Kwestiyan We Piipl Aks

Di man we rait Pravorbz 30:18, 19 se ‘im no get di wie ou wan man gwaan wen im laik wan uman.’ A wa im did miin wen im se dis?

Nof piipl a wanda we dem vors ya miin, iivn som piipl uu nuo nof bout di Baibl. Di vors dem iina di New World Translation se: “Yu av chrii sitn we mi no get, an fuor sitn we mi jos no andastan: Wan iigl we a flai iina di skai, wan buot we a kot waata outa sii, wan siniek we a mek im wie kraas wan rak, an di wie ou wan man gwaan wen im laik wan uman.”​—Pr. 30:18, 19.

Wan a di taim wi did tingk se da vors de we se “di wie ou wan man gwaan wen im laik wan uman” did a taak bout sitn bad. Wa mek? Wen wi luk pan di ada vors dem iina di chapta, it did taak bout som ada bad sitn. (Pr. 30:15, 16) An vors 20 taak bout wan marid uman we sliip wid sumadi we shi no marid tu we kliem se shi no du notn rang. So wi did a tingk se jos laik ou wan iigl flai wie op iina di skai, ar ou wan siniek mek im wie kraas wan rak, ar wan buot we siel faar out pan di sii waata, a siem so di man mait-a du sitn we nobadi no nuo bout. So bies pan dat, wi did tingk se wen di vors se “di wie ou wan man gwaan wen im laik wan uman,” it a taak bout sitn bad. Wi did tingk it miin se di yong man did chrik wan yong gorl fi sliip wid im.

Bot wi av kopl riizn wa mek wi kyan nuo se dem vors ya riili a taak bout sopm gud. Di sumadi we rait dis did a taak bout tingz we apm we im jos kudn andastan.

Di Iibruu wod we dem yuuz iina da vors ya mek wi nuo se a sopm gud it did a taak bout fi chuu. Di buk we niem Theological Lexicon of the Old Testament mek wi nuo se di Iibruu wod we dem yuuz fi “mi no get” we de a Pravorbz 30:18 “a taak bout wen sumadi a tingk bout sitn we mek dem mout jos jrap a grong kaa a ou nais di sitn bi.”

Professor Crawford H. Toy we de a Harvard University iina Merika se di siem ting, se a sopm gud di Baibl did a taak bout ya-so. Im se: “Di sumadi we rait dem vors ya did jos a taak bout ou di sopm dem nais bad.”

So it mek sens fi se di wod dem we de a Pravorbz 30:18, 19 a taak bout tingz we nais bad an we wi kyaahn iivn andastan. So jos laik di man we rait dem vors ya, wen wi tingk bout di iigl we flai ai iina di skai, an bout di siniek we na’av no fut an kyan stil go kraas di rak, an wen wi tingk bout di evi buot we kyan kot chuu sii waata, an bout di yong man an di yong uman we get fi lov dem wan aneda an liv wan nais api laif tugeda, it mek wi mout jrap a grong an it mek wi fiil nais.