Elp Yu Baibl Stodi Dem Fi Mek Op Dem Main Fi Sorv Jeuova

1-2. (a) Wa mek som a di piipl dem we wi stodi di Baibl wid mait-a fain it aad fi mek op dem main fi sorv Jeuova? (b) Wa wi a-go luk pan iina da lesn ya?

WEN yu did a stodi di Baibl bifuo yu ton wan Jeuova Witnis, yu did av som sitn we yu did a if-an-bot an a wanda-wanda bout? Laik yu mait-a did fried se yu fren dem, ar yu fambili, ar di piipl dem we yu wok wid mait-a ton gens yu. Ar yu mait-a did fiil se yu kyaahn go du di sitn dem we Jeuova waahn yu fi du. Ef non a dem sitn de did apm tu yu, yu kyan andastan wa mek di piipl dem we yu stodi di Baibl wid mait-a fain it aad fi mek op dem main fi sorv Jeuova.

² Jiizas did nuo se di sitn dem we wi jos taak bout kyan tap sumadi fram sorv Jeuova. (Mat. 13:20-22) Bot Jiizas neehn gi op pan di wan dem we did a if-an-bot an wanda-wanda ef dem fi fala im. Wa im du a dat im elp im falara dem fi elp dem piipl ya. Laik im shuo dem (1) ou dem kyan elp piipl fi fain out wa an wa a mek it aad fi dem sorv Jeuova, an (2) ou dem kyan elp dem fi lov Jeuova muor an muor, an (3) im shuo dem ou dem kyan elp piipl fi put Jeuova bizniz fos iina dem laif, an (4) im shuo dem wa dem kyan du wen piipl a fait gens dem. Ou wi kyan du di sitn dem we Jiizas did tel im falara dem fi du wen wi a yuuz di Yu Kyan Bi Api Nou An Fi Eva! buk wen wi a stodi di Baibl wid piipl so dat dem kyan mek op dem main fi sorv Jeuova?

ELP DI SUMADI WE YU STODI WID FI FAIN OUT WA AN WA A MEK IT AAD FI DEM FI SORV JEUOVA

3. Wa mait-a did mek it aad fi Nikodiimos ton wan a Jiizas falara dem?

³ Nikodiimos a did wan a di tap-a-tap Juu liida dem, bot sitn did mek it aad fi im ton wan a Jiizas falara dem. A did onggl siks mont afta Jiizas staat fi priich an tiich Nikodiimos did get fi si se a Gad did sen Jiizas kom. (Jan 3:1, 2) Bot kaa ‘im did fried a wa di Juu liida dem wuda du,’ im go taak tu Jiizas anda di kwaiyat. (Jan 7:13; 12:42) Im mait-a did tingk se it wuda tuu aad fi im gi op aal a wa im did av fi ton wan a Jiizas falara dem.a

4. A wa Jiizas did du fi elp Nikodiimos fi nuo wa Gad waahn im fi du?

⁴ Nikodiimos did nuo nof bout di Laa we Gad did gi Muoziz, bot im did niid fi nuo wa an wa im niid fi du fi mek Jeuova api. So fi elp im fi nuo dat, Jiizas did redi fi yuuz im taim fi elp im, aal iina di nait im did sidong wid im an tiich im. An Jiizas did mek im nuo klier klier wa im did niid fi du fi ton wan a im falara dem. Im tel im se im niid fi sari fi di bad sitn dem we im du an tap du dem, an get baptaiz, an im afi chos iina Gad Bwai Pikni tu.​—Jan 3:5, 14-21.

5. Ou wi kyan elp sumadi we wi stodi wid fi si wa a tap im fram sorv Jeuova?

⁵ Aal wen wi Baibl stodi nuo di Baibl gud gud, wi stil mait-a afi elp im fi si wa a tap im fram sorv Jeuova. A kuda di wok we im av, ar kaa im fambili a fait gens im mek im naa sorv Jeuova. So du laik Jiizas an tek di taim fi elp yu Baibl stodi. Yu kuda tel im fi kom uova yu yaad fi iit som fuud ar di tuu a unu kuda go out an go somwe. Wen yu du dem sitn ya, im mait-a tel yu bout som sitn we a gwaan iina im laif. An dat a-go elp yu fi nuo wa a mek it aad fi im fi mek op im main fi sorv Jeuova, an den yu kuda elp im fi si wa an wa im niid fi du fi chienj op tingz iina im laif. Bot mek im memba se im fi dwi’it, no fi mek yu api, bot fi mek Jeuova api.

