Yu Yai-Waata Wot Nof Tu Jeuova

1-2. A wa a som a di sitn dem we mait-a apm tu wi we mek wi baal?

TINGZ apm tu aal a wi we mek wi api so til wi baal. Laik sopm big mait-a apm iina yu laif, laik wen yu pikni baan, ar yu memba sitn we did apm tu yu wan lang taim we mek yu api, ar yu si wan a yu fren we yu neva si fi wan lang taim.

² Bot muo taim wen wi baal, a no kaa wi api bot a kaaz a di pien we wi a fiil iina wi aat. Laik sumadi mait-a du sitn we mek wi sad bad, ar wi mait-a a baal kaa wi a fiil uol iip a pien, ar kaa wi sik bad, ar sumadi fi wi ded. Dem taim de wi mait-a fiil laik ou di prafit Jerimaiya did fiil wen di piipl dem fram Babilan did mash dong Jeruusilem. Jerimaiya se: “Waata ron laik riva outa mi yai. Mi yai dem did ful op a yai-waata, mi kudn tap baal.”​—Lam. 3:48, 49.

3. A ou Jeuova fiil wen im si im piipl dem a sofa? (Aizaiya 63:9)

³ Jeuova nuo di mount a baalin wi pudong wen wi schres out. Di Baibl mek wi nuo se Jeuova nuo evriting we di wan dem we a sorv im a go chuu, an im ier wi wen wi baal out an a aks im fi elp wi. (Sa. 34:15) Jos laik ou wen wan mada ar wan faada si dem pikni a sofa dem fiil it fi dem an dem du sitn fi elp dem, a siem so Jeuova fiil it fi wi an im naa go ich fi elp wi.​—Riid Aizaiya 63:9.

4. A uu an uu wi a-go luk pan iina da lesn ya, an wen wi luk pan dem, a wa wi a-go lorn bout Jeuova?

⁴ Wen wi riid di Baibl, it mek wi si wa Jeuova du wen im si im piipl dem we a sorv im a baal. Laik wen wi luk pan di sopm dem we Ana, Dievid, an King Ezikaiya go chuu, wi si wa mek dem did a baal so moch an wa Jeuova du fi elp dem. So ef wi a baal kaa sopm apm we mek wi sad bad, ar wi a baal kaa sumadi sel wi out, ar wi jos fiil laik a it dat fi wi, wen wi luk pan wa dem chrii sumadi ya did go chuu, it kyan elp wi fi fiil beta.

WEN WI A BAAL KAA WI SAD BAD

5. A ou wa Ana did a go chuu did mek ar fiil?

⁵ A uol iip a prablem did a gwaan iina Ana laif, so a bie baalin shi did a pudong. Wan a di ting dem we did a gwaan a dat ar ozban did av tuu waif an di neks waif neehn laik ar at aal. An ef yu tingk se a de-so it don, shi kudn av no pikni niida, bot di neks waif we niem Penina did av uol iip a pikni. (1 Sam. 1:1, 2) Kaa Ana kudn av no pikni, Penina no tap laaf aafa ar an mak ar. A ou yu wuda fiil ef a yu dat did apm tu? Di wie ou Ana did fiil it, shi wuda “baal an no nyam no fuud,” an ar “aat did a tier op insaida ar.”​—1 Sam. 1:6, 7, 10.

6. A wa Ana did du fi fiil beta?

⁶ Wan a di ting we did elp Ana a dat shi go a Gad ous go worship im. An shi did de nier fi go iina di yaad we Gad ous de wen “shi staat prie tu Jeuova an shi kudn tap baal.” Shi beg Jeuova se: “Ef yu kuda jos luk pan wa mi a go chuu an memba mi.” (1 Sam. 1:10b, 11) So wi si se Ana mek Jeuova nuo evriting we did a gwaan iina ar aat. An wen Jeuova si umoch Ana did a baal, im did fiil it fi ar an im did waahn fi elp im pikni we im si a sofa.

