Mek Jeuova Osh Yu Wen Yu Sad

1. Tel wi wa did apm tu di Juu piipl dem we dem did tek we go a Babilan.

TINGK bout ou di Juu piipl dem mos did fiil wen dem si wich paat dem kom fram mash op. Kaa di Juu piipl dem neehn lisn tu wa Jeuova se, im lou di Babilan piipl dem fi tek dem we an kya dem go a Babilan. (2 Kr. 36:15, 16, 20, 21) Ye, dem kuda gwaan liv dem laif iina Babilan. (Jer. 29:4-7) Bot laif neehn iizi fi dem stil, an a no da kain-a laif de dem wuda waahn. Dem did fiil laik di man we rait wan a di Saamz dem we taak bout se ‘wen dem did de a di riva dem a Babilan, im baal wen im tingk bout Zaiyan we im a kom fram.’ (Sa. 137:1) Ye man, dem piipl ya did niid sumadi fi osh dem. Bot a uu kuda du dat fi dem?

2-3. (a) Wa Jeuova did du fi di Juu piipl dem we did de dong a Babilan? (b) Wa wi a-go luk pan iina da lesn ya?

² Jeuova a ‘di Gad we osh wi wen wi sad.’ (2 Kor. 1:3) So im lov fi osh di wan dem we jraa nier tu im wen dem sad. An Jeuova did nuo se som a di Juu piipl dem we dem did tek we kya go a Babilan wuda tek di jraa op we dem get an staat sorv im agen. (Aiz. 59:20) So bout onjrid ier bifuo dem did tek dem we kya go a Babilan, im did mek di prafit Aizaiya rait se: “‘Unu fi osh mi piipl dem, osh dem,’ a dat unu Gad se.” (Aiz. 40:1) So wa Jeuova mek Aizaiya rait se did elp di piipl dem we dem did tek we fi fiil beta.

³ Jos laik ou di Juu piipl dem we did iina Babilan did niid sopm fi mek dem fiil beta, a siem so som a di taim wi niid sopm fi mek wi fiil beta tu. So iina da lesn ya, wi a-go luk pan chrii a di sopm dem we Jeuova did du fi osh di Juu piipl dem an mek dem fiil beta: (1) Im did pramis dem se ef dem sari fi wa dem du an tap du it, im a-go paadn dem, (2) im did gi dem sitn gud fi luk faawod tu, an (3) im osh dem wen dem did a fret an wori wori op demself. So wi a-go luk pan dem chrii sopm ya an si ou wa Jeuova did se tu dem kyan elp wi.

KAA JEUOVA GUD AN KAIN, IM PAADN WI

4. Wa Jeuova du fi shuo se im gud an kain? (Aizaiya 55:7)

⁴ Jeuova a “di Faada we gud an kain tu evribadi.” (2 Kor. 1:3) An im mek wi si se a so im tan wen im did redi fi paadn di Juu piipl dem we did de dong a Babilan. (Riid Aizaiya 55:7.) Im mek dem nuo se im wuda stik tu dem an paadn dem. (Aiz. 54:8) An Jeuova did shuo se im gud an kain tu dem kaa aalduo tingz did a apm tu dem kaaz a wa dem did du, Jeuova pramis dem se im neehn did a-go mek dem tan dong a Babilan fi eva. (Aiz. 40:2) Wa Jeuova did se mos did mek di wan dem we did sari fi wa dem du fiil gud!

5. Wa mek wi av muo riizn dan di Juu piipl dem fi nuo se Jeuova gud an kain?

⁵ Wi lorn se Jeuova redi fi paadn im piipl dem fi aal a wa dem du. An wi av muo riizn dan di Juu piipl dem fi nuo se Jeuova redi fi paadn im piipl dem kaa wi nuo wa mek Jeuova kyan paadn wi sin dem. Kaa uol iip a ier afta Aizaiya did se dem sopm de wuda apm, Jeuova did sen Jiizas fi ded fi di wan dem we sari fi wa dem du so dat Im kuda “tek we [dem] sin dem” fi gud. (Aks 3:19; Aiz. 1:18; Ifii. 1:7) Jeuova riili gud an kain tu wi, no chuu?

