Aks Di Elda Dem Fi Elp Yu

1. Ou Jeuova shuo wi se im lov wi uol iip?

JEUOVA lov aal a wi iina di kanggrigieshan, an im tek kier a wi jos laik ou wan shepad tek kier a shiip we im lov. An wi nuo se im lov wi kaaz im sen Jiizas fi ded fi wi an im yuuz di elda dem fi tek kier a aal a wi iina di kanggrigieshan. (Aks 20:28) Jeuova waahn di elda dem fi tek taim wid wi an chriit wi gud. So im yuuz Jiizas fi elp di elda dem fi nuo ou fi tek kier a wi an protek wi so dat wi an Jeuova kyan kip kluos.​—Aiz. 32:1, 2.

2. Bies pan Iziikel 34:15, 16, a uu Jeuova wel waahn fi elp?

² Aalduo Jeuova lov di uol a wi, im wel waahn fi elp di wan dem we a sofa kaa dem mait-a du sitn rang, an a di elda dem im yuuz fi du dat. (Riid Iziikel 34:15, 16.) Bot Jeuova waahn wi fi aks fi elp wen wi niid it. So im waahn wi fi prie tu im an aks im fi im elp wi. Bot a no onggl dat, im waahn wi fi go tu ‘di elda dem’ iina di kanggrigieshan an aks dem fi elp wi tu.​—Ifii. 4:11, 12.

3. Ou it a-go elp di uol a wi wen wi luk pan ou Jeuova a yuuz di elda dem fi elp wi?

³ Iina da lesn ya, wi a-go luk pan ou Jeuova yuuz di elda dem fi elp di wan dem we no so kluos tu im agen. An fi du dat, wi a-go get di ansa fi dem chrii kwestiyan ya: (1) A wen wi fi aks di elda dem fi elp? an (2) A wa mek wi fi du dat? an (3) Ou di elda dem elp wi? An aal ef rait ya nou wi kluos kluos tu Jeuova an wi no niid di elda dem fi elp wi, wen wi luk pan di ansa dem fi dem kwestiyan ya, wi a-go riili api fi wa Jeuova a du fi elp im piipl dem, an it a-go mek wi nuo wa wi niid fi du ef wi niid di elda dem fi elp wi iina di fyuucha.

A WEN WI FI ‘AKS DI ELDA DEM’ FI ELP?

4. A wa mek wi kyan se Jiemz 5:14-16, 19, 20 a taak bout sumadi we no so kluos tu Jeuova agen? (Luk pan di picha dem tu.)

⁴ Iina di buk we im rait, Jiemz mek wi nuo ou Jeuova yuuz di elda dem fi elp wi. Im se: “Non a unu sik? Aks di choch liida dem fi kom prie fi unu.” (Riid Jiemz 5:14-16, 19, 20.) Iina dem vors ya, Jiemz did a mek wi nuo wa sumadi niid fi du ef im an Jeuova no so kluos agen. An wi nuo dat kaaz im neehn tel di sumadi we sik se dem fi go a dakta, bot im mek dem nuo se dem fi aks di elda dem fi elp dem. An im tel wi se di sumadi we sik a-go get beta kaa dem a-go get paadn fi dem sin dem. Wi nuo se sumadi we sik afi go a dakta ef dem a-go get beta, an dem afi tel di dakta wa an wa a apm tu dem an ou dem fiil. An ef dem a-go get beta, dem afi fala di sitn dem we di dakta tel dem fi du. A siem wie so ef sumadi a-go get kluos tu Jeuova agen dem afi taak tu di elda dem an tel dem bout wa an wa a gwaan wid dem, an den dem afi fala di sitn dem we di elda dem tel dem fi du we kom fram di Baibl.