6. Wa yu kyan du fi elp di sumadi we yu a stodi wid fi no fried fi du di sitn dem we dem a lorn? (1 Korintiyan 16:13)

⁶ Wen sumadi we a stodi di Baibl nuo fi shuor se Jeuova a-go elp dem fi liv di wie ou im waahn dem fi liv, dat a-go elp dem fi no fried fi du di sitn dem we dem a lorn. (Riid 1 Korintiyan 16:13.) It wuda komiin laik se yu a wan skuul tiicha. Duohn wen yu did a go a skuul yu did lov di tiicha dem we neehn jos shuo yu ou yu fi du yu skuul wok bot we mek yu fiil laik se yu kyan riili dwi’it? A siem so wan gud Baibl tiicha naa go jos tel di piipl dem we im a stodi wid wa dem niid fi du fi mek Jeuova api, bot im a-go mek dem nuo se dem kyan dwi’it kaa Jeuova a-go elp dem. So ou yu kyan du dat?

OU WI KYAN ELP DI SUMADI WE WI A STODI WID FI LOV JEUOVA MUOR AN MUOR?

7. A wa Jiizas did du fi elp piipl fi lov Jeuova muor an muor?

⁷ Jiizas did nuo se wen piipl lov Jeuova it a-go push dem fi du wa Im waahn dem fi du. So nof taim wen Jiizas a tiich piipl, im tel dem tingz we a-go elp dem fi lov Jeuova muor. Laik im tel dem se Jeuova komiin laik wan faada we gi im pikni som wol iip a nais prezent. (Mat. 7:9-11) Som a di piipl dem we did a lisn Jiizas mait-a neva av wan faada we did riili lov an kier bout dem. So jos tingk bout ou dem did fiil wen dem did ier Jiizas tel dem di tuori bout di faada we ron go og op im bwai pikni we kom bak uom afta im did go we an du som uol iip a bad sitn. So Jiizas did a mek dem nuo se Jeuova riili lov piipl an Im wel waahn fi elp dem.​—Luuk 15:20-24.

8. A ou yu kyan elp di sumadi we yu a stodi wid fi lov Jeuova muor an muor?

⁸ Wen yu a tiich di sumadi we yu stodi wid bout di nais nais wiez dem we Jeuova av, yu kyan elp dem jos laik Jiizas fi lov Jeuova muor an muor. So evritaim yu a du di stodi, tek di taim fi mek dem si ou wa dem a lorn shuo umoch Jeuova lov dem. An wen yu a taak bout ou Jeuova did sen Jiizas fi kom ded fi wi, mek dem si se Jeuova did dwi’it, no jos kaa Im lov evribadi bot a chuu im lov dem. (Ruo. 5:8; 1 Jan 4:10) Wen taim dem si umoch Jeuova lov dem, it a-go push dem fi lov im muor an muor.​—Gya. 2:20.

9. A wa did elp wan man we niem Maikal fi chienj op im laif an staat fi sorv Jeuova?

⁹ Luk pan wa did gwaan wid Maikal we kom fram Indoniizha. Im did gruo op iina di chuut bot im neehn get baptaiz. Wen im did a 18 ier uol, im did go a farin fi go jraiv chok. Afta dat, im go baka Indoniizha go get marid, bot im did lef im fambili de fi go baka farin go wok. Iina dem taim de, im waif an im daata did staat fi stodi di Baibl, an dem did a gwaan gud tu. Wen im mada ded, im kom baka yaad fi tek kier a im faada, an im staat fi stodi di Baibl tu. Wen im did a stodi di paat we niem “Lorn Som Muo” iina lesn 27 iina di Yu Kyan Bi Api Nou An Fi Eva! buk, im did si sitn we did toch im aat. Im did staat fi tingk bout ou Jeuova did fiil wen taim im did si Jiizas a sofa, an dat did mek im staat fi baal. Kaa im get fi si aal a wa Jeuova an Jiizas du fi im, it push im fi chienj op im laif an get baptaiz.

