Wa It Riili Miin Fi Bi Wan Kristiyan?—Wa Di Baibl Av Fi Se Bout Dis?

Nof piipl se dem a Kristiyan, bot dat no tap dem fram du aal kain-a tingz we ort ada piipl. Laik yu av som we onggl tingk bout demself wan, som we du tingz we mek ada piipl kyaahn chos dem, an som a dem jos no nais tu ada piipl. Som a dem aal a kip sumadi els wid dem ozban ar waif. Wen piipl si dem ting ya a apm, it mek dem wanda wa it riili miin fi bi wan Kristiyan.

Ou yu kyan nuo wan riil Kristiyan

Enibadi kyan kliem se dem a Kristiyan. Bot yu kyaahn dis taak di taak, yu afi waak di waak kaa di Baibl se wan Kristiyan a sumadi we a fala Jiizas Krais. (Aks 11:26) A Jiizas did se: “Ef unu gwaan du di sitn dem we mi tiich, unu a mi falara dem fi chuu.” ( Jan 8:31) Kaa sumadi a wan Kristiyan, dat no miin se dem naa go slip op somtaim. Bot wan riil Kristiyan a-go a chrai aad evridie fi liv di wie ou Jiizas se im fi liv. Mek wi luk pan som wie ou dis kyan gwaan.

Riil Kristiyan lov piipl fram dem aat

Wa Jiizas did se: “Mi a tel unu fi du sopm nyuu—lov unu wan aneda. Sed wie mi lov unu, a so unu fi lov unu wan aneda. Wen unu lov unu wan aneda, a so piipl gweehn nuo se unu a fi mi falara.”​—Jan 13:34, 35.

Wa Jiizas did du: Jiizas did shuo se im riili lov piipl no mata uu dem bi ar we dem kom fram. Im iil sik piipl, gi onggri piipl fuud fi nyam, an im aal gi op im laif fi piipl tu.​—Matyu 14:14-21; 20:28.

Wa wan riil Kristiyan a-go du: Wan riil Kristiyan a-go shuo se im riili lov piipl. So im a-go kain tu dem, chriit dem fier, an im a-go kwik fi paadn dem tu. Wen piipl niid elp, dem a-go elp dem, an dem redi fi go out a dem wie fi du dat.​—1 Jan 3:16.

Riil Kristiyan anis an shuo piipl se dem kyan chos dem

Wa Jiizas did se: “Mi a di chuut.”​—Jan 14:6.

Wa Jiizas did du: Jiizas aalwiez taak di chuut an im did anis iina evriting we im a du. Im neva chrai fi chrik op piipl iina no wie at aal. Iivn ef it did a-go mek tingz aad fi im, im mek shuor se im did anis iina evriting, an piipl did nuo dat bout im.​—Matyu 22:16; 26:63-67.

Wa wan riil Kristiyan a-go du: Riil Kristiyan pie dem taks an dem wok aad fi du di mount a wok we dem a get pie fi du. Dem no tiif an dem no tel lai niida. (Ruoman 13:5-7; Ifiijan 4:28) Dem no chrik piipl fi get dem moni, an wen dem a du tes dem no kapi an dem ting de. An wen dem a ful out faam, dem no pudong notn pan it we no go so.​—Iibruu 13:18.

Riil Kristiyan jengkl an gud an kain

Wa Jiizas did se: “Aal a unu we taiyad an bordn dong unu kom tu mi an mi wi mek unu get fi res. Jos laka ou di kou tek di wudn yuok pan dem shuolda, a so unu fi tek op di sitn dem we mi tel unu fi du, an tek iin wa mi a tiich, kaa mi wi tek taim wid unu, an mi riili ombl, an unu wi get fi res unu suol. Kaaz di sitn dem we mi a tel unu fi du, dem iizi an di luod we mi de gi unu—lait.”​—Matyu 11:28-30.

Wa Jiizas did du: Jiizas did jengkl an kain, an im neva mek piipl fiil a wie fi kom op tu im an taak tu im. Im did api fi av di pikni dem roun im. Im mek piipl we did schres out fiil beta, an im did shuo se im rispek piipl tu.​—Maak 10:13-15; Luuk 9:11.

Wa wan riil Kristiyan a-go du: Riil Kristiyan taak tu ada piipl iina wan nais wie. Dem naa go disrispek piipl ar kos dem aaf. (Ifiijan 4:29, 31, 32) Dem aalwiez a chrai fi si ou dem kyan du sitn gud fi ada piipl.—Gyalieshan 6:10.

Riil Kristiyan naa go gi dem ozban ar dem waif bon

Wa Jiizas did se: “Ef Gad mek wan man an im waif wan, nobadi no fi plit dem op.”​—Maak 10:9.

Wa Jiizas did du: Jiizas neva marid, bot im mek di wan dem we marid nuo se dem fi stik tu dem ozban ar dem waif an no gi dem bon niida. (Matyu 19:9) Im tel wi bout tingz we wi fi kip we fram we kyan mash op marid laif.​—Matyu 5:28.

Wa wan riil Kristiyan a-go du: Riil Kristiyan a-go kip we fram eniting we kyan mash op dem marid laif. (Iibruu 13:4) Ozban an waif lov an rispek dem wan aneda.​—Ifiijan 5:28, 33.