6. Wen wi tingk bout ou Jeuova gud an kain, ou it kyan elp wi? (Luk pan di picha tu.)

⁶ Wa Jeuova did mek Aizaiya rait a Aizaiya 55:7 kyan elp wi fi fiil beta ef wi stil fiil gilti bout sitn we wi did du. Kaa lang afta som a wi sari fi di rang sitn we wi du an tap dwi’it, wi mait-a stil a fiil gilti bout it. An dat mait-a apm tu wi wos ef tingz stil a apm tu wi kaaz a wa wi did du. Bot ef wi did mek di elda dem nuo bout wa wi du an wi tap dwi’it, wi kyan nuo fi shuor se Jeuova paadn wi. An wen Jeuova paadn wi, im naa go memba wa wi did du. (Luk pan Jerimaiya 31:34.) So ef Jeuova naa tingk bout di rang sitn dem we wi did du, wi no fi tingk bout it niida. Wa Jeuova de luk pan a wa wi a du rait ya nou, no pan di bad sitn dem we wi did du aredi. (Izii. 33:14-16) An memba se suun suun, Jeuova wi Gad we gud an kain tu wi, a-go mek di bad sitn dem we a apm tu wi kaaz a wa wi did du tap apm.

7. Wa kyan mek wi go taak tu di elda dem ef wi did sin bad an neehn mek nobadi nuo bout it?

⁷ Bot wa ef wi fain se wi kanchens a bada wi kaa wi did sin bad an wi neehn mek di elda dem nuo bout it laik wa di Baibl se wi fi du? (Jmz. 5:14, 15) It mait no iizi fi wi go an tel di elda dem wa wi du, bot ef wi memba se dem man ya an Jeuova gud an kain, it wi elp wi fi go taak tu dem. Luk ou kaa Jeuova gud an kain, it did mek wan breda we niem Arthura fiil beta. Im se: “A bout wan ier mi did a luk pan bluu muuvi an dem ting de fa, bot afta mi ier wan breda gi wan taak bout ou wi fi kip wi kanchens kliin, mi mek mi waif an di elda dem nuo wa mi did du. An mi a tel yu se afta dat, it did mek mi fiil beta. Bot mi did stil fiil gilti bout di sitn dem we mi did du. Bot di elda dem mek mi nuo se Jeuova no dash mi we, an se Jeuova jraa wi op kaa im lov wi. Wen dem tel mi dat, it did mek mi fiil gud an mek mi staat fi tingk bout tingz iina di rait wie agen.” Rait ya nou Arthur a wan paiyanier an wan ministiiriyal sorvant. It riili nais fi nuo se Jeuova gud an kain tu wi wen wi sari fi di rang sitn dem we wi du an tap dwi’it.

JEUOVA GI WI SITN GUD FI LUK FAAWOD TU

8. (a) Wa Jeuova did tel di Juu dem iina Babilan se we dem kuda luk faawod fi get? (b) Azkaadn tu Aizaiya 40:29-31, ou dem wuda fiil kaa dem av sopm a luk faawod fi get?

⁸ Wen wi luk pan it, it luk laik se di Juu dem wudn kyan kom outa Babilan, kaa wen Babilan kyapcha nobadi, dem wudn let dem go. (Aiz. 14:17) Bot Jeuova did gi dem sitn we dem kuda luk faawod tu. Im pramis dem se im wuda frii dem, an notn kudn tap im fram dwi’it. (Aiz. 44:26; 55:12) Jeuova did luk pan Babilan laik likl dos we wuda iizi fi im get rid a. (Aiz. 40:15) Wid jos likl bit a briiz, aal a di dos wuda gaan. So kaa dem did av sopm gud fi luk faawod tu, it wuda mek dem fiil beta. Bot no onggl dat, Aizaiya did rait se: “Di wan dem we a wiet pan Jeuova fi gi dem di gud sitn dem we dem a luk faawod fi get a-go get chrang agen.” (Riid Aizaiya 40:29-31.) Kaa dem did av sitn gud a luk faawod fi get, dem wuda “av powa fi kip dem a go op an op laik se dem av iigl wing.”

