Wa Yu Fi Du Ef Piipl Naa Chriit Yu Ar Sumadi Els Fier?

1-2. Wen piipl naa get no jostis, wa an wa dem du, an wa wi mait-a a wanda bout?

WI LIV iina wan worl we wol iip a piipl naa get no jostis. Nof taim dem chriit piipl bad kaaz dem puor, we dem kom fram, ou dem luk an ada tingz laik dat. Wol iip a piipl sofa kaaz nof rich piipl an piipl we iina govament no bizniz bout di ort bot onggl a tingk bout di moni we dem kyan mek. So di sitn dem we dem du mait-a kaaz wi an ada piipl fi sofa.

² It no shak wi fi si nof piipl get beks wen piipl a chriit dem ar ada piipl bad. Aal a wi waahn fi liv iina wan worl we wi fiil sief an piipl a chriit wi gud. Siek-a dat, piipl du tingz fi chrai fi get jostis. Laik dem blak ruod an dem ting de ar dem chrai fi bak di piipl dem iina palitiks we pramis dem se dem a-go mek dem get jostis. Bot wi a Kristiyan, wi a “no worliyan,” an a Gad Kindom govament wi a wiet pan fi gi wi riil jostis. (Jan 17:16) Bot it stil bada wi wen wi si se dem naa chriit piipl gud. So wi mait-a a wanda: ‘Wa mi fi du wen mi si dem sitn de a gwaan? Notn di de we mi kyan du rait ya nou fi get jostis?’ Fi ansa dem kwestiyan de, mek wi si ou Jeuova an Jiizas fiil wen dem si se piipl naa get no jostis.

JEUOVA AN JIIZAS AALWIEZ CHRIIT PIIPL FIER

3. Wa mek wi mait-a get beks wen wi si piipl a chriit dem wan aneda bad? (Aizaiya 5:7)

³ Di Baibl mek wi nuo wa mek wi no laik wen piipl chriit wi bad an wen wi si piipl chriit ada piipl bad tu. It tel wi se Jeuova mek wi wid di siem wiez dem we im av, an se im lov wen piipl du wa rait an wen dem chriit dem wan aneda fier. (Sa. 33:5; Jen. 1:26) Jeuova neva chriit nobadi bad, an im no waahn piipl fi chriit dem wan aneda bad niida. (Dyuu. 32:3, 4; Mai. 6:8; Zak. 7:9) Laik iina di taim wen di prafit Aizaiya did de bout, Jeuova ier im piipl a ‘baal out tu im kaaz a ou dem did a sofa’ kaa dem uona piipl did a chriit dem bad. (Riid Aizaiya 5:7.) So Jeuova ponish di wan dem uu neehn a tap du di sitn dem we im se dem no fi du an a chriit dem wan aneda bad.​—Aiz. 5:5, 13.

4. Ou Jiizas fiil wen im si piipl a chriit dem wan aneda bad? (Luk pan di picha tu.)

⁴ Jos laik Jeuova, Jiizas lov jostis an im iet wen piipl no chriit dem wan aneda fier. Wan die Jiizas did si wan man wid wan kripl an, an im did fiil it fi di man so im mek im an get beta. Bot wen di choch liida dem si wa Jiizas du, dem did get beks bad kaa dem se Jiizas did a brok di Sabat laa. So dem neehn bizniz se Jiizas did mek di man get beta. Ou yu tingk Jiizas did fiil bout dat? It did ‘bon im fi si ou dem did a gwaan.’​—Maak 3:1-6.

5. Wa mek wi no fi aalwiez a beks op beks op wiself wen dem naa chriit wi ar sumadi els fier?

⁵ Wen piipl naa chriit dem wan aneda fier, Jeuova an Jiizas beks bad bout it an so notn no rang ef wi fiil da wie de tu. (Ifii. 4:26) Bot wi afi memba se iivn ef wi beks til wi blod a bwail, dat naa go mek piipl get jostis. Matarafak, ef wi gwaan beks op beks op wiself bies pan wa wi si a gwaan roun wi, dat kyan mek wi get sik an en op sad bad. (Sa. 37:1, 8; Jmz. 1:20) So wa wi fi du ef piipl chriit wi bad ar wi si piipl a chriit dem wan aneda bad? Wi kyan du laik wa Jiizas did du.