7. A ou Ana did fiil afta shi did tel Jeuova evriting we a gwaan iina ar aat?

⁷ Afta Ana prie tu Jeuova an tel im evriting we a gwaan iina ar aat an Iilai did mek ar nuo se evriting a-go aarait, di Baibl se: “Ana nyam ar fuud an go bout ar bizniz, an ar fies neehn luk lang dong no muor.” (1 Sam. 1:17, 18) Aalduo tingz neehn chienj fi Ana, shi did stil fiil beta kaa shi did chuo ar bordn pan Jeuova. Jeuova si di schres we shi did a go chuu an im ier wen shi a baal out tu im, an a das wai im bles ar so shi kuda av wan pikni.​—1 Sam. 1:19, 20; 2:21.

8-9. Bies pan wa Iibruu 10:24, 25 se, wa mek wi fi du evriting wi kyan du fi go a wi miitn dem? (Luk pan di picha tu.)

⁸ Dis a wa wi kyan lorn fram Ana. Ef sitn a apm iina wi laif we mek wi baal kaa wi sad bad, laik sumadi fi wi ded, wen sopm laka dat apm, yu mait-a jos waahn fi de bai yuself. Bot jos laik ou Ana neehn tap go a Gad ous, yu no fi tap go a di miitn dem aal wen yu no fiil fi go, kaa a wen yu du dat it a-go elp yu fi fiil beta. (Riid Iibruu 10:24, 25.) Wen wi go a di miitn dem an wi ier dem riid di Baibl, it gi wi som uol iip a gud sitn fi tingk bout an a so Jeuova elp wi fi tek wi main aafa di sitn dem we a bada wi. Dat a-go elp wi fi diil wid ou wi a fiil aalduo tingz mait no get beta fi wi siem taim.

⁹ Wen wi go a wi miitn dem, wi get fi spen taim wid wi breda an sista dem we mek wi nuo umoch dem lov wi an we kyan fiil it fi wi wen wi a go chuu wi prablem dem, an it mek wi fiil beta. (1 Tes. 5:11, 14) Mek wi luk pan wa wan breda we yuuz muos a im taim iina Jeuova sorvis a go chuu wen im waif did ded. Im se: “Mi stil baal. Somtaim mi wuda jos go iina wan kaana an jos staat baal. Bot wen mi go a di miitn dem, di breda an sista dem se som nais sitn tu mi we mek mi fiil gud. No mata ou mi did a wori wori an fret fret op miself bifuo mi ga’a di miitn dem, afta mi go de mi fiil beta.” So wen wi de a wi miitn dem, Jeuova kyan yuuz wi breda an sista dem fi elp wi.

10. A ou wi kyan du laik Ana wen sopm apm tu wi we mek wi a fret an wori wori op wiself?

¹⁰ Afta Ana did prie tu Jeuova an mek im nuo evriting we a gwaan iina ar aat, shi did fiil beta. An a siem so ‘evriting we wi a wori an fret bout, wi fi gi it tu Jeuova’ kaa wi nuo se im a-go elp wi. (1 Pii. 5:7) Wan sista we tiif did kil ar ozban se: “Mi fiil laik mi aat did a tier op insaida mi an mi wuda neva fiil beta, bot wen mi prie tu Jeuova mi fiil beta. Som a di taim dem, mi kudn iivn fain di wod dem fi se tu Jeuova, bot mi nuo se im andastan wa mi did a go chuu. Wen mi did sad bad an a fret an wori wori op miself, mi wuda beg Jeuova fi gi mi piis iina mi aat an main. Den mi wuda jos fiil wan piis iina mi aat an main an den mi wuda fiil laik mi kyan go aan.” So wen wi baal tu Jeuova an tel im evriting we a gwaan iina wi aat an main, im si wa wi a go chuu an im fiil it fi wi. So iivn ef som a di taim yu stil fiil laik yu a wori wori an fret op yuself, Jeuova kyan osh yu an mek yu fiil wan piis iina yu aat an main. (Sa. 94:19; Fil. 4:6, 7) An memba se im a-go du som uol iip a gud sitn fi yu kaa yu tan op chrang an du wa im waahn yu fi du.​—Iib. 11:6.