5. Wa an wa kyan elp wi fi nuo ef wi an Jeuova no so kluos agen?

⁵ Wa wi jos taak bout iina Jiemz chapta 5 a elp wi fi si se wi fi go tu di elda dem an get elp wen taim wi si se wi an Jeuova no so kluos agen. Bot it impuotant se wi get di elp bifuo wi du sitn we a-go ort Jeuova. An ef wi a-go du dis, wi afi riili sidong an luk iina wiself kaa di Baibl mek wi nuo se ef wi no main shaap, wi kyan fiil se wi an Jeuova gud wen notn no go so. (Jmz. 1:22) An a dat did apm tu som a di breda an sista dem we did a liv iina Saadis, an Jiizas mek dem nuo se Jeuova neehn api wid dem. (Rev. 3:1, 2) Wan a di wie dem ou wi kyan nuo ef wi an Jeuova stil kluos kluos a ef wi chek fi si ef wi fiil di siem wie bout Jeuova laik wen wi did get baptaiz. (Rev. 2:4, 5) An fi du dat, wi kyan aks wiself kwestiyan laik dem ya: ‘Mi stil api fi du mi Baibl riidin an fi tingk bout wa mi riid? Mi a mek shuor se mi de a aal a di miitn dem an a redi op miself fi dem tu, ar mi a mis wan an tuu miitn ya nou? Mi stil lov fi go a fiil sorvis laik fos taim, ar mi prefa fi spen mi taim a du ada tingz ya nou? Mi fain se mi a tingk muor bout moni an tingz nowadiez dan ou mi yuus tu tingk bout dem fos taim?’ Di ansa dem we yu gi fi dem kwestiyan ya kyan shuo ef yu an Jeuova no so kluos agen. An ef a so it go an yu no du notn bout it, tingz mait-a get wos. An ef yu fain se it aad fi get kluos tu Jeuova agen bai yuself, ar yu du sitn aredi we ort Jeuova, yu niid fi aks di elda dem fi elp yu.

6. Wa di wan dem we sin bad gens Jeuova niid fi du?

⁶ Som a di taim sumadi mait-a sin bad gens Jeuova, an dat kuda mek dem get put outa di kanggrigieshan. So wen dat apm, dem fi go taak tu wan a di elda dem. (1 Kor. 5:11-13) Sumadi we sin bad gens Jeuova niid elp so dat im an Jeuova kyan ton gud fren agen. Bot fi Jeuova paadn dem, dem afi “du di sitn dem we shuo se dem riili sari bout dem sin.” (Aks 26:20) An wan a dem sitn de we dem niid fi du a fi tel di elda dem iina dem kanggrigieshan bout di bad sitn dem we dem du.

7. Uu els niid fi aks di elda dem fi elp?

⁷ Di elda dem no onggl elp di wan dem we sin bad gens Jeuova, bot dem elp di wan dem we no so chrang iina wa dem biliiv iina tu. (Aks 20:35) Laik yu mait-a fain it aad fi fait gens di bad sitn dem we yu fiil laik yu wuda waahn fi du. An dis mait-a riili aad fi yu kaa bifuo yu ton wan Kristiyan yu mait-a yuus tu tek jogz aafn, wach bluu muuvi an dem ting de, ar get yuself miks op iina seks sin. Bot yu na’afi fiil laik se yu afi fait dem sitn ya bai yuself. Yu kyan taak tu wan a di elda dem we yu nuo se wi lisn tu yu, an tel yu wa yu kyan du fi fait gens dem bad sitn de, an uu wi mek yu nuo se Jeuova api wid yu kaa yu no waahn fi du di bad sitn dem we yu fiil laik fi du. (Iik. 4:12) Ef yu fiil taiyad an fiil laik yu waahn gi op kaa yu fain it aad fi du wa rait, di elda dem a-go mek yu memba se Jeuova api wid yu kaa yu a aks fi elp, an dat shuo se yu ombl an naa gwaan laik se yu no niid elp an dat yu waahn fi mek Jeuova api.​—1 Kor. 10:12.

8. Yu tingk wi niid fi taak tu di elda dem bout evri likl ting wi du? Tel wi wa mek yu se so.

⁸ A no evri likl ting wi afi go tu di elda dem bout. Laik yu mait-a se sitn bad tu wan breda ar wan sista we bon dem, ar yu mait-a get beks bad wid dem tu. Insted-a fi go tu wan elda bout dat, yu kuda du wa Jiizas se an go taak tu di breda ar di sista an mek dem nuo se yu sari fi wa yu du. (Mat. 5:23, 24) An yu kuda luk op tingz iina di buk an pamplet dem bout ou fi bi jengkl, an ou fi tek taim wid piipl, an ou fi kanchuol yuself so dat yu kyan du dem sitn de beta. Bot ef yu fain se yu stil niid elp, yu kuda aks wan elda fi elp yu. An wi si dis iina di leta we Paal did rait tu di Filipiyan piipl dem. Im did aks wan breda fi elp Yuodiya an Sinteki fi saat out di prablem we dem did av wid dem wan aneda. An a siem so wan elda iina fi yu kanggrigieshan kuda du di siem ting fi elp yu tu.​—Fil. 4:2, 3.

WA MEK WI FI AKS DI ELDA DEM FI ELP?

