Wen Mi Chos Iina Jeuova, A Da Taim De Mi Fiil Sief

MI STAAT FI CHOS IINA JEUOVA

Mi baan iina 1948 iina wan likl komyuuniti iina di sout paat a Naijiiriya. Dem taim de mi ongkl we niem Moustapha, mi faada likl breda, an den mi breda Wahabi, we did uolda dan mi, ton wan Jeuova Witnis. Wen mi a nain, mi faada ded. Dat did lik mi bad. Wahabi tel mi se mi kuda get fi si wi faada agen wen Gad mek im kom bak alaiv. Dat did mek mi fiil gud, so mi staat fi stodi di Baibl. Mi baptaiz iina 1963, an afta dat mi chrii ada breda dem baptaiz tu.

Iina 1965, mi go liv wid mi breda, Wilson, iina Liegos. Im did uolda dan mi. An mi get fi spen wol iip a taim wid som ada regila paiyanier iina di Igbobi Kanggrigieshan. Dem did lov di priichin wok so it did mek mi waahn fi du nof iina di priichin wok tu. So iina 1968, mi staat fi regila paiyanier.

Breda Albert Olugbebi, we did de a Betel, av wan miitn wid wol iip a wi we did yong an mek wi nuo se dem niid nof muo speshal paiyanier iina di naat paat a Naijiiriya. Mi stil memba wa im did se we push wi. Im se: “Unu yong an unu kyan yuuz di taim we unu av an di chrent we unu av fi du nof fi Jeuova. Nof wok de fi unu du.” Kaa mi did wel waahn fi du laik di prafit we did niem Aizaiya we aalwiez redi fi du wa Jeuova waahn im fi du, mi rait op di piepa sed taim fi ton wan speshal paiyanier.​—Aiz. 6:8.

Mi ton wan speshal paiyanier iina Mie 1968, an dem sen mi go a wan plies we niem Kano we de iina di naat paat a Naijiiriya. An da taim de di Biyafran Waar did a gwaan, we gwaan fram 1967-1970, an di waar kaaz nof piipl fi sofa an ded. An den di waar muuv fram de-so go a di iis paat a Naijiiriya. Wan breda chrai fi mek mi si se mi no fi go de kaa im neehn waahn notn bad fi apm tu mi, bot mi se tu im se: “Tangk yu fi a luk out fi mi, bot ef a de-so Jeuova waahn mi fi go go du im wok, mi a-go go de. An mi nuo se im a-go di de wid mi tu.”

MI STIL DID A CHOS IINA JEUOVA AAL WEN MI DID DE A WAN PLIES WE DI WAAR DID MASH OP BAD

Di waar we did gwaan did mash op Kano bad. An somtaim wen wi de iina fiil sorvis, wi aal si ded badi pan di ruod we dem kil wen di waar a gwaan. An aalduo dem did av kopl kanggrigieshan iina Kano, muos a di breda an sista dem did ron we. A les dan 15 breda an sista did lef de, an dem did fiil fried an laik se dem kyaahn go aan no muor. So dem breda an sista de did api bad wen dem sen siks a wi we a speshal paiyanier go de. An wi push dem fi gwaan sorv Jeuova, an dis did elp dem. An wi elp dem fi staat go a miitn an fiil sorvis an dem ting de agen. An it mek dem staat fi sen dem fiil sorvis ripuot go a di branch afis agen an dem staat fi aks dem fi sen dem buk an pamplet an dem ting de agen tu.

Di siks a wi chrai fi lorn di Ausa langwij, an wen di piipl dem ier bout Gad Kindom iina di Ausa langwij we dem taak, wol iip a dem staat fi lisn tu wi. Bot di piipl dem we go a di mien choch de neehn laik wa wi a du, so wi did afi kierful wen wi a priich. Wan a di taim, wan man aal ron wi dong wid wan naif. A gud ting se wi did de likl bit infronta im so im kudn kech wi. Bot aalduo wi did afi go chuu aal a dat, Jeuova no mek notn apm tu wi. An so wi staat fi av muor piipl a priich wid wi. (Sa. 4:8) An tide, a muo dan 500 breda an sista yu av iina di 11 kanggrigieshan dem we de a Kano.

