Di Pramis We Jefta Mek

Di Izrelait dem did ton dem bak pan Jeuova an staat fi worship di faalz gad dem agen. Wen di Amanait dem staat fi fait gens di Izrelait dem, di faalz gad dem kudn du a ting fi elp dem. So di Izrelait dem sofa bad fi wol iip a ier. Wen dem kudn tek it no muo, dem tel Jeuova se: ‘Wa wi du did rang. Du wi a beg yu, siev wi fram wi enimi dem.’ So di Izrelait dem get rid a aal a di faalz gad dem an staat fi worship Jeuova agen. Jeuova kudn bier fi si ou dem a sofa.

Yu did av wan man we kuda fait gud we niem Jefta. A im did get pik fi liid di piipl dem fi go fait gens di Amanait dem. Im se tu Jeuova se: ‘Ef yu elp wi fi win da waar ya, mi pramis yu se wen mi kech baka yaad, di fos sumadi we kom out kom miit mi, mi a gi dem tu yu.’ Jeuova ansa Jefta prieya an elp im fi win di waar.

Wen Jefta kech baka im yaad, di fos sumadi we kom miit im a im daata, di onggl pikni we im av. Shi did de de a nak tambariin an a daans. A wa Jefta a-go du ya nou? Im memba we im pramis Jeuova an se: ‘Nuo sa, mi kyaahn biliiv dis! Mi daata yu mek mi aat a tier op insaida mi. Kaa mi pramis Jeuova sitn, an fi kip da pramis de mi afi go sen yu go a Gad ous a Shailo.’ Bot im daata tel im se: ‘Dadi, ef yu pramis Jeuova se yu a-go du sitn, dwi’it. Di onggl ting mi a beg yu du, mek mi go spen tuu mont wid mi fren dem op iina di mountn. Afta dat mi wi go.’ So Jefta daata wok a Jeuova ous fi di res a ar laif. An evri ier ar fren dem go a Shailo go luk fi ar.