9. Wa mek di Juu dem dong a Babilan kuda chos se Jeuova wuda du wa im pramis dem se im wuda du?

⁹ Jeuova did mek di Juu dem we dong a Babilan si se dem a-go get wa im pramis dem fi chuu, kaa dem did si som ada tingz we Jeuova se a-go apm apm. Laik dem did si se Asiriya did tek uova di chraib dem we did de iina di naat paat a Izrel an kyapcha dem jos laik wa Jeuova se dem wuda du. (Aiz. 8:4) An dem si se di Babiluoniyan dem did mash op Jeruusilem an kyapcha di piipl dem de tu, jos laik wa Jeuova se. (Aiz. 39:5-7) An dem si fi demself se dem blain aaf King Zedikaiya an kya im go a Babilan. (Jer. 39:7; Izii. 12:12, 13) So dem si se evriting we Jeuova se wuda apm, it apm fi chuu. (Aiz. 42:9; 46:10) Wen dem tingk bout aal a dis, it mos did mek dem chos iina wa Jeuova se muor wen im pramis dem se im a-go frii dem.

10. Iina dem laas die ya, wa kyan elp wi fi gwaan luk faawod fi get di sitn dem we Jeuova pramis wi?

¹⁰ Wi lorn se kaa wi av sitn gud a luk faawod fi get, it kyan osh wi an elp wi fi go aan wen wi fiil laik wi kyaahn go aan no muor. An dis a sitn we wi riili niid kaa wi liv iina di laas die dem we tingz a get aad aad an piipl wikid bad. Bot wi kyan stil go aan kaa Jeuova mek wi nuo se di taim a-go kom wen wi a-go liv fi eva iina piis. Wen wi kip dem sitn de iina wi main an aat, dem a-go elp wi fi go aan. Bot ef wi no du dat, di ting dem we wi a luk faawod fi get wuda komiin laik wi a luk pan wan priti plies chuu wan doti glaas winda. Ou wi kyan mek shuor se di sitn dem we wi a luk faawod fi get, it no komiin laik se wi a luk pan dem chuu wan doti winda we mek wi kyaahn si dem gud? Wi kyan du dat wen wi gwaan tingk bout wa laif a-go komiin laik iina di nyuu worl, an wen wi riid di buk an pamplet dem, an wach di difrant difrant vidiyo dem, an lisn tu di sang dem we taak bout Paradais. An wi kyan prie tu Jeuova an tel im bout di sitn dem we wi a luk faawod fi si apm.

11. Wa did elp wan sista we did sik bad fi get chrang agen?

¹¹ Mek wi luk pan ou Jeuova osh wan sista we niem Joy an gi ar di chrent kaa shi av sitn gud fi luk faawod tu wen shi did sik bad. Shi se: “Wen mi did fiil laik se it did tu moch fi mi an mi kudn go aan, mi tel Jeuova ou mi fiil kaa mi nuo se im wuda andastan ou mi fiil ‘an im gi [mi] di powa’ fi go aan.” (2 Kor. 4:7) An shi si arself iina di nyuu worl we “nobadi we liv de naa go se: ‘Mi sik.’” (Aiz. 33:24) Wen wi tel Jeuova evriting we gwaan iina wi aat tu, an wi tingk bout aal a di gud sitn dem im a-go du fi wi iina di nyuu worl, it a-go elp wi fi get chrang agen.

12. Wa a som riizn we mek wi kyan chos se Jeuova a-go du di sitn dem we im pramis wi? (Luk pan di picha tu.)

¹² Jos laik ou Jeuova did gi di piipl dem iina Babilan nof riizn fi chos se im a-go gi dem di sitn dem we im pramis dem, a siem so im gi wi nof riizn fi mek wi nuo se im a-go du di sitn dem we im pramis se im a-go du. Laik im did tel wi bout di govament we a-go ron tingz iina di worl we “a-go chrang bot it a-go kain-a wiik tu.” (Dan. 2:42, 43) An im did mek wi nuo se “ortkwiek a-go kom shiek op difrant difrant plies,” an im tel wi se wi a-go “priich aal uova di worl.” (Mat. 24:7, 14) An wi si aal a dem sopm ya we im se wuda apm a apm. So wi kyan chos se wa Jeuova se a-go apm, a dat a-go apm fi chuu an dat kyan osh wi an mek wi fiil gud.

JEUOVA OSH WI WEN WI A FRET AN A WORI WORI OP WISELF

13. (a) Wa a som a di prablem dem di Juu piipl dem iina Babilan wuda go chuu bifuo Jeuova frii dem? (b) Azkaadn tu Aizaiya 41:10-13, ou Jeuova did osh dem?

