Jeuova Elp Wi Fi Bi Api An Gruo Eniwe Wi De

Di Kassholm dem did go a Gilead School iina 1979. An uova di ier dem, dem get fi du som difrant difrant wok fi Jeuova iina som konchri laik Iran, Morishos, Maiyanmaar, Tanzaniya, Yuganda, an Zayier. An a wen dem did de a Gilead dem ier wan a dem tiicha we niem Jack Redford tel dem se eniwe Jeuova sen dem, dem fi wok wid it an bi api tu. An dat did elp dem evritaim dem get sen go a wan difrant plies, an dat did apm wol iip a taim. Mek dem tel yu wa gwaan no.

Mats, tel wi ou yu did lorn di chuut.

Mats: Mi faada did a liv iina Puolan wen Worl Waar 2 did a gwaan, an im si ou di piipl dem iina di Kyatalik Choch did a priich wan ting bot dem did a du sitn els. Bot im aalwiez se, “Di chuut mos out de somwe!” Afta a wail, mi fain out se a chuu im did a taak. Mi yuus tu bai som wol iip a oul buk an riid dem, an wan a dem did niem The Truth That Leads to Eternal Life. Az mi si da taikl de mi did wel waahn fi riid it, an mi riid di wol buk di sed nait mi get it. Bai a maanin, mi did nuo se mi did fain di chuut.

Fram Iepril 1972 go dong, mi did riid nof muor a di buk an pamplet dem we mi did get fram di Jeuova Witnis dem. An dem elp mi get di ansa fi di kwestiyan dem we mi did av bout di Baibl. Mi did fiil laik da bizniz man de iina Jiizas tuori we did fain wan porl we wot wol iip a moni an im “sel” evriting we im uon jos fi bai it. So jos laik da bizniz man de, mi did gi op di plan dem we mi did av fi go a yuunivorsiti fi ton dakta so dat mi kuda sorv Jeuova, an dat wuda komiin laik da porl de we did wot nof tu di man. (Mat. 13:45, 46) Mi did get baptaiz Disemba 10, 1972.

Iina wan ier, mi mada an faada an mi likl breda tek di chuut an get baptaiz. Iina Julai 1973, mi staat fi yuuz muos a mi taim fi du Jeuova wok. Yu did av som paiyanier iina di kanggrigieshan we did a gwaan gud, an wan a dem a did wan nais lukin sista we niem Ann-Catrin. Wi did faal in lov wid wi wan aneda an wi get marid iina 1975. An fi di neks fuor ier wi did liv iina wan toun we niem Schromsud, wan priti plies iina Swiidn we nof piipl did waahn fi lorn bout di Baibl.

Ann-Catrin: A wen mi faada did nieli don yuunivorsiti iina Stakuom im lorn di chuut. Da taim de mi did a onggl chrii mont uol, bot im yuus tu kya mi go a di miitn dem an iina fiil sorvis. Mi mada neehn laik dis, an shi chrai fi shuo se wa di Jeuova Witnis dem did a tiich did rang. Bot shi kudn dwi’it, so afta a wail shi en op get baptaiz tu. Mi get baptaiz wen mi did a 13 ier uol, an mi staat fi paiyanier wen mi did a 16. Mi did a priich iina Uumiyo we dem did niid muor elp fi du di priichin wok, an afta dat mi ton wan speshal paiyanier.

Afta mi an Mats get marid, wi did elp wol iip a piipl fi lorn di chuut, an dat did mek wi fiil gud. Wan a dem we wi did elp fi lorn di chuut a wan gorl we a tiinieja, we niem Maivor, we did disaid fi tap plie spuots kaa shi did waahn fi ton wan paiyanier. Shi an mi yongga sista did paiyanier tugeda, an iina 1984 dem did go a Gilead, an nou dem a mishineri iina Ekwaduor.

Wa did elp unu wen unu did afi wok iina di difrant difrant plies dem, an ou unu did stie api?

