Yu Fi Satisfai Wid Wa Yu Av

1. Wa it miin fi satisfai wid wa yu av, an wa it no miin?

YU A sumadi we satisfai wid wa yu av? Sumadi we satisfai wid wa dem av a-go fiil api an av piis iina dem aat kaa dem tangk Jeuova fi di gud sitn dem we im gi dem. Da sumadi de naa go get beks kaa dem no av sortn an sortn tingz. Bot fi satisfai wid wa yu av no miin se yu no waahn notn muor iina laif. Laik sumadi mait-a a du sitn fi Jeuova aredi bot dem waahn du muor fi im, an notn no rang wid dat. (Ruo. 12:1; 1 Tim. 3:1) Bot wen wi satisfai wid wa wi av, iivn ef wi no get fi du di sitn dem we wi waahn fi du fi Jeuova, wi stil a-go api.

2. Wa kuda apm ef wi no satisfai wid wa wi av?

² Ef wi no satisfai wid wa wi av wi kuda du tingz we mek wi en op iina prablem. Laik wi mait-a wok wol iip a owaz kaa wi waahn fi bai tingz we wi no riili niid. Sad fi se, som a wi breda an sista dem en op tiif moni an ada tingz we dem red yai fa. Dem mait-a tel demself se, ‘Mi dizorv fi get dis,’ ‘Mi waahn dis nou,’ ar dem mait-a se, ‘Mi kyan tek di moni an pie it bak lieta.’ Bot fi tiif a sitn we Jeuova no laik, an it gi im bad niem tu. (Pr. 30:9) Som ada breda an sista mait-a no get fi du wa dem waahn fi du fi Jeuova so dem tap sorv im. (Gya. 6:9) Dat soun a wie, no chuu? Ye! Bot a wa kuda kaaz dem fi du dat? Di prablem kuda bi dat dem no satisfai wid wa dem a du aredi an fiil se dem fi get muor tingz fi du.

3. Wa wi kyan lorn fram Filipiyan 4:11, 12?

³ Aal a wi kyan lorn fi satisfai wid wa wi av. Di apasl Paal did rait se im ‘lorn ou fi satisfai no mata ef im av nof ar ef im av likl bit.’ (Riid Filipiyan 4:11, 12.) An a wen im did iina prizn im did rait dat. Aalduo im neehn av nof tingz, im did stil api kaa im did lorn ou fi satisfai wid wa im av. Ef wi fain se it aad fi wi satisfai wid wa wi av, wi kyan tingk bout wa Paal se an di ting dem we im did go chuu an dat kyan elp wi fi bi api wid wa wi av. Bot wi no fi fiil se wi a-go kyan dis git op so an jos api wid wa wi av. Dis a sitn we wi afi lorn fi du. So ou wi kyan du dat? Wi a-go luk pan som a di ting dem we wi niid fi du we kyan elp wi fi lorn fi satisfai wid wa wi av.

CHRAI FI GI TANGKS FI WA YU AV

4. Wa it du fi yu wen yu gi tangks fi wa yu av? (1 Tesaluoniyan 5:18)

⁴ Wen sumadi aalwiez a luk fi tingz fi gi tangks fa, it a-go iiziya fi dem fi satisfai wid wa dem av. (Riid 1 Tesaluoniyan 5:18.) Laik ef wi gi tangks fi di sitn dem we wi av, wi naa go fain wiself a wori tu moch bout di sitn dem we wi no av. Wen wi tangk Jeuova fi di sitn dem we wi kyan du fi im nou, dat wi elp wi fi gwaan du wi bes wid di wok we im gi wi fi du. An den wi wudn a wori wori op wiself an a se wi waahn im gi wi wan difrant wok fi du. So wi kyan si wa mek di Baibl tel wi se wen wi prie tu Jeuova wi fi gi im nof tangks fi di sitn dem we im gi wi. Wen wi shuo Jeuova se wi tangk im fi wa wi av, im wi gi wi “piis iina [wi] aat an main iina wan wie we [wi] kyaahn iivn andastan.”​—Fil. 4:6, 7.