WA JIIZAS DID DU WEN IM SI SE PIIPL NAA CHRIIT DEM WAN ANEDA FIER?

6. Wen Jiizas did de pan ort, ou im did si som piipl a chriit ada piipl? (Luk pan di picha tu.)

⁶ Wen Jiizas did de pan ort, im did si se nof piipl neehn a get no jostis. Im did si ou di choch liida dem did mek laif aad fi di piipl dem. (Mat. 23:2-4) An im did nuo se di Ruoman ruula dem did chriit di piipl dem bad tu. An kaaz a dat, nof a di Juu piipl dem did waahn fi get frii fram di Ruoman govament, an dem did redi fi fait fi get frii. Bot Jiizas neehn get miks op wid non a dem we did a fait gens di govament. Matarafak, wen im fain out se di piipl dem did waahn fi ton im iina king, im tek we imself.​—Jan 6:15.

7-8. Wa mek Jiizas neva chrai fi get rid a di prablem dem pan da ort ya? (Jan 18:36)

⁷ Wen Jiizas did de pan ort, im neehn get miks op iina palitiks a chrai fi elp piipl fi get jostis. An dis a kaa im nuo se man kyaahn ruul uova demself an dem no av di rait fi du dat niida. (Sa. 146:3; Jer. 10:23) An dem kyaahn get rid a di mien ting we kaaz piipl fi sofa. A Sietan di Devl kanchuol da worl ya, im wikid, an nof piipl av di siem wiez dem we im av. (Jan 8:44; Ifii. 2:2) An kaa wi no porfek, aal piipl we waahn fi du gud en op du tingz we no fier.​—Iik. 7:20.

⁸ Jiizas did nuo se a onggl Gad Kindom govament a-go get rid a di prablem dem iina di worl an mek piipl kyan get jostis. A das wai wen im did de pan ort im wok aad fi ‘priich di gud nyuuz bout Gad Kindom.’ (Luuk 8:1) Im mek “di piipl dem we wel waahn fi si di sitn dem we rait iina Gad yai apm” nuo se wikidnis an sofarieshan a-go don we wid. (Mat. 5:6; Luuk 18:7, 8) Bot a no man govament a-go mek dis apm, a onggl Gad Kindom govament, we ‘no av notn fi du wid da worl ya,’ kyan mek dis apm.​—Riid Jan 18:36.

DU LAIK JIIZAS WEN YU SI PIIPL A SOFA

9. Wa mek yu biliiv se a onggl Gad Kindom govament kyan get rid a sofarieshan?

⁹ Wi liv iina di “laas die dem,” so wi fain se muor piipl a sofa nowadiez dan wen Jiizas did de pan ort. An jos laik iina Jiizas taim, di wan dem we kaaz piipl fi sofa a Sietan an di wikid piipl dem we a du laik im. (2 Tim. 3:1-5, 13; Rev. 12:12) Bot jos laik Jiizas, wi nuo se a onggl Gad Kindom govament a-go kyan mek piipl get jostis an get rid a Sietan an aal a di wikid piipl dem. An kaa wi a priich bout Gad Kindom, wen wi si se piipl naa get no jostis wi naa go blak no ruod an dem ting de ar bak no govament pan da ort ya fi get rid a dem prablem de. Luk pan wa did gwaan wid wan sista we niem Stacy.a Bifuo shi did lorn bout Jeuova, Stacy wuda go pan di ruod an demanschriet wid ada piipl wen shi si se piipl neehn a get no jostis. Bot afta a wail, shi neva shuor ef wa shi did a du did a elp nobadi an a get rid a di prablem dem. Shi se: “Som a di taim wen mi did out de a demanschriet, mi wuda wanda ef wa mi did a du a did di rait ting fi get rid a di prablem dem. Bot nou mi nuo fi shuor se a onggl Gad Kindom govament a-go get rid a aal a di prablem dem iina di worl. An mi nuo se a onggl Jeuova kyan don we wid sofarieshan, kaa dat a sitn we mi kyaahn du.”​—Sa. 72:1, 4.

