Wan Plies Fi Worship Jeuova

Afta Salaman ton king iina Izrel, Jeuova aks im se: ‘Wa yu wuda waahn mi fi gi yu?’ Salaman ansa an se: ‘Yu si kaa mi so yong an mi nat iivn nuo wa mi a du, du mi a beg yu, mek mi waiz so mi kyan tek kier a yu piipl dem.’ Den Jeuova tel im se: ‘Yu si kaa yu aks mi fi mek yu waiz, mi a-go mek yu waiza dan evri ada man pan ort. Bot no onggl dat, mi a-go mek yu rich bad. An ef yu du wa mi tel yu fi du, mi a-go mek yu liv lang.’

Wen Salaman staat fi mek Gad ous, im yuuz di bes guol we yu kuda fain, silva, wud an som priti dier stuon. Wol iip a man an uman we did nuo ou fi du di wok gud did elp fi bil Gad ous. Sevn ier afta dat, dem don bil Gad ous. An dem kip wan speshal miitn fi tel Jeuova se da plies de a fi’im. Dem did av di sakrifais we dem did a gi op tu Jeuova pan di alta we did de de. Salaman niil dong infronta di alta an prie tu Jeuova an se: ‘Jeuova wi Gad, da plies ya we wi mek, it big an priti bot wi nuo se yu dizorv muo dan dis. Bot wi prie se yu wi api wid wi wen wi a worship yu iina da plies ya, an wi a beg yu fi lisn tu wi prieya dem.’ Ou yu tingk Jeuova did fiil bout di plies we dem did bil fi’im an di prieya we Salaman did prie? Az Salaman don prie so, Jeuova sen dong faiya fram outa di skai fi bon op di sakrifais we did de pan di alta. Dis shuo se im did api wid di plies we dem did mek fi’im. Wen di Izrelait dem si dis, dem did api so til.

Piipl aal bout di plies, aal som we liv faar fram Izrel, did nuo ou waiz Salaman bi. Piipl wuda kom kom chek Salaman fi im elp dem diil wid dem prablem dem. Aal di kwiin we kom fram Shiiba did kom aks im som aad kwestiyan fi tes im. Wen shi ier ou im ansa, shi se: ‘Wen di piipl dem tel mi ou yu waiz, mi neehn biliiv dem, bot nou mi si se yu iivn waiza dan wa dem se. Jeuova yu Gad riili a bles yu fi chuu.’ Laif did swiit dem taim de iina Izrel, an di piipl dem did api bad. Bot dat wuda suun chienj.