Gad A-Go Lov Wi Fi Eva

1-2. Ou som Kristiyan mait-a fiil som a di taim?

TINGK bout wan buot we de outa sii wen wan powaful staam a gwaan. Di wiev dem a baks di buot aal uova di plies, bot ef sumadi chuo wan angka iina di sii, it wi kip di buot wan plies so dat it no jrif we.

² Wen yu a go chuu wan rof taim, yu mait-a fiil laik da buot de, laik laif a baks yu aal bout di plies. Wan minit yu shuor se Jeuova lov yu an a elp yu. Bot di neks minit, yu wanda ef im iivn si wa yu a go chuu. (Sa. 10:1; 13:1) Miebi wan a yu fren dem mait-a tel yu sitn we mek yu fiil beta fi wan likl wail. (Pr. 17:17; 25:11) Bot yu staat fi wanda agen ef Jeuova riili a elp yu. Yu mait-a iivn fiil laik se Jeuova kudn lov sumadi laka yu an se yu no wot notn tu im. So ou wi kyan aalwiez nuo fi shuor se Jeuova lov wi an se im a-go elp wi?

3. Wa Saam 31:7 an 136:1 tiich wi bout ou Jeuova lov wi, an wa mek wi kyan se nobadi kyaahn lov sumadi an stik tu dem beta dan Jeuova? (Luk pan di picha tu.)

³ Wan ting we wi fi memba wen wi a go chuu wan rof taim a se Jeuova a-go aalwiez lov wi an stik tu wi fi eva. (Riid Saam 31:7; 136:1.) Nobadi kyaahn lov sumadi an stik tu dem beta dan Jeuova. Matarafak, di Baibl se Jeuova “a-go lov [wi] an stik tu [wi] fi eva.” (Ek. 34:6, 7) An dis a wa di Baibl se tu bout Jeuova: “Di wan dem we kaal pan yu nof nof, yu lov dem an yu stik tu dem.” (Sa. 86:5) So dat miin se Jeuova naa go lef im piipl dem we a worship im! An wen wi memba se Jeuova lov wi an a stik tu wi, dat kyan elp wi fi go chuu wi prablem dem.​—Sa. 23:4.

WAN A DI FOS TING WE WI LORN A DAT JEUOVA LOV WI

4. Tel wi som a di fos sitn dem we wi lorn fram di Baibl an wa mek wi kyan riili biliiv dem sitn de.

⁴ Sitn els we kyan elp yu wen prablem a lik yu a wen yu tingk bout di “fos ting dem we yu did lorn fram di Baibl.” Wan a dem a se Jeuova lov yu. An yu lorn tu se Gad niem Jeuova an Jiizas a im wan dege-dege Bwai Pikni, an se wen sumadi ded dem jos ded, dem no nuo notn at aal, an se di ort a-go ton iina wan paradais we piipl a-go liv fi eva. (Sa. 83:18; Iik. 9:5; Jan 3:16; Rev. 21:3, 4) Wen yu fain out se dem sitn ya we yu lorn kom fram di Baibl, nobadi kudn tel yu notn kaa yu nuo se a di chuut dis. Kaa wan a di fos ting we wi lorn a se Jeuova lov wi, mek wi si ou dat kyan elp wi fi nuo fi shuor se Jeuova kier bout wi an se im si wa wi a go chuu wen prablem a lik wi.

5. Ef sumadi biliiv sitn we di Baibl no tiich, wa im kyan du?

⁵ Wen yu did jos staat fi stodi di Baibl, wa did elp yu fi no biliiv di sitn dem we di Baibl no tiich? Miebi we yu did du a luk pan wa yu did lorn a yu choch an mach it op wid wa di Baibl tiich. Laik miebi yu did biliiv se Jiizas a Gad, bot wen yu staat fi stodi di Baibl, yu mait-a did aks yuself se: ‘Jiizas a riili Gad duo?’ Wen yu staat fi stodi wa di Baibl se bout dis, yu fain out se Jiizas a no Gad fi chuu. An so insted-a fi gwaan biliiv se Jiizas a Gad, yu staat fi biliiv se “bifuo Gad mek notn, Jiizas did de de” an se im a “Gad wan dege-dege Bwai Pikni.” (Kol. 1:15; Jan 3:18) Ye, it mait-a aad fi tap biliiv di sitn dem we di Baibl no tiich. (2 Kor. 10:4, 5) Bot yu si wen yu lorn di chuut, yu no biliiv dem sitn de agen.​—Fil. 3:13.