Mats: Nof taim dem wuda muuv wi fram we wi did de an sen wi go a som difrant difrant plies fi go priich. Bot wan sitn we elp wi fi diil wid dis a wen wi chrai fi du laik Jiizas an ombl wiself. (Kol. 2:6, 7) Laik insted-a fi fiil se di breda an sista dem iina di nyuu plies dem we wi go fi du tingz di wie ou wi dwi’it, wi chrai fi fain out ou dem du tingz. Wi did waahn fi andastan di wie ou dem tingk an ou dem du tingz iina fi dem konchri. Wi fain se wen wi du laik Jiizas, wi aalwiez api no mata we Jeuova sen wi.​—Sa. 1:2, 3.

Ann-Catrin: Jos laik ou wan chrii niid sonlait fi gruo, a siem wie so Jeuova wuda komiin laik “di son” we wi niid fi gruo. (Sa. 84:11) Laik im gi wi wol iip a breda an sista we lov wi kyaahn don. Laik iina di likl kanggrigieshan we wi did de iina Tiran, we iina Iran, di breda an sista dem did nais an dem did kain tu wi, an dem chriit wi gud jos laik wa yuus tu gwaan iina Baibl taim. Wi wuda did lov fi stie iina Iran, bot sad fi se dem put wi wok anda lak dong iina Julai 1980, an dem tel wi se wi av 48 owa fi lef di konchri. So di breda dem sen wi go a Zayier (we dem kaal Konggo nou) iina Afrika.

Wen mi did fain out se dem did a-go sen wi go a Afrika, mi did baal kaa mi did ier se nof siniek de a Afrika, an se aal kain-a siknis aalwiez a brok out de, so mi did fried bad. Bot tuu a wi gud fren dem we yuus tu liv de fi wan lang taim se tu wi se: “No fried man, afta yu neva go a Afrika yet! Yu a-go lov it man, wach an si.” An dem did rait fi chuu! Di breda an sista dem dong de nais bad. Matarafak, wen wi did afi lef Afrika siks ier afta dat bikaa di priichin wok did anda lak dong, mi sumail tu miself, kaa mi fain se mi did a prie tu Jeuova an a beg im fi mek wi stie a Afrika.

Wa a som a di blesn dem we yu did get kaa yu yuuz yu laif fi sorv Jeuova?

Mats: Kaaz a di difrant difrant plies dem we dem sen wi go fi go priich, wi ton gud fren wid wol iip a mishineri we kom fram difrant difrant konchri. Iina som a dem plies de, mi did av bout 20 Baibl stodi, an som a di taim mi waif did av bout 20 Baibl stodi tu an dat did mek wi fiil gud. Plos, mi naa go eva figet ou di breda an sista dem iina Afrika did kain an chriit wi gud. Laik wen wi yuus tu go luk fi di breda an sista dem iina di difrant difrant kanggrigieshan dem iina Zayier, wi wuda sliip iina wi likl bos. Bot dem breda an sista de mek shuor se wi av evriting we wi niid iivn duo dem did puor bad. (2 Kor. 8:3) Wen di die don, mi an Ann-Catrin wuda naamali sidong an taak bout tingz we gwaan iina di die an tangk Jeuova fi elp wi fi go chuu. Wi yuus tu kaal dat stuori taim an wi did lov dat.

Ann-Catrin: Mi get nof blesn. Laik mi get fi miit wol iip a breda an sista we kom fram aal uova di worl. An mi get fi lorn som nyuu langwij tu laik Farsi, French, Luganda, an Swaiili. An wi get fi lorn ou di piipl dem we taak dem langwij de du tingz iina fi dem konchri. Wi get fi chrien som breda an sista we no tuu lang kom iina di chuut an wi an dem en op ton gud gud fren. An aal a wi api fi gwaan sorv Jeuova tugeda.​—Zef. 3:9.