DEM DID A FAIT GENS WI WEN WI DID DE IINA NAIJA

Afta mi de iina Kano fi kopl mont, iina Aagos 1968 dem sen mi an tuu ada speshal paiyanier go a Niyaame we a di kyapital a di Ripoblik a Naija. A afta dat, wi fain out se da paat de iina Wes Afrika a wan a di atis plies iina di worl. An pan tap a dat, wi did afi lorn French we a di mien langwij we di piipl dem taak. Bot aalduo wi did afi go chuu aal a dat, wi no tap chos iina Jeuova, an wi staat fi priich tu piipl wid di res a breda an sista dem we did de de. So iina nuo taim, aalmuos evribadi we de iina Niyaame we kuda riid did get wan a di buk we wi a yuuz fi stodi wid piipl we niem The Truth That Leads to Eternal Life. Piipl wuda aal jos kom op tu wi an aks wi fi wan a di buk dem!

Iina no taim, wi get fi si se di piipl dem we iina govament no laik di Jeuova Witnis dem. So iina Julai 1969, wen wi did a av wi sorkit miitn wid bout 20 piipl de, tuu piipl did di de fi get baptaiz. Bot di fos die a di sorkit miitn, di poliis kom an tap wa a gwaan. Dem tek aal a wi we a speshal paiyanier an di sorkit uovasiya go dong a di poliis stieshan. An afta dem di de a kwestiyan wi, dem tel wi se wi fi kom bak di neks die. Afta wi kech wa’a go dong, wi plan fi gi di taak we wi gi fi di wan dem we a baptaiz a sumadi yaad. An den wi kya dem go a wan riva go baptaiz dem anda di kwaiyat.

Kopl wiik afta dat, dem gi mi an di ada speshal paiyanier dem 48 owa fi lef dem konchri. Wi did afi fain wi uona wie an kom outa dem konchri. So wi go chriet a di branch afis we de iina Naijiiriya, an dem sen wi go a wan difrant plies.

Dem sen mi go a wan plies iina Naijiiriya we niem Arisonbare, an mi an di likl bit a breda an sista dem we did de de did api fi du di priichin wok an wi did a get nof piipl fi taak tu. Siks mont afta dat, di breda dem a di branch afis se mi fi go baka Naija. Wen mi did jos fain out mi did kain-a fraitn, bot afta dat mi did wel waahn fi go bak go si di breda an sista dem de agen.

Di die afta mi go baka Niyaame, wan bizniz man si se mi a wan Jeuova Witnis an staat fi aks mi som kwestiyan bout di Baibl. Mi staat fi stodi wid im, an afta dat im tap sumuok an im tap jringk nof lika, den im get baptaiz. Afta dat, mi did api fi si se aal bout iina Naija, likl bai likl, piipl staat fi kom iina di chuut. Wen mi did dis go de, a onggl 31 Jeuova Witnis did di de. An wen mi did a-go we, a 69 did di de.

“WI NO NUO UOL IIP BOUT DI PRIICHIN WOK WE A GWAAN IINA GINI”

Iina di laas paat a 1977, mi go baka Naijiiriya fi dem chrien mi. Afta di chrii wiik don we dem did a chrien mi fa, wan a di breda pan di Branch Komitii we niem Malcolm Vigo mek mi riid wan leta we kom fram di breda dem we de a di branch afis iina Siera Liyuon. Dem did a luk fi sumadi we no siki-siki, we no marid, an we kuda taak Ingglish an French fi bi wan sorkit uovasiya iina Gini. Breda Vigo mek mi nuo se a mi dem a chrien fi go de, an im mek mi nuo se it naa go iizi. So im se: “Tingk bout it bifuo yu tel mi yes.” So sed taim mi tel im se: “Kaa Jeuova a sen mi go, mi a-go go.”

Mi tek plien go a Siera Liyuon fi go taak tu di breda dem we de a di branch afis. Wan a di breda we de pan di Branch Komitii tel mi se: “Wi no nuo uol iip bout di priichin wok we a gwaan iina Gini.” Aalduo a did di breda dem we de a di branch afis iina Siera Liyuon did fi a tek kier a di priichin wok we a gwaan iina Gini, dem kudn get fi taak tu di breda an sista dem iina di konchri kaaz a wa a did a gwaan de wid palitiks. An aalduo dem chrai nof taim fi get piipl fi go de, dem kudn dwi’it. So dem aks mi fi go a Kanakri, di kyapital a Gini, fi chrai an si ef mi kuda get mi stie.

An wen mi riich a Kanakri, mi go chriet go a di Naijiiriyan embasi fi go taak tu di ambasida de. Mi tel im se mi waahn fi priich iina Gini. Im beg mi no fi tan de kaa dem mait-a lak mi op ar du mi sitn wosa dan dat. Im tel mi se: “Gu baka Naijiiriya go priich de.” Bot mi tel im se: “Mi mek op mi main se mi a-go tan de.” So im rait wan leta an aks wan a di govament minista iina Gini fi elp mi out, an im elp mi out.