5. A wa an wa di Izrel piipl dem shuda did gi tangks fa? (Luk pan di picha tu.)

⁵ Tingk bout wa did gwaan wid di Izrel piipl dem. Nof taim dem wuda a komplien tu Jeuova kaa dem neva av di fuud we dem did av iina Iijip we dem did lov. (Nom. 11:4-6) Ye, laif iina di wildanes neehn iizi fi chuu, bot a wa wuda elp dem fi satisfai wid wa dem av? Dem shuda did tap an tingk bout di sitn dem we Jeuova did du fi dem aredi an tangk im fi dem. Laik dem shuda memba se dem did a sliev iina Iijip an di piipl dem we liv de did mek dem sofa bad. An a Jeuova did afi yuuz ten plieg fi siev dem fram dem piipl de. Afta Jeuova siev dem im aal mek dem tek we som tingz fram di Iijip piipl dem, laik kluoz an tingz we mek outa silva an guol. (Ek. 12:35, 36) An wen di Izrelait dem did de a di Red Sii an Fiero an im aami did a ron dem dong, Jeuova wok wan mirikl fi siev dem so dat dem kuda paas chuu di sii an go uova pan di ada said. An wen dem did a go chuu di wildanes Jeuova gi dem mana fi iit evridie. So sins Jeuova did gi dem aal a dem sitn ya, wa mek dem did a komplien? A no se dem neva av no fuud fi iit, bot dem did a komplien kaa dem did angrietful.

6. Wa an wa yu kyan du fi shuo se yu gi tangks fi wa yu av?

⁶ Wa yu kyan du fi shuo se yu gi tangks fi wa yu av? Si chrii sitn ya: Di fos wan a dis, evridie sidong an tingk bout di gud sitn dem we mek yu api, an yu kuda aal rait dong wan an tuu sitn we yu glad fa. (Lam. 3:22, 23) Di sekan ting yu kuda du a dat enitaim sumadi du sitn fi yu, yu fi aalwiez memba fi tel dem tangks. An muor dan nobadi els, yu fi tangk Jeuova evridie fi wa im du fi yu. (Sa. 75:1) An di tord ting yu kuda du a mek shuor se di piipl dem we yu pik az yu fren a no piipl we angrietful an lov grombl grombl, kaa ef a so dem tan it iizi fi yu tan so tu. So di wan dem we yu pik fi bi yu fren fi bi piipl we aalwiez a gi tangks fi wa dem av. (Dyuu. 1:26-28; 2 Tim. 3:1, 2, 5) Evritaim wi tel sumadi tangks fi sopm, it wi elp wi fi no wori wori op wiself bout wa wi no av.

7. A ou Amisha did shuo se shi tangk Jeuova fi wa shi av, an ou dat did mek ar fiil?

⁷ Luk pan wa did gwaan wid Amisha we liv iina Indoniizha. Shi se: “Wen KUOVID-19 did a go roun, mi did staat fi luk pan ou di breda an sista dem laif did stie an a mach it op bak wid fi mi. An den it did staat fi luk laik se notn did a gwaan fi mi, so mi neehn api wid mi laif.” (Gya. 6:4) Bot a wa did elp ar fi chienj di wie ou shi did a tingk bout tingz? Amisha se: “Mi did staat fi luk pan di sitn dem we Jeuova did bles mi wid evridie, an mi did staat fi tingk bout som a di gud sitn dem we mi get kaa mi a paat a Jeuova aaganaizieshan. Den mi tel Jeuova se mi tangk im fi aal a wa im gi mi. An kaaz a dis, mi did fiil gud bout mi laif.” Ef yu fiil se yu no api kaaz a ou yu laif stie, yu tingk yu kuda du laik Amisha an du di sitn dem we shuo se yu tangk Gad fi wa yu av?