Evritaim wi get fi du sitn nyuu fi Jeuova, it did komiin laik se a Jeuova did a kyari wi pan wan chrip, an a im did a shuo wi we wi fi go. An pan da chrip de wi get fi si wol iip a di priti sitn dem we Jeuova mek. Mi a tel yu se ef a neehn fi Jeuova, nof a di sitn dem we wi lorn wi wuda neva lorn dem.

Wa a som prablem yu did av, an wa did elp yu fi diil wid dem?

Mats: Som a di taim wi did av som difrant difrant siknis laik malieriya. An Ann-Catrin did afi du som aparieshan we wi neehn plan fa. Wi aal did a wori bout wi mada an faada dem we did op iina iej tu. So wi riili api fi ou wi fambili chip iin an tek kier a dem. An wi laik ou dem tek dem taim wid dem an shuo dem lov. (1 Tim. 5:4) Aalduo wi did du aal a wa wi kuda du fi elp dem, wi did stil fiil a wie kaaz wi wish wi kuda du muor fi elp dem.

Ann-Catrin: Iina 1983 wen wi de a Zayier, mi kech kalara, an mi did sik bad. Di dakta tel Mats se: “Tek ar outa di konchri nou nou!” Di onggl plien we wi kuda get a wan we kyari gudz, an a wi dat pan it di neks die a go a Swiidn.

Mats: Wi did baal kaa wi did tingk se wi neehn did a-go get fi du no mishineri wok agen. Bot iivn duo di dakta did tingk se Ann-Catrin neehn a-go get beta, shi did get beta. An wan ier afta dat, wi get fi go baka Zayier, bot dis ya taim ya wi did de a wan likl kanggrigieshan we taak di Swaiili langwij iina Lubumbashi.

Ann-Catrin: Wen wi did de iina Lubumbashi, mi did get pregnant, bot di biebi ded bifuo it baan. Aalduo wi neehn plan fi av no pikni, it did pien mi aat wen wi biebi ded. Bot dem taim de Jeuova du sitn fi wi we wi neehn ekspek. Wi get fi staat muor Baibl stodi muor dan eni ada taim. Iina kopl mont di kanggrigieshan muuv fram 35 tu 70 breda an sista, an wi did av 40 piipl we yuus tu kom a wi miitn dem an dat muuv tu 220. Wi did bizi wid di priichin wok, an Jeuova did a bles wa wi did a du, an dat did elp mi fi fiil beta. Nof a di taim wi stil tingk an taak bout wi likl biebi we ded, an wi kyaahn wiet fi si ou Jeuova a-go elp wi fi diil wid da pien de iina Paradais.

Mats: Wan a di taim Ann-Catrin did staat fiil wiik an taiyad bad. An roun dem siem taim de mi did fain out se mi av stiej fuor kuolan kyansa an mi did niid fi du wan big aparieshan. Mi a gwaan gud ya nou, an Ann-Catrin a gwaan du we shi kyan du fi sorv Jeuova.

Wi get fi si se a no wi wan weehn a diil wid prablem. Afta wa did gwaan iina 1994 wen di difrant difrant chraib dem a kil aaf dem wan aneda iina Ruwanda, wi get fi luk fi som breda an sista we did afi ron we fram dem yaad. Wen wi si ou dem neehn gi op, ou dem chos iina Jeuova wid aal a dem aat, an ou dem tek kier a dem wan aneda, dat tiich wi se Jeuova av di powa fi elp wi diil wid eni prablem we wi a go chuu.​—Sa. 55:22.

Ann-Catrin: Wan neda ting we did riich wi a wen wi krash wen wi a kom bak fram di speshal miitn fi di branch we did jos uopm iina Yuganda iina 2007. Wi did a go a Nairuobi we de iina Kenya wid bout 25 mishineri an Betelait. Jos likl bifuo wi riich di baada fi Kenya, wan likl bos swing iina wi lien an lik chriet iina wi. Di jraiva an faiv a wi fren dem ded siem taim, an wan neda sista ded a di aspital. Wi kyaahn wiet fi si wi fren dem agen!​—Juob 14:13-15.