OU YU KYAN ELP DI SUMADI WE YU A STODI WID FI PUT JEUOVA BIZNIZ FOS IINA DEM LAIF?

10. Wa Jiizas did du fi elp im falara dem chienj op tingz iina dem laif so dat dem kuda du muor fi Jeuova? (Luuk 5:5-11) (Luk pan di picha tu.)

¹⁰ Som a Jiizas falara dem did don nuo se im did a di Mesaiya. Bot dem did niid elp fi andastan se ef dem waahn fi sorv Jeuova, dem wuda afi mek di priichin wok bi di big ting iina dem laif. Laik wen Jiizas did kom kaal Piita an Anju fi lef dem wok an fala im, dem did nuo fi wan gud wail aredi se Jiizas a did di Mesaiya. (Mat. 4:18, 19) Dem fishin bizniz did a gwaan gud, an it luk laik dem did a wok wid Jiemz an Jan iina da bizniz de. (Maak 1:16-20) Bot wen Piita an Anju did lef dem wok, dem mos did saat out tingz das dem fambili wuda aarait. Bot a wa did mek dem du dem sitn ya? Luuk mek wi nuo se Jiizas did wok wan mirikl fi mek dem nuo fi shuor se Jeuova kyan tek kier a dem.​—Riid Luuk 5:5-11.

11. A ou wi kyan yuuz di sitn dem we wi go chuu iina laif fi elp di sumadi we wi stodi wid fi chos iina Jeuova muor?

¹¹ Aalduo wi kyaahn wok no mirikl tide, wi kyan mek di piipl dem we wi stodi di Baibl wid nuo ou Jeuova elp di wan dem we put fi im bizniz fos iina dem laif. Laik yu kyan tel dem bout ou Jeuova elp yu wen yu did staat fi go a di miitn dem. Dem taim de yu mait-a did afi taak tu yu baas an tel im se yu naa go kyan go wok uova taim pan di die dem wen yu afi go a miitn. Wen yu tel yu Baibl stodi dem sopm ya, mek im nuo se a wen yu did mek op yu main fi put Jeuova bizniz fos iina yu laif yu did si ou Jeuova did elp yu an dat mek yu chos iina im muor.

12. (a) Wa mek it wuda gud fi yu aks difrant difrant breda an sista fi kom pan yu Baibl stodi? (b) Wa els yu kyan yuuz fi elp yu Baibl stodi fi put Jeuova bizniz fos iina im laif?

¹² Wan neda ting we kyan elp yu Baibl stodi a wen dem ier bout ou wi breda an sista dem chienj op tingz fi put Jeuova fos iina dem laif. So yu kyan aks difrant difrant breda an sista we go chuu difrant tingz iina laif fi kom pan di stodi wid yu. An wen dem kom, yu kyan aks dem fi tel yu Baibl stodi bout ou dem lorn di chuut an wa dem did du fi put Jeuova bizniz fos iina dem laif. An wan neda ting we yu kyan du a fi tek di taim fi wach wid yu Baibl stodi dem di vidiyo dem we de iina di paat we niem “Lorn Som Muo” ar di wan dem we iina di paat we niem “Chek Out Som Muo Sitn” we iina di Yu Kyan Bi Api Nou An Fi Eva! buk. Laik wen yu a stodi lesn 37 wid dem, yu kuda taak bout som a di sitn dem iina di vidiyo we niem Jeuova A-Go Tek Kier A Wi.

OU YU KYAN ELP YU BAIBL STODI FI NUO WA FI DU WEN PIIPL A FAIT GENS DEM?

