwaan a yu yaad.’ Di skai daak op, briiz staat bluo, an wan piis a rien bos! Ieyab did a muuv faas iina di aas an bogi kyaat. Bot Jeuova elp Ilaija fi ron faasa dan im! So yu tingk evriting did aarait fi Ilaija nou? Mek wi si.