¹³ Aalduo Jeuova did elp di Juu dem dong a Babilan fi fiil beta kaaz a di sitn dem we dem did a luk faawod fi get, im did nuo se dem wuda go chuu uol iip a prablem bifuo im frii dem. Im did tel dem se da taim de suun kom wen wan king wuda mash op di plies dem we de nier Babilan an den ton pan Babilan tu. (Aiz. 41:2-5) Bot Jeuova mek dem nuo se dem neehn afi wori an fret kaaz im tel dem se: “No fried, kaa mi de de wid yu. No fret an wori wori op yuself kaa mi a yu Gad.” (Riid Aizaiya 41:10-13.) Wen Jeuova tel dem se: “Mi a yu Gad,” im did a mek dem memba se im a-go di de fi dem.​—Sa. 118:6.

14. Wa els Jeuova did du fi elp di Juu dem fi no wori an fret?

¹⁴ Jeuova elp di Juu dem fi memba se im a di Wan we av aal a di powa an a im nuo evriting. An dat did elp dem fi no wori an fret. Im tel dem se fi luk op iina di skai pan di staar dem. An im mek dem nuo se im no onggl mek dem, bot im nuo aal a dem bai dem niem. (Aiz. 40:25-28) An a siem so im nuo evribadi we sorv im bai dem niem tu. An ef Jeuova av di powa fi mek di staar dem, wi nuo fi shuor se im av di powa fi elp im piipl dem. So di Juu dem neehn av no riizn fi fried ar wori op demself.

15. A ou Jeuova did redi op di Juu dem fi wa did a-go gwaan?

¹⁵ Jeuova elp dem fi redi op demself fi wa wuda apm, kaaz iina Aizaiya im did tel dem se: “Gwaan iina unu ruum dem go aid. An lak di duor dem baka unu, an wiet likl bit til di jojment don.” (Aiz. 26:20) Wa dis se mait-a did apm fos wen Sairos did tek uova Babilan. Wan man fram Griis, we taak bout tingz we apm fram lang taim, se wen Sairos did go iina Babilan, im “did tel di suoja dem se dem fi kil evribadi we de outa duor.” So di Babilan piipl dem wuda fried! Bot notn wuda apm tu di Juu dem we did du wa Jeuova tel dem fi du.

16. Wa mek wi na’afi wori an fret so moch bout wa a-go apm iina di fyuucha? (Luk pan di picha tu.)

¹⁶ Wi lorn se wen di wos sofarieshan staat, di piipl dem iina di worl a-go fried an no nuo wa fi du. Bot dat naa go apm tu Jeuova piipl dem kaa wi nuo se a Jeuova a fi wi Gad. An wi nuo se “di taim fi frii [wi] suun kom.” (Luuk 21:28) Aal wen som konchri we a wok tugeda kom kom fait gens wi, wi stil a-go chos iina Jeuova. Jeuova a-go yuuz im ienjel dem fi protek wi an im a-go tel wi wa fi du so dat wi kyan kip sief tu. Wi no nuo ou im a-go dwi’it, so wi afi wiet an si. Im mait-a yuuz di breda dem iina di kanggrigieshan fi tel wi dem sitn de. So di kanggrigieshan a-go komiin laik di “ruum dem” we wi fi go iina fi kip sief. Wa kyan elp wi fi redi op wiself fi dem taim de? Wan ting we wi fi du a get kluos tu wi breda an sista dem, du di ting dem we Jeuova aaganaizieshan tel wi fi du, an nuo fi shuor se a Jeuova a mek im aaganaizieshan nuo wa fi du.​—Iib. 10:24, 25; 13:17.

17. Ou wi kyan mek Jeuova bi di Wan we osh wi wen wi sad?

¹⁷ Aalduo di Juu dem we did de dong iina Babilan did afi go chuu som rof taim, Jeuova did gi dem wa dem niid fi osh dem. An a di siem ting im a-go du fi wi tu. So wi na’afi wori an fret bout wa a-go apm, aal wi afi du a gwaan mek Jeuova bi di Wan we osh wi wen wi sad. An nuo se Jeuova gud an kain tu wi. An wi fi gwaan tingk bout di gud sitn dem we a-go apm iina di fyuucha. An memba se yu na’afi fried a notn kaa Jeuova a yu Gad.