Jeuova Taak Tu Samwel

Iilai, di liida fi di priis dem did av tuu bwai pikni we did wok a Gad ous. Dem did a priis an dem niem Afnai an Finiyas. Dem neehn a du wa Jeuova waahn dem fi du an dem neehn chriit di piipl dem gud. Wen di piipl dem kom fi gi op sakrifais tu Jeuova, Afnai an Finiyas wuda tek out di bes paat a di miit fi demself. Iilai did wel an nuo wa dem did a du, bot im neehn du a ting bout it. Yu tingk Jeuova wuda mek dem gwaan du dat?

Iivn duo Afnai an Finiyas a did big man fi Samwel, im neehn fala dem, an dis did mek Jeuova api. Samwel did a sliip wan nait wen im ier sumadi kaal im niem. Im git op outa im bed, ron go tu Iilai, an se tu im: ‘Si mi ya! Yu did a kaal mi?’ Bot Iilai se tu im se: ‘Nuo sa, mi neehn a kaal yu. Gwaan bak go sliip.’ So Samwel gu baka im bed. Den di sed ting apm agen. Wen Samwel ier sumadi kaal im di tord taim, Iilai pik op se a mos Jeuova did a kaal im. Im tel Samwel se ef it apm agen a dis im fi se: ‘Taak tu mi Jeuova. Yu sorvant a lisn tu wa yu a se.’

Samwel gu baka im bed. Den im ier sumadi a kaal im: ‘Samwel! Samwel!’ Im ansa an se: ‘Taak tu mi, yu sorvant a lisn tu wa yu a se.’ Jeuova tel im se: ‘Tel Iilai se mi a-go ponish im an im fambili. Kaa im nuo se im son dem a du aal kain-a rangz iina mi ous, an im naa du a ting bout it.’ Wen Samwel git op di neks maanin, im go uopm di duor dem iina Gad ous, kaaz a dat im naamali du. Im did fried fi tel Iilai wa Jeuova se. Bot Iilai kaal im an aks im se: ‘A wa Jeuova did se tu yu mi bwai? No fried fi tel mi evriting.’ So Samwel tel im evri singgl ting.

Samwel gruo op an Jeuova did aalwiez de de wid im. Piipl aal uova Izrel did nuo se Jeuova did pik im fi bi wan prafit an wan joj.