10. Bies pan Matyu 5:43-48, wa mek wi naa go chrai fi fait gens di govament dem? (Luk pan di picha tu.)

¹⁰ Nof piipl jain op wid ada piipl fi fait gens di govament dem an dem get beks so bad dat dem brok di laa dem an en op mek ada piipl sofa. Bot a no dat Jiizas tiich wi fi du. (Ifii. 4:31) Wan breda we niem Jeffrey se: “Mi nuo se wen piipl a demanschriet tingz mait-a staat aaf kaam, bot kwik a klak dem get beks so bad dat dem staat fi mash op an tiif piipl tingz an aal ort ada piipl tu.” Bot Jiizas tiich wi se wi fi kain tu evribadi, aal di wan dem we a fait gens wi. (Riid Matyu 5:43-48.) An kaa wi a Kristiyan, wi chrai wi bes fi du laik Jiizas.

11. Wa mek it mait-a aad som a di taim fi du laik Jiizas?

¹¹ Aalduo wi nuo se a Gad govament a-go mek evribadi get jostis, som a di taim wi mait-a stil fain it aad fi du laik Jiizas wen piipl chriit wi bad. Tingk bout wa did gwaan wid Janiya uu dem did chriit bad kaaz a ar skin kola. Shi se: “Mi did beks bad. Di sitn dem we piipl se tu mi wuda mek mi fiil a wie, an kaaz a dat, mi did waahn dem fi sofa fi wa dem du. So mi did a tingk bout fi jain op wid di piipl dem we did a demanschriet gens tingz laik dat. Mi did tingk se a di bes wie fi mek piipl nuo bout wa a gwaan an fi get jostis. An mi tingk it wuda mek mi fiil beta tu.” Bot afta a wail, Janiya si se shi did afi chienj op di wie ou shi did a tingk. Shi se: “Mi did a mek di piipl dem iina di worl a tiich mi fi chos iina piipl insted-a fi chos iina Jeuova. So mi mek op mi main se mi a-go tap kip kompni wid di piipl dem we demanschriet gens dem ting ya.” Aalduo it mait-a aarait fi wi get beks bout wa a gwaan iina di worl, wi no fi mek dat kaaz wi fi get miks op iina palitiks ar jain no gruup we a fait gens di ting dem we a gwaan iina di worl.​—Jan 15:19.

12. Wa mek wi no fi spen no uol iip a taim a wach, riid, an a lisn tu sortn an sortn tingz?

¹² Wa kyan elp wi fi kanchuol wiself wen piipl a chriit wi ar ada piipl bad? Wan a di ting dem we wi kyan du a fi mek shuor se wi no riid, wach, ar lisn tu sortn an sortn tingz. Laik som a di tuori dem we piipl put op pan di intanet, dem dwi’it fi mek piipl get beks an fait gens di govament. An nof taim di nyuuz piipl dem we de pan TV an riediyo an dem ting de wuda se tingz bies pan ou dem fiil, no bies pan wa riili apm. Iivn ef wa wi ier pan di nyuuz a chuu, yu tingk it a-go elp wi ef wi jos de de a sidong an a tingk bout it evritaim so? Nuo sa! Ef wi sidong a spen taim a riid an a lisn tu dem sitn de, it mait schres wi out an mek wi get beks bad. (Pr. 24:10) Plos wi mait-a tap biliiv se a Gad Kindom a-go get rid a dem prablem de.

13. Wa kyan elp wi wen piipl a chriit wi an ada piipl bad?

¹³ Ef wi riid wi Baibl evri die an sidong an tingk bout wa wi riid, it wi elp wi fi nuo wa fi du wen piipl chriit wi ar ada piipl bad. Wan sista we niem Alia neehn laik fi si ou di piipl dem did a chriit ada piipl bad iina di ieriya we shi liv. Tu ar it did luk laik se di piipl dem we did a du di bad sitn dem did a get we. Shi se: “Mi did afi sidong an aks miself, ‘Mi riili biliiv se Jeuova a-go saat out dem prablem ya?’ A wen mi did a riid Juob 34:22-29 mi memba se nobadi kyaahn aid we dem a du fram Jeuova. Im a di onggl wan we kyan mek piipl get jostis an saat out di prablem dem we a gwaan iina di worl.” So wail wi a wiet fi Gad govament fi saat out di prablem dem iina da worl ya, wa wi kyan gwaan du?

