Sitn We Kyan Elp Di Uman Dem We A Sofa Kaaz A Di Bad Sitn Dem We Piipl Du Tu Dem

Dem wod ya kom fram di paat we de pan jw.org we niem “Women’s Safety​—The Bible’s Perspective.” An dis a sitn we yu kyan dongluod an print, an den fuol op fi mek wan fuor piej liiflet. Aal yu afi du a klik pan di sitn we de a di en a da paat de we lou yu fi du dat. Wan sista we niem Stacy, we liv iina Merika, se: “Mi did print out som a dem liiflet ya, an mi an wan neda sista did kya dem go gi out a wan a di plies dem iina wi ieriya we dem tek kier a di uman dem we piipl chriit bad.”

Wan a di uman dem we wok de aks ef shi kuda get som muor a dem liiflet ya fi gi tu di uman dem we liv de. So di sista dem kya 40 muor a di liiflet dem, an 30 a di jw.org kyaad go gi dem. An wan neda taim wen dem go bak, di uman we inchaaj a di plies aks ef di sista dem kuda shuo di uman dem we liv de ou di Jeuova Witnis dem stodi di Baibl wid piipl.

Stacy an tuu ada sista did go a wan neda wan a dem plies de. An tingz did wok out nais, kaa dem get fi gi out faiv a dem siem liiflet de, an di piipl dem aal aks di sista dem fi kya som muor kom gi dem. Wan a di uman dem we wok a da plies de tel dem se: “Dis a-go riili elp di uman dem we de ya. Wi riili niid sitn laka dis.” An wan neda taim wen dem go bak, som a di uman dem did waahn fi si wa wi du wen wi a stodi di Baibl wid piipl, an tuu a dem aal se dem wuda kom a di miitn pan di wiiken.

Stacy se: “Dis a wan riili nais liiflet, bot wi neehn nuo se di piipl dem wuda lov it so moch. Yu si wen yu print it an fuol it op, a wan nais nais wie fi mek dem uman ya nuo bout di gud nyuuz. It did toch wi aat wen wi si ou di mesij iina di liiflet did mek dem api. An wi a luk faawod fi si ou Jeuova a-go elp wi az wi gwaan shier di gud nyuuz wid dem uman ya.”