TINGK BOUT WA JEUOVA GI YU FI DU AN STIE OMBL

8. Wa did apm tu Barok?

⁸ Di prafit Jerimaiya did av wan sekiteri we niem Barok. An fi a wail Barok neehn api wid im laif. Barok did a elp Jerimaiya fi tel di angrietful Izrelait dem bout wa a-go apm tu dem kaa dem no lisn tu Jeuova. An da wok de neehn iizi fi Barok du. Bot wa apm a se Barok did tap tingk bout di wok we Jeuova did waahn im fi du, an im staat fi tingk nof bout imself an wa im did waahn fi du. So Jeuova yuuz Jerimaiya fi tel im dis: “Yu si di big laif an di aip we yu a ron dong, tap ron it dong.” (Jer. 45:3-5) So Jeuova did riili a tel Barok se: “Yu fi satisfai wid ou yu laif stie ya nou.” Barok did lisn tu Jeuova an im gwaan du wa im did niid fi du so dat im an Jeuova kuda gwaan bi fren.

9. Bies pan wa 1 Korintiyan 4:6, 7 se, kaa wi ombl wiself wa dat a-go mek wi si se? (Luk pan di picha dem tu.)

⁹ Som a di taim wan Kristiyan mait-a fiil se a im fi get sortn an sortn wok fi du fi Jeuova kaa im nuo ou fi du sitn gud, ar kaa im wok aad, ar kaa im a sorv Jeuova fi wol iip a ier nou. Bot wa kuda apm a dat wan neda breda ar sista kuda get di wok fi du we im did waahn fi du. Bot wa kuda elp im ef im fiil a wie bout dis? Im kuda tingk bout wa di apasl Paal se a 1 Korintiyan 4:6, 7. (Riid.) Yu si evriting we wi get fi du fi Jeuova an evriting we wi kyan du gud, a Jeuova gi wi di wok an mek wi kyan du tingz gud. Jeuova no gi wi dem ya gif ya kaa wi speshal muor dan nobadi els, bot im gi wi dem sitn ya kaa im lov wi an im kain tu wi.​—Ruo. 12:3, 6; Ifii. 2:8, 9.

10. Ou wi kyan lorn ou fi ombl wiself?

¹⁰ Wi kyan nuo ou fi ombl wiself wen wi tingk aad aad bout wa Jiizas did du. Tingk bout wa did apm di nait wen Jiizas did wash im apasl dem fut. Di apasl Jan se: “Jiizas did nuo se [1] di Faada did gi im powa uova evriting, [2] dat a Gad im kom fram, an [3] dat a Gad im a go bak tu, so im . . . staat fi wash im falara dem fut.” (Jan 13:3-5) Jiizas kuda fiil se a im apasl dem shuda wash fi im fut, bot wen im did de pan ort im neva fiil se im did niid fi liv no big nais laif. (Luuk 9:58) Ye man, Jiizas did ombl an im did api wid ou im laif did stie. An wen im du dis im shuo wi ou wi fi fiil bout fi wi laif tu.​—Jan 13:15.

11. Wa an wa Dennis du we elp im fi ombl imself?

¹¹ Wan a wi breda dem we niem Dennis, we kom fram di Nedalanz, did afi fait aad fi du laik Jiizas an ombl imself. Im se: “Som a di taim mi si se mi a get ful a miself ar mi fiil laik mi a get beks wen mi ier se som breda an sista get speshal tingz fi du we mi no get fi du. Wen mi staat fiil dem wie de, mi jos go luk op som tingz bout ou wi fi ombl wiself. An wan neda ting we mi du a dat mi maak som skripcha iina di JW Library^® ap bout ou wi fi ombl wiself so dat mi kyan fain dem kwik kwik an av dem so dat mi kyan riid dem uova an uova. Mi dongluod som taak pan mi fuon tu we a diil wid ou wi fi ombl wiself an mi lisn tu dem uova an uova.a Mi lorn se no mata wa kain-a wok wi a du, wi dwi’it fi big op Jeuova, no wiself. Evri wan a wi jos get a chaans fi av wan likl paat iina wa Jeuova a du.” So ef yu staat fi fiil a wie kaa yu tingk se muor tingz fi a gwaan fi yu, du wa yu niid fi du so dat yu kyan ombl yuself. An dis a-go elp yu fi get kluosa tu Jeuova an yu naa go red yai nobadi fi wa dem get fi du.​—Jmz. 4:6, 8.