6. Wa mek wi nuo fi shuor se Jeuova ‘lov wi an a-go stik tu wi fi eva’?

⁶ Wen yu a go chuu yu prablem dem, an yu a wanda ef Jeuova lov yu, aks yuself, ‘Wa mi a tingk mek sens?’ Den mach op we yu a tingk wid wa Saam 136:1 se bout Jeuova lov. Wa mek it se Jeuova ‘lov a-go mek im aalwiez a-go di de fi yu?’ An wa mek it se dat 26 taim iina da Saamz de? Jeuova lov yu an a-go aalwiez di de fi yu, an dis a wan a di fos ting we yu lorn we yu nuo se a chuu. A wan big lai se yu no wot nof tu Jeuova an se im no lov yu. So jos laik ou wi dash out di ada lai dem we di Baibl no tiich, a so wi a-go dash we da wan ya tu!

7. Tel wi som skripcha we kyan mek wi nuo fi shuor se Jeuova lov wi.

⁷ Uol iip muor tingz iina di Baibl mek wi nuo se Jeuova lov wi. Laik Jiizas did tel im falara dem se: “Tu Gad unu wot muo dan nof nof bod.” (Mat. 10:31) An Jeuova tel im piipl dem se: “Mi a-go mek yu chrang, ye man, mi a-go elp yu, mi a-go mek yu tan op chrang kaaz mi a-go uol aan pan yu wid mi rait an we mi yuuz fi du di ting dem we rait.” (Aiz. 41:10) Jiizas neva se ‘Yu mait-a wot muor tu Gad,’ an Jeuova neva se ‘Miebi mi a-go elp yu.’ Bot dem se: ‘Unu wot muo tu Gad’ an “Mi a-go elp yu.” So ef yu eva a go chuu wan prablem an yu fiil laik se Jeuova no lov yu, wen yu riid dem skripcha de, dem kyan mek yu shuor se yu wot nof tu im. Eniting we dem skripcha ya se, a so it go fi chuu. So prie tu Jeuova an tingk bout wa dem skripcha de se. An wen yu du aal a dat, den yu kyan se wa 1 Jan 4:16 se: “Wi nuo an wi biliiv se Gad lov wi.”a

8. Ef som a di taim yu a wanda ef Jeuova lov yu, wa yu kyan du?

⁸ Wa ef som a di taim yu stil a wanda ef Jeuova lov yu fi chuu? Ef a so yu fiil, aks yuself, ‘Wa mi nuo bout Jeuova?’ kaaz di wie ou wi fiil, a no so it aalwiez go fi chuu. Bot bies pan wa wi lorn iina di Baibl, wi nuo se Jeuova lov wi fi chuu, an ef wi no biliiv dat, den it wuda komiin laik se wi riili no biliiv se Gad a lov.​—1 Jan 4:8.

TINGK BOUT OU JEUOVA “LOV YU”

9-10. Wa Jiizas weehn a taak bout wen im se: “Mi Faada lov unu,” we de a Jan 16:26, 27? (Luk pan di picha tu.)

⁹ Wi kyan lorn muor bout Jeuova lov fi wi wen wi tingk bout wa Jiizas did tel im falara dem se. Im se: “Mi Faada lov unu.” (Riid Jan 16:26, 27.) Jiizas neehn se dis jos fi mek im falara dem fiil gud. Matarafak, wen im se dis, a prieya im did a taak bout, im neehn a taak bout wa im falara did a fiil dem taim de.

¹⁰ Jiizas did tel im falara dem se wen dem a prie, dem fi prie tu Jeuova an no tu im, bot dem afi go chuu im, Jiizas. (Jan 16:23, 24) An dat a sitn we dem did niid fi nuo, kaaz afta im kom bak alaiv, im falara dem mait-a did waahn fi prie tu im. Kaa memba ino, dem an Jiizas did a gud gud fren, an dem mait-a did tingk se chuu Jiizas did lov dem bad, im wuda aks im Faada fi gi dem di sitn dem we dem waahn. Bot Jiizas mek dem nuo se a no so dem fi tingk. Wa mek? Kaa im tel dem se: “Mi Faada lov unu.” An dat a wan a di fos ting we wi lorn fram di Baibl bout prieya. Tingk bout wa dis miin fi yu: Wen yu stodi di Baibl, yu get fi nuo uu Jiizas bi an yu get fi lov im tu. (Jan 14:21) Bot jos laik di Kristiyan dem bak iina Baibl taim, yu kyan prie tu Gad an nuo fi shuor se ‘im lov yu.’ An evritaim yu prie tu Jeuova, yu shuo se yu biliiv dis wid aal a yu aat.​—1 Jan 5:14.

WA MEK WI MAIT-A FIIL SE JEUOVA NO LOV WI?