WA WI KYAN DU YA NOU?

14. Wa a wan sitn we wi kyan du nou? (Koloshan 3:10, 11)

¹⁴ Nof a di taim wi kyaahn tap piipl fram chriit ada piipl bad, bot wi kyan mek shuor se wi chriit piipl gud. An jos laik wa wi taak bout aredi, wi kyan du laik Jiizas an shuo piipl se wi lov dem. An dat wi push wi fi aal shuo lov tu di wan dem we no chriit wi an ada piipl gud. (Mat. 7:12; Ruo. 12:17) Jeuova api wen wi chriit evribadi gud.​—Riid Koloshan 3:10, 11.

15. Wen wi tiich piipl bout Jeuova, ou it elp dem?

¹⁵ Di bes wie fi elp piipl a fi tiich dem bout Jeuova. Wa mek? Kaa wen piipl “nuo bout Jeuova” it wi elp dem fi chienj op dem laif an mek dem lorn fi lov piipl an liv iina piis wid dem. (Aiz. 11:6, 7, 9) Bifuo wan man we niem Jemal did lorn bout Jeuova, im did jain wan gruup we a fait gens di govament kaaz im did tingk se dem a chriit di piipl dem bad. Im se: “Mi kyaahn fuos piipl fi chienj. Nobadi neehn fuos mi fi chienj, bot a di sitn dem we mi lorn fram di Baibl elp mi fi du dat.” Di sitn dem we Jemal lorn did elp im fi tap fait gens di govament. Wen muor an muor piipl lorn bout Jeuova, a dat a-go elp dem fi tap chriit piipl bad.

16. Wa mek yu wel waahn fi tel piipl bout wa Gad govament a-go du?

¹⁶ Jos laik Jiizas, wi wel waahn fi tel piipl se a Gad govament a-go get rid a aal a di prablem dem iina di worl an mek piipl get riil jostis. An dat wi mek di wan dem we piipl a chriit bad nuo se tingz naa no go stie di siem fi eva. (Jer. 29:11) Stacy, we wi did taak bout aredi, se: “Kaa mi nuo se a Gad a-go get rid a aal a di prablem dem we de pan da ort ya, wen piipl chriit mi ar ada piipl bad it elp mi fi iizi miself an nuo se it naa go tan so fi eva. An Jeuova a yuuz di sitn dem iina di Baibl fi osh piipl wen dem sad bad.” Wi fi aalwiez redi fi yuuz di Baibl fi osh di wan dem we piipl a chriit bad. Ef yu get fi nuo muor bout wa di Baibl se bout sofarieshan an wa Gad a-go du bout it, den it a-go iiziya fi yu tiich di piipl dem we yu go a skuul wid ar we yu wok wid dem sitn ya.b

17. Ou Jeuova elp wi fi diil wid it wen piipl a chriit wi bad?

¹⁷ Wi nuo se so langks Sietan a di “ruula fi da worl ya,” piipl gweehn sofa. Bot wi nuo se tingz gweehn get beta kaa Jeuova pramis wi se im a-go elp wi nou an im a-go ‘get rid a’ Sietan an wikid piipl. (Jan 12:31) Iina di Baibl, Jeuova mek wi nuo wa mek so moch piipl a sofa an im mek wi nuo ou im fiil wen im si dat a gwaan. (Sa. 34:17-19) Jeuova yuuz im Bwai Pikni fi mek wi nuo wa wi fi du wen piipl chriit wi bad, an im mek wi nuo tu se a fi im Kindom a-go get rid a aal a di sofarieshan we de pan da ort ya. (2 Pii. 3:13) So mek wi gwaan du aal a we wi kyan du fi priich bout Gad Kindom an gwaan wiet pan di taim wen evribadi we de pan da ort ya a-go “aalwiez du wa rait an wa fier.”​—Aiz. 9:7.