TINGK BOUT DI TING DEM WE JEUOVA PRAMIS FI DU

12. Wa an wa Jeuova pramis wi we kyan elp wi fi no wori an fret bout wi laif ya nou? (Aizaiya 65:21-25)

¹² Wen wi tek di taim fi tingk bout aal a di ting dem we Gad pramis se im a-go du iina di fyuucha, it a-go elp wi fi satisfai wid wa wi av an no kil op wiself a ron dong tingz. Aizaiya did rait dong som tingz we mek wi si se Jeuova andastan ou wi fiil kaaz a di wol iip a prablem dem we wi a go chuu ya nou, an im mek wi nuo tu se Jeuova a-go get rid a aal a dem sitn de. (Riid Aizaiya 65:21-25.) Dem taim de wi a-go av gud ous fi liv iina an wi a-go fiil sief. Wi a-go du wok we wi lov fi du, an wi a-go nyam gud fuud we ties nais tu. Wi naa go afi fret an wori se notn bad a-go apm tu wi an wi pikni dem. (Aiz. 32:17, 18; Izii. 34:25) Wi nuo fi shuor se aal a dem gud sitn ya we wi jos taak bout a-go apm fi chuu.

13. Wen an wen wi mait-a afi tingk aad bout di ting dem we Jeuova pramis fi du fi wi iina di fyuucha?

¹³ A nou wi fi a tingk bout Paradais muor dan eni ada taim. Wa mek? Kaa wi a liv iina “di laas die dem” wen tingz a “get aad aad” an wi av wol iip a prablem. (2 Tim. 3:1) Bot Jeuova gi wi aal a wa wi niid evridie so dat wi kyan tan op chrang an go chuu. (Sa. 145:14) Wan neda ting we elp wi fi gwaan diil wid wi prablem dem ya nou a wen wi tingk bout di sitn dem we Jeuova pramis fi du fi wi iina di fyuucha. So miebi yu a fain it aad fi tek kier a yu fambili ya nou. Yu tingk dis miin se yu jos afi a chogl a chogl a gwaan so fi mek laif? Nuo sa! Memba se Jeuova pramis se iina Paradais im naa go jos gi yu wa yu niid bot im a-go gi yu muor dan we yu kyan aks im fa. (Sa. 9:18; 72:12-14) Miebi pien a lik yu rait, lef, an senta, ar yu sad bad, ar yu a go chuu som ada kain-a siknis we av yu dong a wie. Yu fiil laik se yu naa go eva get beta, laik se a jos it dat fi yu? Memba dis, siknis an det naa go iina Gad nyuu worl. (Rev. 21:3, 4) Wen wi tingk bout wa di Baibl se a-go apm, it a-go elp wi fi jos iizi wiself ya nou an no beks op beks op wiself kaaz a wa wi a go chuu. Wi kyan stil av piis iina wi aat an main aal wen bad tingz apm tu wi, ar wen wi a go chuu som siiros siknis ar eni ada prablem. Wa mek? Kaa wi nuo se no mata wa kain-a prablem ar sofarieshan wi a go chuu, it “naa go laas fi eva,” an iina Paradais wi naa go av non a dem prablem de.​—2 Kor. 4:17, 18.