13. A ou Jiizas did get im falara dem redi fi wen piipl staat fait gens dem?

¹³ Jiizas did tel im falara dem uova an uova agen se piipl a-go fait gens dem, aal dem fambili wuda fait gens dem tu. (Mat. 5:11; 10:22, 36) Likl bifuo im ded, Jiizas mek dem nuo se piipl a-go aal waahn fi kil dem tu. (Mat. 24:9; Jan 15:20; 16:2) So im tel dem se dem fi kierful wen dem a priich. Laik im mek dem nuo se dem no fi aagyu-aagyu wid nobadi wen dem a priich bout wa dem biliiv iina. An im tel dem se dem fi kierful bout wa dem se an bout wa dem du.

14. Ou wi kyan get wi Baibl stodi redi fi wen piipl a fait gens dem? (2 Timoti 3:12)

¹⁴ Jos laik Jiizas, wi kyan elp wi Baibl stodi fi nuo som a di sitn dem we di piipl dem we dem wok wid, dem fren dem, ar di piipl dem iina dem fambili mait se ar du kaa dem staat stodi di Baibl. (Riid 2 Timoti 3:12.) Som a di piipl dem we wi Baibl stodi wok wid mait-a laaf aafa im an mak im kaa im a chrai fi liv im laif bies pan wa di Baibl se. An som ada piipl, laik im fambili dem we im kluos tu, mait-a chat bad bout di sitn dem we im a lorn fram di Baibl. So di kwika wi get wi Baibl stodi redi fi wen piipl a fait gens dem kaaz a wa dem biliiv iina, a di beta dem a-go diil wid it wen it apm.

15. Ou yu kyan elp yu Baibl stodi fi diil wid it wen dem fambili a fait gens dem?

¹⁵ Ef yu Baibl stodi fambili a fait gens im, elp im fi tingk bout wa mek dem mait-a a du dat. It kuda bi dat dem tingk se di Jeuova Witnis dem a tiich im bie lai ar dem jos no laik di Jeuova Witnis dem kaa dem tingk se dem a no gud piipl. Aal som a Jiizas fambili neehn laik di sitn dem we im did a du, an dem did aal tingk se a mad im did a mad out. (Maak 3:21; Jan 7:5) So elp yu Baibl stodi fi taak tu piipl iina wan nais wie an tek dem taim wid dem, laik di piipl dem iina dem fambili.

16. Wa yu niid fi mek yu Baibl stodi dem nuo bout ou dem fi priich tu dem fambili?

¹⁶ Yu si aal wen yu Baibl stodi fambili dem waahn fi lorn muor, it wuda gud ef dem no tel dem evriting wan taim. Kaa dat kuda mek dem fiil laik a tu moch sitn dem a lorn, an kaaz a dat dem mait aid im out wen im chrai taak tu dem agen. So tel yu Baibl stodi se dem no fi taak tu moch wen dem a taak bout di sitn dem we dem biliiv iina so dat dem fambili wi waahn fi lorn muor an waahn taak tu dem wan neda taim. (Kol. 4:6) Wan neda ting yu kuda du a tel im fi tel im fambili dem fi go pan di jw.org websait. An dis wuda elp im fambili dem fi tek dem uona taim fi lorn muor bout di Jeuova Witnis dem.

17. Ou yu kyan elp yu Baibl stodi fi ansa kwestiyan bout wa piipl mait-a aks bout di Jeuova Witnis dem? (Luk pan di picha tu.)

¹⁷ Yu kuda yuuz di sitn dem iina di paat we niem “Som Kwestiyan We Dem Aalwiez A Aks Bout Di Jeuova Witnis Dem” we de pan jw.org fi elp yu Baibl stodi fi ansa kwestiyan we dem fambili ar di piipl dem we dem wok wid mait-a aks dem. (2 Tim. 2:24, 25) An wen yu don wan lesn, luk bak pan di paat we niem “Sumadi Mait-a Se” we de iina di Yu Kyan Bi Api Nou An Fi Eva! buk. Tel yu Baibl stodi fi praktis wa im wuda se wen piipl aks im dem kwestiyan ya. An ef yu si se im niid elp fi ansa di kwestiyan dem, elp im. An wen im gwaan praktis, im a-go nuo wa fi se wen piipl kom an a aks im bout wa im biliiv iina.