WEN WI A BAAL KAA SUMADI SEL WI OUT

11. A ou Dievid did fiil kaaz a aal a di sopm dem we im did a go chuu?

¹¹ A uol iip a tingz Dievid go chuu iina im laif we mek im baal. Nof taim piipl did a fait gens im, an som a di taim aal piipl uu im did chos sel im out. (1 Sam. 19:10, 11; 2 Sam. 15:10-14, 30) Wan a di taim im rait se: “Mi baal so til mi wiik; mi baal fi di uol a di nait so til mi yai-waata suok di bed; aal mi setii suok di wie ou mi did a baal.” Dievid did mek wi nuo se im did a baal “kaaz a aal a di piipl dem we did a bada bada [im].” (Sa. 6:6, 7) So wi si se a kaaz a aal a di bad sopm dem we dem piipl de did du tu Dievid mek im fiil so sad an did a baal so.

12. Bies pan Saam 56:8, a wa Dievid did nuo fi shuor se?

¹² Iivn duo Dievid did go chuu so moch iina im laif, im did nuo fi shuor se Jeuova lov im. Im rait an se: “Jeuova a-go ier mi wen mi baal tu im.” (Sa. 6:8) An wan neda taim Dievid se sitn we toch wi aat a Saam 56:8. (Riid.) Wa Dievid se mek wi kyan picha ou Jeuova fiil it fi wi an kier fi wi wen wi a go chuu wi prablem dem. Dievid did fiil laik se Jeuova a kech im yai-waata iina wan bakl an a rait dem dong iina wan buk. Im did nuo fi shuor se im Faada Jeuova we lov im an a si im nuo evriting we im a go chuu.

13. Wa kyan elp wi fi fiil beta wen sumadi du sitn fi ort wi? (Luk pan di picha tu.)

¹³ Dis a wa wi kyan lorn fram Dievid. Sumadi we yu chos du sitn fi ort yu an yu afi a diil wid it? Ar sumadi sel yu out, ar sumadi we yu did a taak tu fi marid tu ar sumadi we yu marid tu jos git op an lef yu? Ar sumadi we yu lov tap sorv Jeuova? Wi nuo se ef dem sopm ya apm tu yu, it kyan mek yu fiil laik se yu aat a tier op insaida yu. Wan breda we im waif gi im bon an lef im se: “Mi kudn biliiv it wen mi waif jos git op an lef mi so. Mi fiil laik mi neehn av no yuus an mi did sad an beks bad tu.” Ef yu a go chuu notn laik dis, yu kyan fiil gud fi nuo se Jeuova naa go lef yu. Di breda se: “Mi get fi riyalaiz se piipl kyan lef yu an figet bout yu, bot Jeuova naa go lef wi at aal; im komiin laik wan rak. Jeuova naa go eva lef di wan dem we a stik tu im.” (Sa. 37:28) An memba se nobadi kyaahn lov wi laik ou Jeuova lov wi. So iivn duo sumadi mait-a lef yu ar sel yu out an mek yu a fiil pien iina yu aat, dat naa go mek Jeuova no kier bout yu no muor an it na’av notn fi du wid ou Jeuova fiil bout yu. (Ruo. 8:38, 39) So memba se no mata ou sumadi chriit yu, Jeuova lov yu kyaahn don!

14. Wa Saam 34:18 se we kyan elp wi fi fiil gud?

¹⁴ Wen wi afi a diil wid it kaa sumadi sel wi out, wi kyan fiil beta wen wi luk pan wa Dievid did se a Saam 34:18. (Riid.) Im did a mek wi nuo se ef wi fiil laik wi “taiyad an waahn gi op,” jos laik wan faada ar wan mada we de de fi dem pikni wen dem a go chuu sitn we a schres dem out, a siem so Jeuova “de de” fi di piipl dem we dem aat a tier op insaida dem. So im aalwiez a-go de de fi elp wi. Im wel waahn fi elp wi so dat wi no fiil laik se wi aat a tier op insaida wi. An im gi wi nof nof gud sitn we wi kyan luk faawod fi get we kyan elp wi fi eng aan an go chuu wi prablem dem ya nou.​—Aiz. 65:17.

WEN WI A BAAL KAA WI FIIL LAIK A IT DAT FI WI

15. A wa did apm tu Ezikaiya we mek im baal?

¹⁵ Wen King Ezikaiya did a 39, im fain out se im did sik bad. Di prafit Aizaiya mek im nuo se Jeuova se im naa go get beta, im a-go ded. (2 Ki. 20:1) Wen Ezikaiya ier dis, im baal an baal so til an den im prie tu Jeuova fram diip dong iina im aat an beg im fi elp im.​—2 Ki. 20:2, 3.

