Ou Wi Kyan Prie Tu Jeuova Fram Wi Aat?

1-2. (a) Wa mait-a mek it aad fi wi tel Jeuova ou wi riili fiil? (b) Ou wi nuo se Jeuova wel waahn fi ier wi wen wi prie?

YU EVA fiil laik se wen yu a prie yu jos a se di siem ting dem uova an uova agen, an yu naa tel Jeuova ou yu riili fiil? Ef a so yu fiil, jos nuo se a no yu wan fiil so. Kaa di uol a wi so bizi, wi mait-a fain se wi jos se wan likl kwik prieya an go bout wi bizniz an no riili spen no taim a taak tu Jeuova. Ar wi mait-a fain it aad fi tel Jeuova ou wi riili fiil kaa wi fiil se wi no gud inof fi taak tu im.

² Wen wi a prie tu Jeuova, wi no fi soun laik wi a shuo aaf an a yuuz bie big wod wen wi a taak tu im. Jeuova lov wen piipl taak tu im fram diip dong iina dem aat. An wi afi ombl tu kaa di Baibl mek wi nuo se a dem wan de Jeuova lisn tu. (Sa. 10:17) Jeuova riili waahn fi ier wa de pan wi main an wa iina wi aat. So wen wi a prie im lisn gud tu evriting we wi a se.​—Sa. 139:1-3.

3. Wa a som kwestiyan wi a-go luk pan iina da lesn ya?

³ So mek wi aks wiself dem kwestiyan ya: Wa mek wi no fi mek notn tap wi fram prie tu Jeuova an tel im ou wi riili fiil? Ou wi kyan prie iina wan wie we a-go mek wi get kluosa an kluosa tu Jeuova? Wa wi kyan lorn fram som a di prieya dem we de iina di Baibl, an ou dem prieya de kyan elp wi fi mek fi wi uona prieya dem beta? An wa wi kyan du wen wi schres out an no nuo wa fi prie se? Mek wi luk pan di ansa dem fi dem kwestiyan ya.

NO MEK NOTN TAP YU FRAM PRIE TU JEUOVA

4. Wa kyan mek wi waahn fi prie tu Jeuova? (Saam 119:145)

⁴ Wen wi get fi si se Jeuova a wi fren we stik tu wi no mata wa an waahn di bes fi wi, den dat wi mek wi waahn fi prie tu im an tel im ou wi fiil. An a so di man we rait Saam 119 did fiil bout Jeuova wen im prie tu im. An a no se im neehn av no prablem ino, kaa yu did av som piipl we did tel som wikid lai pan im. (Sa. 119:23, 69, 78) Som a di taim im did fiil laik im aal waahn gi op kaaz a di mistiek dem we im did mek. (Sa. 119:5) Bot dem sitn de neehn tap im fram tel Jeuova ou im riili fiil.​—Riid Saam 119:145.

5. Yuuz sitn fi elp wi fi andastan se wen wi sin bad gens Jeuova, wi no fi mek dat tap wi fram prie tu im.

⁵ Aal ef yu sin bad, Jeuova waahn yu fi kom prie tu im. (Aiz. 55:6, 7) So no bada mek ou yu fiil tap yu fram prie tu Jeuova. Tingk bout it da wie ya: Supuoz yu a go somwe an yu laas, yu wuda fried fi aks sumadi fi elp kaa yu fiil shiem? Nuo sa! An a siem so ef wi sin bad gens Jeuova, aal ef wi fiil shiem wi fi prie tu im stil.​—Sa. 119:25, 176.

WA WI KYAN SE IINA WI PRIEYA DEM SO DAT WI KYAN GET KLUOSA AN KLUOSA TU JEUOVA?

6-7. Wen wi a prie tu Jeuova, wa kyan elp wi fi tel im ou wi riili fiil? (Luk pan di said paint tu.)

⁶ Wen yu taak tu Jeuova fram yu aat an mek im nuo wa yu a tingk an ou yu riili fiil, yu an im a-go get kluosa an kluosa. So wa wi kyan du fi prie da wie de?

⁷ Tek di taim fi tingk bout di kain-a Gad Jeuova bi.a Di muor yu sidong an tingk bout Jeuova wiez dem, a di muor yu a-go waahn fi tel im wa a gwaan wid yu. (Sa. 145:8, 9, 18) Tingk bout wa did gwaan wid wan sista we niem Kristine, uufa faada did lov fi fait an biit op piipl. Dis a wa shi se: “It neva iizi fi mi fi taak tu Jeuova laik wan Faada. Mi did fiil se kaa mi no porfek, im wudn waahn av notn fi du wid mi.” Bot a wich wan a Jeuova wiez dem Kristine did tingk bout we did elp ar? Shi se: “Mi tap tingk dem wie de wen mi fain out se Jeuova lov mi an a-go aalwiez di de fi mi. An iivn ef mi mek wan mistiek, im a-go stil lov mi an di de fi elp mi. Wen mi tingk bout di wie ou Jeuova lov mi, it mek it iiziya fi mi fi tel im di ting dem we mek mi api an di ting dem we mek mi sad.”