18. Ou yu kyan elp yu Baibl stodi fi ton wan poblisha? (Matyu 10:27)

¹⁸ Jiizas did tel im falara dem se dem fi priich di gud nyuuz tu piipl. (Riid Matyu 10:27.) So di kwika wan Baibl stodi staat fi go out go priich bout wa im biliiv iina, a di kwika im a-go lorn fi staat chos iina Jeuova. So ou yu kyan elp yu Baibl stodi fi get redi fi go out go priich tu piipl? Wen di breda dem mek di kanggrigieshan nuo se sopm speshal a-go gwaan iina di priichin wok iina wan a di mont dem, yu fi mek yu Baibl stodi nuo se dat a wan gud taim fi dem tingk bout ef dem waahn fi ton wan poblisha. An tel im se muos a di taim it iiziya fi staat priich iina dem taim de. An it wuda gud tu ef im staat gi taak pan di miitn iina di wiik kaa dat wuda elp im fi si ou im kyan taak tu piipl beta bout wa im biliiv iina.

MEK YU BAIBL STODI NUO SE YU NUO SE IM WAAHN MEK JEUOVA API

19. A wa Jiizas did nuo se bout im falara dem, an ou wi kyan du laik im?

¹⁹ Bifuo Jiizas go baka evn, im did tel im falara dem se im an dem wuda de tugeda agen. Aalduo dem neehn andastan wa Jiizas did a taak bout wen im se dat, im did nuo se dem waahn fi mek Jeuova api. (Jan 14:1-5, 8) Im did nuo tu se taim wuda afi paas fi dem andastan sortn an sortn tingz, laik fi nuo se dem wuda go a evn. (Jan 16:12) So jos laik Jiizas, wi kyan mek wi Baibl stodi dem si se wi nuo se dem waahn fi mek Jeuova api.

20. Ou wan sista iina Malaawi did shuo se shi nuo se ar Baibl stodi did waahn fi du di rait ting?

²⁰ Wi fi aalwiez a tingk se wi Baibl stodi waahn fi du di rait ting. Laik luk wa did gwaan wi Chifundo, wan sista we kom fram Malaawi. Shi did staat fi yuuz di buk we niem Yu Kyan Bi Api Nou An Fi Eva! fi du wan Baibl stodi wid wan yong uman we a did wan Kyatalik we niem Alinafe. Wen dem a don op lesn 14 iina di buk, Chifundo aks ar wa shi tingk bout di stachu an sitn dem we piipl mek an worship. Alinafe get beks an se, “Mi kyan du wa mi waahn, nobadi kyaahn tel mi wa fi du!” Afta dat Chifundo did tingk se a it dat fi di stodi. Bot Alinafe neva tap stodi, so Chifundo tek ar taim an gwaan stodi wid ar. Kopl mont afta dat, Chifundo aks Alinafe wan kwestiyan we de iina lesn 34 we se, “Wa gud it du fi yu aredi kaa yu a stodi di Baibl an a lorn bout Jeuova?” Chifundo mek wi nuo wa Alinafe se: “Shi se som wol iip a gud sitn. Wan a dem a dat di Jeuova Witnis dem no du tingz we di Baibl se rang.” An likl afta dat, Alinafe tap yuuz di stachu an sitn dem we piipl mek an worship. An dat kuda mek ar du di ting dem we shi niid fi du an get baptaiz.

21. Ou wi kyan elp wi Baibl stodi fi wel waahn fi du wa Jeuova waahn im fi du?

²¹ Aalduo a Jeuova a di wan “we kaaz [wi] fi gruo,” wi stil afi du wa wi kyan du fi elp wi Baibl stodi fi get chrang iina wa dem biliiv iina. (1 Kor. 3:7) So wi afi du muor dan jos tiich im bout wa Gad waahn im fi du. Wi afi elp im fi lov Jeuova muor an muor. Wi kyan elp im tu fi du tingz fi shuo se a wa Jeuova waahn im fi du fi bi di big ting iina im laif. An wi kyan tiich im tu bout ou im fi dipen pan Jeuova wen im a go chuu aad taim. Wen wi mek im nuo se wi nuo se im waahn fi du wa rait, dat wi elp im fi nuo se im kyan du wa Jeuova waahn im fi du an im a-go wel waahn fi dwi’it tu.