16. A wa Jeuova did du wen im ier Ezikaiya a baal out tu im?

¹⁶ Jeuova did fiil it wen im ier Ezikaiya a baal out tu im an im se tu Ezikaiya se: “Mi ier yu wen yu a prie an mi si wen yu a baal. Mi a-go mek yu get beta.” Jeuova yuuz di prafit Aizaiya fi mek Ezikaiya nuo se Im a-go mek im get fi liv lang an im a-go siev di piipl dem iina Jeruusilem fram di Asiriyan dem.​—2 Ki. 20:4-6.

17. A ou Jeuova elp wi wen wi sik bad an wi fiil laik wi kyaahn manij no muor? (Saam 41:3) (Luk pan di picha tu.)

¹⁷ Dis a wa wi kyan lorn fram Ezikaiya. Ef yu sik bad an yu fiil laik se no uop no de fi yu get beta, prie tu Jeuova, aal ef yu iivn afi baal out tu im. Di Baibl mek wi nuo se im a “di Gad we elp piipl wen dem niid it an we osh dem wen dem sad.” So no mata wa wi a go chuu, im a-go elp wi. (2 Kor. 1:3, 4) Wi nuo se Jeuova naa go get rid a aal a wi prablem dem nou, bot wi nuo se im a-go elp wi fi diil wid dem. (Riid Saam 41:3.) Im a-go yuuz im uoli spirit fi mek wi waiz an fi gi wi di chrent fi diil wid eniting we wi av fi diil wid, an im a-go mek wi fiil wan piis iina wi aat an main. (Pr. 18:14; Fil. 4:13) An wen wi riid di Baibl an si se di taim a-go kom wen nobadi naa go sik, dat elp wi fi go chuu ya nou tu.​—Aiz. 33:24.

18. Yu av no vors iina di Baibl we elp yu fi fiil beta wen yu a go chuu wan rof taim? (Luk pan di paat we niem “Som Baibl Vors We Kyan Elp Wi Wen Wi A Baal.”)

¹⁸ Wa Jeuova se tu Ezikaiya did mek im fiil beta. A siem so wi kyan fiil beta wen wi a go chuu wi prablem dem an wi riid Gad Wod. Jeuova av tingz iina im Wod di Baibl we kyan mek wi fiil beta wen wi a go chuu wi prablem dem. (Ruo. 15:4) Afta wan sista we liv iina Wes Afrika fain out se shi av kyansa, shi baal an baal so til. Shi se: “Wan a di skripcha dem we elp mi fi go chuu a Aizaiya 26:3. Nof a di taim wi na’av no kanchuol uova di ting dem we wi go chuu iina laif. Bot da vors de elp mi fi si se Jeuova kyan gi mi piis iina mi aat an main so dat mi kyan diil wid wa mi a go chuu.” Yu av no vors iina di Baibl we elp yu fi go chuu yu prablem dem aal di wan dem we luk laik se yu kyaahn go diil wid dem?

19. Wa a som a di nais sitn dem we a-go apm iina di fyuucha?

¹⁹ Rait ya nou wi a liv iina di taim wen di worl suun don, so wi nuo se uol iip a tingz a-go apm we mek wi baal muor an muor. Bot wen wi luk pan wa did apm tu Ana, Dievid, an King Ezikaiya, wi si se Jeuova si wen wi a baal an im fiil it fi wi. So wen notn a apm tu wi we a mek wi baal an wi baal an tel Jeuova evriting we a gwaan iina wi aat, im a-go fiil it fi wi an elp wi. So no mek wi kip we fram wi breda an sista dem we lov wi so moch. An mek wi gwaan luk iina Jeuova Wod fi si di sitn dem iin de we kyan mek wi fiil beta. Wi kyan nuo fi shuor se ef wi eng aan an tan op chrang an no gi op, Jeuova naa go ramp fi bles wi. An memba se di taim a-go kom wen nobadi naa go baal kaa dem sad bad, kaa piipl sel dem out, ar kaa dem fiil laik se a it dat. (Rev. 21:4) Dem taim de, wi onggl a-go baal kaa wi api kyaahn don.