14. Wa wi niid fi du so dat wi kyan chos iina Gad pramis dem muor an muor?

¹⁴ Wi si se wen wi kip wi main pan di ting dem we Jeuova pramis wi, it kyan elp wi fi iizi wiself an api wid wa wi av. So wa wi kyan du fi mek shuor se wi riili a chos iina wa Gad se im a-go du iina di fyuucha? Jos laik ou sumadi mait afi put aan dem yaiglaas fi elp dem fi si sitn we de faar, a siem so wi mait-a afi du som tingz we kyan elp wi fi kip wi main pan di sitn dem we Gad pramis se im a-go du iina di fyuucha. So se wi a wori an a fret bout di likl bit a moni we wi av, wa wi kyan du a tingk bout di taim wen wi naa go niid moni agen an nobadi naa go puor niida. Ar wi mait fain se wi a fiil a wie kaa ada breda an sista get speshal wok fi du fi Jeuova we wi no get fi du yet. Wa wi kyan du a tingk bout ou laif a-go nais an ou dem sitn de naa go impuotant wen di wol a wi porfek an api a sorv Jeuova. (1 Tim. 6:19) It mait-a aad ya nou fi wi kip wi main pan di blesn dem fi di fyuucha kaaz a aal a di prablem dem we wi a go chuu ya nou. Bot di muor wi tek di taim fi tingk bout di sitn dem we Jeuova Gad a-go gi wi, a di les taim wi a-go sidong a tingk bout fi wi uona prablem dem.

15. Tel wi sopm we yu laik fram wa Christa se.

¹⁵ Yu memba Dennis we wi did taak bout aredi? Luk pan wa did gwaan wid im waif we niem Christa an bout ou it elp ar wen shi kip ar main pan di ting dem we Jeuova pramis fi du. Shi se: “Mi av wan siknis we a kaaz mi fi get wiika an wiika, an kaaz a dat, mi afi lidong iina mi bed muos a di taim. An mi afi yuuz wan wiilchier wen mi a muuv roun. Evridie pien lik mi, an aal wa die ya mi dakta tel mi se tingz naa luk gud fi mi. Bot siem taim im se so, mi se tu miself se, ‘Im a luk pan tingz difrant fram ou mi a luk pan it,’ kaa mi a tingk bout laif iina Paradais. An a dat gi mi piis iina mi aat an main. A chuu yes se nou mi afi a sofa iina da worl ya, bot mi nuo se iina Paradais laif a-go swiit!”

DI WAN DEM WE AV NOF RISPEK FI IM NAA GO SHAAT A NOTN

16. Wa mek Dievid kuda se di wan dem we av nof rispek fi Jeuova naa go shaat a notn?

¹⁶ Aalduo sumadi mait-a a du aal a we dem kyan du fi kip api wen dem a sorv Jeuova, it no miin tu se dem naa go av prablem iina dem laif. Laik tingk bout King Dievid. Dem sitn ya did kaaz im fi sofa: Bout chrii a im pikni dem ded, dem tel lai pan im, im uona fren dem sel im out, an im did afi ron an aid fram wan King we did a chrai fi kil im fi wol iip a ier. Bot iivn duo im did go chuu aal a dat, wan a di taim wen im did a sofa im se di wan dem we av nof rispek fi Jeuova naa go shaat a notn. (Sa. 34:9, 10) Wa mek im kuda se dat? Kaa Jeuova piipl dem nuo se dem a-go av prablem, bot dem nuo fi shuor se wen dem a go chuu dem prablem dem, dem naa go shaat a notn. (Sa. 145:16) An wi kyan nuo fi shuor tu se Jeuova a-go elp wi wen wi a go chuu wi prablem dem so wi no afi wori an fret bout notn.

17. Wa mek it impuotant fi yu nuo ou fi satisfai wid wa yu av?

¹⁷ Jeuova no waahn yu fi a fret an a wori bout tingz we yu no av. (Sa. 131:1, 2) So it impuotant fi lorn wa it miin fi satisfai wid wa yu av. Yu niid fi wok aad fi bi di kain-a sumadi we a gi tangks fi evriting. An tingk bout wa Jeuova gi yu fi du an stie ombl. An du wa yu niid fi du so dat yu kyan chos iina Gad pramis dem muor an muor. Wen yu du aal a dem sitn de, yu a-go kyan se: “Ye man, mi riili api wid di sitn dem we yu pudong fi mi.”​—Sa. 16:5, 6.