Tuu Nyuu Breda We De Pan Di Govanin Badi

PAN Aktuoba 5, 2024, dem mek wi nuo sitn nyuu a di miitn we wi kip evri ier. Dem se: Breda Jody Jedele an Breda Jacob Rumph a-go de pan di Govanin Badi fi di Jeuova Witnis dem. Dem tuu breda ya a sorv Jeuova an a stik tu im fi uol iip a ier nou.

Breda Jedele did baan iina Mizuuri we de iina Merika, an im did gruo op iina di chuut. Im fambili did liv iina wan ieriya we dem neehn av nof Jeuova Witnis, an kaaz a dat, im get fi miit uol iip a breda an sista we kom fram difrant difrant paat a Merika we did kom de fi elp out wid di priichin wok. Wen im luk pan ou dem breda de did shuo lov mongks dem wan aneda an wok tugeda az wan, dat did elp fi push im fi get baptaiz pan Aktuoba 15, 1983. Im did lov fi priich, an so afta im did don ai skuul, im ton wan regila paiyanier iina Septemba 1989.

Wen Breda Jedele did yong, im mada an faada wuda kyari im an im sista fi go vizit Betel, an kaaz a dat, im an im sista did fiil laik dem did waahn fi wok a Betel wan die, an a dat did en op apm. Breda Jedele did en op go a Waakil Betel iina Septemba 1990. Di fos plies im did wok a Betel a did iina di Cleaning Department, an den afta dat im wok iina Medical Services.

Roun dem taim de, yu did av som Spanish kanggrigieshan we weehn a kom op bout di plies. An chuu dem did a get biga an biga, dem did niid som breda fi elp fi liid di kanggrigieshan dem, so Breda Jedele did go a wan a dem kanggrigieshan de an staat fi lorn Spanish. Likl afta dat, im miit wan paiyanier sista we niem Damaris we did iina di siem sorkit wid im. Afta a wail dem get marid an den shi go liv a Betel wid im.

Iina 2005, dem lef Betel fi tek kier a Breda Jedele mada an im waif mada an faada. Fi da taim de, di tuu a dem did a regila paiyanier. Breda Jedele did elp fi tiich di Pioneer Service School, an im did de pan di Hospital Liaison Committee an di Regional Building Committee.

Iina 2013, Breda an Sista Jedele did go baka Betel fi go wok pan di kanschrokshan prajek we did a gwaan iina Waawik. An som taim afta dat, dem did go wok a Patisn an Waakil. Breda Jedele did get fi wok iina di Local Design/Construction Department an iina Hospital Information Services. An iina Maach 2023, im did staat fi wok az wan elpa fi di Service Committee. Wen im tingk bout aal a di wok we im get fi du fi Jeuova, im se: “Somtaim wen yu get sitn nyuu fi du, yu mait-a fiil fried an tingk se dis biga dan yu, bot a dem taim de yu afi memba fi dipen pan Jeuova, kaaz a im a di wan we a-go elp yu fi du di wok we im gi yu fi du.”

Breda Rumph did baan iina Kalifuoniya we de iina Merika. Wen im did a pikni, im mada did tap go miitn an fiil sorvis bot shi did stil chrai fi tiich im tingz fram di Baibl. Evri ier im wuda go luk fi im granmada uu a did wan Jeuova Witnis we did chrang iina wa shi biliiv iina. Shi did elp im fi waahn fi nuo muor bout di Baibl. An so wen im did a 13 ier uol im aks fi wan Baibl stodi. An pan Septemba 27, 1992, im get baptaiz wen im did a wan tiinieja. An wi api fi nuo se im mada staat fi priich an go a miitn agen, an im faada an im breda an sista did get baptaiz.

Wen im did yong, Breda Rumph did si ou di paiyanier dem wel api. So afta im don ai skuul, im staat fi paiyanier iina Septemba 1995. Iina 2000, im muuv go a Ekwaduor fi go elp out we dem did niid muor elp fi du di priichin wok. A de-so im miit wan paiyanier sista fram Kyanada we niem Inga, an afta a wail dem get marid. Wen dem marid, dem muuv go a wan toun we iina Ekwaduor we neehn av uol iip a Jeuova Witnis. Bot rait ya nou, dem av wan nais kanggrigieshan we a gwaan gud.

Afta a wail, Breda an Sista Rumph did ton speshal paiyanier an den dem go iina di sorkit wok. Iina 2011, dem did go a di Gilead School, an dat a klaas 132. Afta dem gradiyiet fram Gilead, dem go a difrant difrant konchri an du difrant kain-a wok. Laik dem go a Betel, dem du mishineri wok an sorkit wok. Breda Rumph did aal get di chaans fi tiich di School for Kingdom Evangelizers.

Kaaz KUOVID-19 did brok out, Breda an Sista Rumph did afi go baka Merika. Dem did go a Waakil Betel we dem chrien Breda Rumph iina di Service Department. Afta a wail, dem go baka di Ekwaduor branch afis, an Breda Rumph did de pan di Branch Committee. Iina 2023 dem lef de-so an go a Waawik. An iina Janiweri 2024, Breda Rumph did staat fi wok az wan elpa wid di Service Committee. Wen im tingk bout aal a di plies dem we im did get fi wok fi Jeuova, im se: “A no di plies we yu wok mek di wok speshal, bot a di piipl dem we yu wok wid.”

Wi api fi di aad wok we dem breda ya du, an wi “gi [dem] di kain-a rispek we piipl laik [dem] fi get.”​—Fil. 2:29.