9. Wa mek wi no fi mek shiem tap wi fram aks di elda dem fi elp? (Pravorbz 28:13)

⁹ Wen wi sin bad gens Jeuova, ar wi fiil laik se wi kyaahn fait gens di bad sitn dem we wi fiil laik wi waahn fi du, wi no fi shiem fi aks di elda dem fi elp. An dis a kaa Jeuova gi wi di elda dem fi elp wi so dat wi an im kyan aalwiez bi gud fren. So wen wi aks di elda dem fi elp, dat shuo se wi chos Jeuova an a du wa im se wi fi du. An dis a shuo wi se wi niid Jeuova fi elp wi fi gwaan du di sitn dem we rait. (Sa. 94:18) An ef wi sin bad gens Jeuova, wi kyan nuo fi shuor se ef wi fi go tu di elda dem an tel dem bout di sitn we wi du an tap dwi’it, Jeuova wi paadn wi.​—Riid Pravorbz 28:13.

10. Wa wi apm ef wi no tel di elda dem bout di bad sitn dem we wi du?

¹⁰ Wen wi sin bad gens Jeuova, a uol iip a gud tingz kyan gwaan fi wi ef wi go taak tu di elda dem bout wa wi du. Bot yu si ef wi aid wa wi du, tingz a-go get bad fi wi, an a dat did apm wid King Dievid. Wen im did sin gens Jeuova, im did aid wa im du, an kaaz a dat, im did schres out an im did sad bad kaa im did nuo se Jeuova neva api wid wa im du. (Sa. 32:3-5) So jos laik wen sumadi get wan kot, ef dem no tek kier a it, it a-go get wos. A siem wie so ef wi sin bad gens Jeuova an wi no taak tu di elda dem, wi an Jeuova naa go bi fren agen. An Jeuova no waahn dat fi apm, so a das wai im se: “Mek mi an unu taak so tingz kyan aarait wid mi an unu.” So ef wi sin bad, mek wi taak tu di elda dem bout it.​—Aiz. 1:5, 6, 18.

11. Ef wi sin bad an aid it, wa kain-a prablem it kyan kaaz fi di ada breda an sista dem?

¹¹ Ef wi sin bad gens Jeuova an aid it, dat kuda kaaz prablem iina di kanggrigieshan. Laik wi kuda mek Jeuova uoli spirit no de iina di kanggrigieshan, ar wi kyan kaaz prablem fi wi breda an sista dem tu. (Ifii. 4:30) An a siem wie so ef wi fain out se sumadi sin bad iina di kanggrigieshan, wi fi beg dem fi go taak tu di elda dem bout it,a kaa ef wi nuo bout it an aid it, a sin wi a sin gens Jeuova tu. (Liv. 5:1) Kaa wi lov Jeuova, dat a-go push wi fi taak op an tel di elda dem bout wa wi du. Da wie de, a elp wi a elp fi kip di kanggrigieshan kliin an a elp wi a elp di sumadi fi ton bak gud fren wid Jeuova.

A OU DI ELDA DEM ELP WI?

12. A ou di elda dem elp di wan dem we no so chrang iina wa dem biliiv iina?

¹² A Jeuova a yuuz di elda dem fi elp di wan dem we no so chrang iina wa dem biliiv iina. (1 Tes. 5:14) So ef yu sin bad, di elda dem mait-a aks yu som kwestiyan fi fain out wa de iina yu aat an main. (Pr. 20:5) It mait-a no iizi fi yu taak tu di elda dem kaa yu mait-a bi sumadi we shai ar yu mait fiil shiem bout wa yu du. Bot yu kyan elp dem fi elp yu wen yu tel dem wa a gwaan wid yu. An no fiil no wie ef di sitn dem we yu se mait-a soun laik dem no mek no sens. (Juob 6:3) Di elda dem naa go kwik fi joj yu, bot dem a-go lisn gud tu wa yu se an chrai fi andastan wa yu a go chuu bifuo dem yuuz di Baibl fi elp yu. (Pr. 18:13) Di elda dem nuo se it a-go tek som taim fi elp sumadi we sin bad, so dem naa go jos taak tu yu wan taim an tingk se a it dat.

13. A ou di elda dem kyan yuuz Gad Wod an dem prieya fi elp yu? (Luk pan di picha dem tu.)

¹³ Wen yu go tu di elda dem fi elp, dem naa go mek yu fiil wosa dan ou yu fiil aredi. Bot dem a-go prie fi yu, an yu mait-a shak fi si ou ‘dem prieya kyan elp yu.’ Wen dem elp yu, it wuda komiin laik a Jeuova a yuuz ‘dem fi put ail pan yu.’ (Jmz. 5:14-16) Da “ail” ya a di chuut we de iina Gad Wod. So di elda dem a-go yuuz Gad Wod fi elp yu an fi mek yu fiil beta so dat yu an Jeuova kyan ton gud fren agen. (Aiz. 57:18) Di sitn dem we dem tel yu fram di Baibl kyan gi yu di chrent we yu niid fi du wa rait. Di elda dem kyan elp yu fi ier Jeuova a se tu yu se: “Go da wie ya. A dis a di rait wie fi go.”​—Aiz. 30:21.