Afta a wail, di kot an dem sitn de we mi did get did get beta. Bot mi an Mats an som ada piipl we did de iina di aksident aalwiez a memba bout wa did gwaan da die de. It did mek mi kudn sliip gud a nait taim kaa nof a di taim mi wiek op a fiil laik se mi a av aat atak. Dat did mek mi fraitn bad, bot wi prie aad tu Jeuova an riid wi fievrit skripcha dem, an dat did elp wi fi fiil beta. An wan neda ting we did elp wi, a wen wi go a som dakta we nuo ou fi diil wid dem ting de. Nowadiez wi fiil beta, an wi no wori wori op wiself laik wan taim. An wi beg Jeuova fi elp wi so dat wi kyan di de fi ada piipl we a go chuu di siem ting.

Ou yu wuda se Jeuova elp yu chuu dem aad taim de we yu did afi go chuu?

Mats: Iina Swaiili, dem av sitn we dem se, “Dem kyari wi laik ou dem kyari eg.” Jos laik ou sumadi tek dem taim wen dem a kya som eg so dem no brok, a siem so Jeuova tek im taim wid wi, an elp wi wid di difrant difrant wok dem we wi get fi du. An wi aalwiez av muor dan wa wi niid. Wan a di wie dem wi si se Jeuova lov wi an di de fi wi a bies pan ou im yuuz di Govanin badi fi tek kier a wi.

Ann-Catrin: Mi wuda laik fi tel yu bout wan taim wen wi si se Jeuova riili a tek kier a wi. Wan die mi get wan fuon kaal a tel mi se mi faada we liv iina Swiidn de iina aspital an im sik bad. Mats did jos get beta fram malieriya an so wi kudn bai no plien tikit fi go luk fi im. So wi mek op wi main se wi a-go sel wi kyaar. Den wi get tuu muor fuon kaal. Wan a dem a did fram wan ozban an waif we ier bout wa a gwaan wid wi, an dem did waahn fi bai wan a di plien tikit fi wi. Di neda fuon kaal we wi get a fram wan sista we op iina iej we did siev som moni iina wan baks we shi kaal “Fi sumadi we niid it.” Iina no taim, Jeuova elp wi fi get di tikit dem we wi did niid fi go a Swiidn.​—Iib. 13:6.

Wen yu luk bak pan di 50 ier dem we yu yuuz muos a yu taim fi du Jeuova wok, wa yu lorn fram it?

Ann-Catrin: Mi get fi si se wa a-go mek wi chrang a wen wi ‘iizi wiself an shuo se wi chos iina Jeuova.’ So wen wi chos iina Jeuova, eniting we wi a go chuu, Jeuova a-go elp wi fi go chuu it. (Aiz. 30:15; 2 Kr. 20:15, 17) Wen wi put wi aat iina eniting we Jeuova gi wi fi du, a wol iip a blesn wi get, muor blesn dan ef wi did fi du sitn els.

Mats: Di mien ting we mi lorn a dat no mata wa mi a go chuu, mi fi aalwiez dipen pan Jeuova an wach an si ou im a-go saat out tingz fi mi. (Sa. 37:5) Im aalwiez elp mi jos laik ou im pramis se im wuda du. Wi de a Betel nou iina Maiyanmaar an wi stil si se Jeuova a elp wi.

Wi uop se nof a di yong piipl dem uu waahn fi du muor fi Jeuova wi get fi si se Jeuova a-go stik tu dem no mata wa dem a go chuu jos laik ou Jeuova di de fi wi. An wi nuo fi shuor se ef dem gwaan dipen pan Jeuova, dem a-go api an gruo eniwe dem de.