11. Wa mek Sietan wuda api ef wi biliiv se Jeuova no lov wi?

¹¹ Wa a wan riizn we mek wi mait-a fiil se Jeuova no lov wi? Yu mait-a ansa da kwestiyan de an se a Sietan. An ye, yu rait. Im a wan a di riizn we mek wi mait-a fiil so. Sietan waahn wi fi biliiv se Jeuova no lov wi, an a das wai di skripcha se im “a luk sumadi fi nyam.” (1 Pii. 5:8) An wan wie im du dat a fi mek wi fiil laik se wi no wot notn tu Jeuova iivn duo a lov push Jeuova fi sen Jiizas fi kom ded fi wi. (Iib. 2:9) Bot a uu wuda api ef wi biliiv se Jeuova no lov wi, an a uu wuda waahn wi fi gi op an tap sorv Jeuova? No Sietan! Tingk bout wa Sietan riili a chrai fi du: Im a di wan we Jeuova no lov agen, bot im a chrai “chrik” wi fi mek wi tingk se Jeuova no lov wi an no waahn av notn fi du wid wi. (Ifii. 6:11) Wen yu si se a dat Sietan a chrai fi du, mek op yu main fi “tan op chrang chrang gens im.”​—Jmz. 4:7.

12-13. Ou sin mait-a mek wi fiil som a di taim?

¹² Wan neda riizn wa mek wi mait-a fiil se Jeuova no lov wi a kaaz a di sin we wi get fram Adam. (Sa. 51:5; Ruo. 5:12) Sin mek it aad fi piipl an Jeuova bi gud gud fren, an it mash op di wie ou wi tingk, an it mash op wi badi tu.

¹³ Sin kyan mek wi fiil gilti, fiil shiem, an mek wi wori wori op wiself, an a so wi fiil wen wi du notn bad. Bot a no onggl dat, wi mait-a fiil so tu kaa wi nuo se wi a sina. Bot a no so Jeuova did mek wi fi stie. (Ruo. 8:20, 21) Jos laik ou wan kyaar kyaahn muuv gud wen di taiya pongcha, a siem wie so kaa wi no porfek wi kyaahn du evriting we Jeuova mek wi fi du. An a das wai som a di taim wi wanda ef Jeuova riili lov wi fi chuu. An ef a so yu fiil, yu fi memba se Jeuova lov yu an a-go stik tu di wan dem we lov im an a du wa im se.​—Nii. 1:5.

14. Ou wen wi tingk bout se Jiizas kom ded fi wi, dat kyan elp wi fi si se Jeuova riili lov wi? (Ruoman 5:8) (Luk tu pan di paat we niem “No Mek ‘Sin Get Di Beta A Yu.’”)

¹⁴ Som a di taim wi mait-a fiil bad kaa wi fiil se wi no dizorv Jeuova lov. An a chuu, wi riili no dizorv Jeuova lov, an a das wai Jeuova lov so speshal. Wi kyaahn du notn fi get Jeuova lov pan wi uon. Bot stil, Jeuova sen Jiizas fi kom ded fi wi an dat kuda mek wi get paadn fi wi sin dem. (1 Jan 4:10) An memba tu se Jiizas neehn kom fi siev piipl we porfek, bot a piipl we a sina im ded fa. (Riid Ruoman 5:8.) Non a wi kyaahn du notn porfek, an Jeuova no ekspek wi fi du notn porfek niida. Wen wi get fi si se kaa wi a sina som a di taim wi mait-a fiil se Jeuova no lov wi, den wi a-go wok aad fi mek shuor se wi no tingk dem wie de.​—Ruo. 7:24, 25.

MEK OP YU MAIN FI STIK TU JEUOVA

15-16. Ef wi stik tu Jeuova no mata wa, wa wi nuo fi shuor wi apm fi wi, an wa mek? (2 Samwel 22:26)

¹⁵ Jeuova waahn wi fi du di rait ting an “stik tu im no mata wa.” (Dyuu. 30:19, 20) An ef wi du dat, wi kyan nuo fi shuor se im a-go stik tu wi tu. (Riid 2 Samwel 22:26.) So langks wi stik tu Jeuova, wi kyan dipen pan im fi elp wi wen wi a go chuu eni prablem.

¹⁶ Jos laik we wi taak bout aredi, wi av nof riizn wa mek wi nuo se wi kyan diil wid eni prablem we kom op iina wi laif kaa wi nuo se Jeuova lov wi an im a-go elp wi. A dat di Baibl tiich wi se. So ef yu eva fiil laik se Jeuova no lov yu, sidong an tingk bout wa wi nou bout Jeuova lov fi wi insted-a fi a tingk bout ou yu fiil. Jos memba se wa di Baibl se a chuu​—Jeuova a-go aalwiez lov wi, an im a-go stik tu wi fi eva.