“ Du Unu Bes An Mek Shuor Se Unu Liv Gud Wid Unu Wan Aneda”

Wa Paal did se tu dem breda an sista de mek wi si se a ‘Gad uoli spirit’ mek wi kyan ‘liv gud wid wi wan aneda.’ Bot dis no jos kom bout so, a sitn we wi afi wok aad fi du. So dat miin tu se evri singgl wan a wi iina di kanggrigieshan afi ‘du wi bes fi mek shuor se wi liv gud wid wi wan aneda.’

Tingk bout dis, se sumadi gi yu wan bran nyuu kyaar. A uu yu tingk wuda afi tek kier a it an mek shuor se it no mash op? Yu don nuo se a yu wuda afi du dat. An ef yu no tek kier a it an it go brokdong, yu kyaahn go bliem di sumadi we gi yu di kyaar wen a yu neehn tek kier a it, no chuu?

A siem wie so, fi liv gud wid wi wan aneda a wan gif we Jeuova gi wi. Bot aal a wi afi wok aad fi gwaan liv gud wid wi wan aneda. So ef sitn apm we mek wi naa liv iina piis wid wan a wi breda ar wi sista dem, wi fi aks wiself, ‘Mi a du wa mi fi du fi mek shuor se mi a liv gud wid mi breda ar mi sista?’

‘DU UNU BES’ FI LIV TUGEDA AZ WAN

Bies pan wa di apasl Paal did se, wi kyan si se it no aalwiez iizi fi liv iina piis wid wi breda an wi sista dem, speshali ef dem du ar se sitn we bon wi. Bot dat no miin tu se evritaim wen sumadi se ar du sitn we bon wi, wi afi go tu dem an mek dem nuo ou wi fiil. So bifuo wi go taak tu sumadi bout wa dem du, wi kyan aks wiself, ‘Ef mi go taak tu dem bout di prablem, it a-go mek tingz get beta ar mek tingz get wosa?’ Som a di taim di bes ting fi du a fi jos paadn di sumadi ar jos figet bout it.​—Pr. 19:11; Maak 11:25.

Wi waahn fi du wa di apasl Paal se an “aalwiez shuo lov wen [wi] a diil wid [wi] wan aneda.” (Ifii. 4:2) Bot ef wi a-go du dis, wi afi memba se jos laik ou wi no porfek, wi breda an sista dem no porfek niida. So aalduo aal a wi a chrai aad fi liv laik “wan nyuu sumadi,” non a wi naa go kyan dwi’it iina wan porfek wie. (Ifii. 4:23, 24; Ruo. 3:23) So ef wi memba dem sitn ya, it a-go iiziya fi wi fi paadn wi breda an sista dem an ‘aalwiez shuo dem lov wen wi a diil wid dem.’

Yu si wen wi paadn wi breda an sista dem an no mek a big prablem outa evri likl sitn we dem du we mait-a ort wi, wi a-go kyan ‘liv gud wid wi wan aneda’ iina di kanggrigieshan. Yu si iina Ifiijan 4:3 wen it se “liv gud wid unu wan aneda,” di Griik wod we dem yuuz fi dem wod de, a it siem wan dem yuuz fi taak bout di chring dem iina wi badi we kanek wan buon tu wan neda buon. A siem so wen wi wok aad fi liv iina piis wid wi breda an wi sista dem an du tingz fi shuo se wi lov dem, a dat a-go elp wi fi stik tu wi wan aneda, aal wen wi no laik ou dem gwaan som a di taim.

So wen wan a wi breda ar wi sista dem du sitn we bon wi ar we mek wi fiil a wie, ar dem av som wiez we wi jos kyaahn tek, chrai an si ef yu kyan andastan wa mek dem du wa dem du insted-a fi onggl a luk pan di bad wiez dem we dem av. (Kol. 3:12) An kaa non a wi no porfek, som a di taim wi mait-a se ar du sitn we mek sumadi fiil a wie tu. Wen wi memba dem sitn ya, it kyan elp wi fi ‘du wi bes fi mek shuor se wi liv gud wid wi wan aneda.’