Likl afta dat, mi go baka a di branch afis we de iina Siera Liyuon an tel di breda dem wa di govament minista se. Di breda dem did api so til wen dem ier ou Jeuova did bles mi an ou mi did get mi stie a Gini.

Fram 1978 tu 1989, mi did a wan sorkit uovasiya iina Gini an iina Siera Liyuon, an mi elp out wid di sorkit uovasiya wok iina Laibiiriya tu. Wen mi jos staat out, mi yuus tu fiil sik nof. An som taim wen mi sik, a iina som ieriya we de faar faar op iina di bush mi did de. Bot di breda dem wuda chrai aad fi kya mi go a aspital.

Wan a di taim dem, mi get sik bad wid malieriya an wan siknis we dem kaal intestinal worm. Wen mi get beta, mi fain out se di breda dem did tingk se mi did a-go ded, so dem did a plan wich paat dem did a-go beri mi. Bot iivn duo mi go chuu som sitn we mek mi fiil laik mi did a-go ded, mi stil neva tingk se mi fi lef di wok we Jeuova gi mi fi du. An mi nuo fi shuor se a onggl Gad kyan kip mi sief kaaz a im kyan mek wi kom bak alaiv ef wi ded.

MI AN MI WAIF CHOS IINA JEUOVA

Iina 1988, mi miit Dorcas, wan ombl paiyanier sista we lov Jeuova. An wi marid, an shi kom iina di sorkit wok wid mi. Dorcas riili lov piipl. An shi du aal a wa shi kuda du fi Jeuova an fi elp mi fi du Jeuova wok tu. Di tuu a wi wuda waak 15 mail wid wi bag an pan dem fi go a di difrant difrant kanggrigieshan dem we wi a wok wid. Fi di kanggrigieshan dem we de faara dan dat, wi wuda tek eniting we wi kuda fain fi chravl go de. An di ruod dem did ful op a uol iip a mod an patuol.

Dorcas did briev bad. Som a di taim wi did afi kraas som riva we ful op a krokodail. Wan a di taim dem wi did afi chravl fi faiv die. Di brij dem we wi did fi kraas pan did mash op so wi did afi yuuz wan buot we dem kaal kanuu fi kraas di riva. Wen Dorcas get op fi kom outa di kanuu, shi jrap iina di diip waata an non a wi kudn swim. Pan tap a dat krokodail did iina di riva. Bot mi glad se som man did de de an dem jomp iina di riva an siev ar. Fi wan gud wail, di tuu a wi did av uol iip a naitmier bout wa did apm, bot dat neva tap wi fram gwaan du Jeuova wok.

Iina di fos paat a 1992, wi did fraitn wen wi fain out se Dorcas pregnant. So wi did afi mek op wi main ef wi a-go gwaan speshal paiyanier ar wi a-go tap. Bot den wi se tu wiself se, “Jeuova gi wi wan prezent!” So wi mek op wi main fi gi wi daata di niem Jahgift. Fuor ier afta Jahgift baan, ar breda, Eric, baan. An wen wi pikni dem a gruo, wi si se dem a did riili wan gif fram Jeuova. Jahgift did a wok a di chransilieshan afis iina Kanakri, an Eric a wan ministiiriyal sorvant.

Iivn duo Dorcas did afi tap speshal paiyanier, shi did gwaan regila paiyanier wail shi a gruo di pikni dem, an Jeuova elp mi fi gwaan speshal paiyanier. An wen wi pikni dem get big, Dorcas staat fi speshal paiyanier agen. An nou di tuu a wi a mishineri iina Kanakri.

JEUOVA KIP WI SIEF

Mi go evriwe we Jeuova sen mi, an nof taim mi an mi waif si se Jeuova a kip wi sief, an wi fiil im blesn tu. Kaa wi chos iina Jeuova, it elp wi fi no schres out laik ou ada piipl wuda schres out kaa dem a ron dong moni an dem ting de. An mi an Dorcas get fi fain out se Jeuova a di onggl wan we kyan kip wi sief an we kyan gi wi laif. (1 Kr. 16:35) Mi nuo fi shuor se di piipl dem we chos iina Jeuova na’afi wori bout dem laif kaa Jeuova a-go aalwiez di de fi dem.​—1 Sam. 25:29.