14. Bies pan Gyalieshan 6:1, a ou di elda dem elp sumadi we “mek a rang muuv”? (Luk pan di picha dem tu.)

¹⁴ Riid Gyalieshan 6:1. Wan breda ar wan sista we “mek a rang muuv” naa liv di wie ou Gad se dem fi liv. Da rang muuv de kuda miin se im du sitn we no waiz ar im sin bad gens Jeuova. Lov a-go mek di elda dem ‘chrai fi karek da sumadi de, bot dem a-go tek dem taim wid im’ wen dem a du dat. Dis wuda komiin laik wen wan dakta a set bak sumadi buon we brok so dat di buon kyan get beta. Jos laik ou wan dakta a-go tek im taim so dat di sumadi no fiil no uol iip a pien wen dem a set bak di buon, a siem wie so di elda dem a-go ‘tek dem taim wid sumadi we sin gens Jeuova’ so dat dem no fiil wosa dan ou dem did fiil aredi. Di Baibl tel di elda dem se dem fi ‘wach demself’ so dat dem no en op du wa rang. Bot di elda dem nuo se dem no porfek an dem memba dat wen dem a elp sumadi fi du wa rait. So dem naa go gwaan laik dem beta dan di sumadi we dem a elp an laik se dem kyaahn du notn rang tu. Insted-a dat, dem a-go ombl demself an shuo se dem fiil it fi di sumadi.​—1 Pii. 3:8.

15. Wa mek wi no fi fried fi go tu di elda dem ef wi av wan prablem?

¹⁵ Aal a wi kyan chos di elda dem iina wi kanggrigieshan. Jeuova chrien dem gud so dem naa go kya wi bizniz go a ruod, an dem naa go tel wi tingz ou dem fiil it fi go, bot dem a-go yuuz di Baibl fi mek wi nuo wa fi du. An dem naa go lef yu pan yu uon, dem a-go elp yu fi diil wid yu prablem dem. (Pr. 11:13; Gya. 6:2) Aal a dem av difrant difrant wiez an go chuu difrant tingz iina laif. Bot wi na’afi fried fi go taak tu eni wan a dem bout sitn we wi a go chuu. An wi no fi a go tu difrant difrant elda fi aks dem we dem tingk bout sopm kaa ‘wi waahn fain sumadi fi tel wi wa wi waahn fi ier’ insted-a fi ier ‘wa Jeuova waahn wi fi du.’ (2 Tim. 4:3) Wen wi go tu wan elda bout wan prablem, im mait-a aks wi ef wi did taak tu wan neda elda bout it fos an wa dem mait-a tel wi. An kaa im ombl, im mait taak tu wan neda elda fos bifuo im se notn tu yu.​—Pr. 13:10.

WA WI AFI DU FI WISELF

16. Wa di uol a wi afi du fi wiself?

¹⁶ Aalduo di elda dem de de fi elp wi wen wi av wi prablem dem, dem naa go tel wi wa wi fi du. Evri wan a wi afi shuo Jeuova se wi lov im an se wi waahn fi mek im api bies pan di sitn dem we wi se an di ting dem we wi du. An Jeuova a-go elp wi fi du di ting dem we waiz so dat wi kyan stik tu im no mata wa. (Ruo. 14:12) Insted-a fi tel wi wa fi du, di elda dem a-go yuuz Gad Wod fi mek wi nuo wa wi fi du. Wen wi fala wa di Baibl se, it a-go elp fi ‘chrien wi’ fi nuo wa rait fram rang wen wi a mek op wi main fi du sitn.​—Iib. 5:14.

17. A wa Jeuova waahn wi fi du?

¹⁷ Duohn wi api se Jeuova a wi Gad an wi a fi im piipl, kaa im gi wi Jiizas, “di gud shepad,” fi kom ded fi wi so dat wi kyan get di chaans fi liv fi eva. (Jan 10:11) An jos laik we Jeuova did pramis se im a-go du, im gi wi di elda dem iina di kanggrigieshan fi tek kier a wi. Im se: “[Mi] a-go gi dem shepad uu a-go liid dem an riili tek kier a dem.” (Jer. 23:4) So wen wi sin bad, ar wi no fiil so chrang iina wa wi biliiv iina, wi no fi ich fi aks di elda dem fi elp. An a so wi a-go si ou Jeuova a-go yuuz dem fi elp wi.