8-9. Ou it elp wi fi tingk bout wa wi a-go se bifuo wi prie? Tel wi wa mek yu se so.

⁸ Tingk bout wa yu a-go se tu Jeuova bifuo yu se it. Bifuo yu prie, yu mait-a aks yuself dem kwestiyan ya: ‘Eni prablem kom op iina mi laif rait ya nou we mi afi a diil wid? Mi an nobadi iina notn we mi niid fi paadn dem fa?’ (2 Ki. 19:15-19) Wi kyan prie laik ou Jiizas tiich wi fi prie an prie bout Jeuova niem, Im Kindom, an wa Im waahn fi apm.​—Mat. 6:9, 10.

⁹ Wen wan sista we niem Aliska did fain out se ar ozban did a-go ded kaa im av brien kyansa, shi se it did aad fi ar fi prie tu Jeuova. Shi se: “Mi did schres out bad, so mi neehn nuo wa fi se wen mi a prie.” Wa did elp ar? Shi se: “Mi tek som taim fi tingk bout wa mi a-go se bifuo mi se it, an da wie de mi no onggl a tingk bout miself wan wen mi a prie. Wen mi du dis, mi fiil beta fi prie tu Jeuova bout di difrant difrant ting dem we a gwaan iina mi laif.”

10. Wa mek wi no fi rosh wen wi a prie? (Luk pan di picha dem tu.)

¹⁰ No rosh chuu yu prieya dem. Ye a chuu, wen yu prieya dem shaat, dem kyan stil mek yu an Jeuova bi gud fren. Bot wen yu tek yu taim an no rosh chuu yu prieya dem, a dem taim de yu wi tel Jeuova ou yu riili fiil.b Aliska ozban we niem Ilaija se: “Mi prie wol iip a taim iina wan die, bot mi fiil kluosa tu Jeuova wen mi tek di taim fi tel im ou mi riili fiil. An a no laik se Jeuova kyaahn wiet fi mi fi don prie so dat im kyan go bout im bizniz. An kaa mi nuo se a no so it go, mi tek di taim an taak tu im.” Si sitn ya we yu kuda chrai: Pik wan taim an wan plies we yu kuda go fi go taak tu Jeuova we nobadi ar notn naa go bada yu. An wen yu du dat, chrai se yu prieya out loud an chrai fi dwi’it aafn.

TINGK BOUT SOM A DI PRIEYA DEM WE DE IINA DI BAIBL

11. Ou it kyan elp wi wen wi tingk bout di prieya dem we Jeuova sorvant dem prie iina di Baibl? (Luk tu pan di paat we niem “Yu A Go Chuu Sitn Laik We Dem Did A Go Chuu?”)

¹¹ It kyan elp yu wen yu tingk bout wa som a Jeuova sorvant dem se iina dem prieya dem an di sang dem we dem sing fi priez im we de iina di Baibl. Wen yu tingk bout ou dem prie tu Jeuova fram dem aat, dat wi elp yu fi du di siem ting tu. Yu kuda fain aal nyuu tingz we yu kuda se iina fi yu uona prieya dem. An yu mait-a aal si se som a dem prieya de a diil wid di siem ting we yu a go chuu tu.

12. Wen wi a riid wan prieya iina di Baibl, wa a som kwestiyan wi kyan aks wiself?

¹² Wen yu a riid wan prieya iina di Baibl, yu kyan aks yuself dem kwestiyan ya: ‘A uu did a se dis, an a wa dem did a go chuu? A sitn laik dis a gwaan iina fi mi laif ya nou? Wa mi kyan lorn fram da prieya ya?’ Fi ansa dem kwestiyan ya, yu mait-a afi luk op tingz iina di buk an pamplet dem, bot wen yu dwi’it, it a-go wok out gud fi yu. Mek wi luk pan som a dem prieya de.

13. Wa wi kyan lorn fram Ana prieya? (1 Samwel 1:10, 11) (Luk pan di picha tu.)

¹³ Riid 1 Samwel 1:10, 11. Wen Ana did se da prieya ya, a tuu big prablem shi did a diil wid iina ar laif. Shi kudn av no pikni, an ar ozban ada waif did a mek tingz aad fi ar. (1 Sam. 1:4-7) Yu a diil wid wan prablem ya nou we komiin laik it naa go we? Wa yu kyan lorn fram wa Ana did se iina ar prieya? Shi did tek di taim fi tel Jeuova bout aal a di sitn dem we a bada ar, an afta shi du dat shi did fiil beta. (1 Sam. 1:12, 18) An a di siem ting kyan gwaan fi wi wen wi “chuo [wi] bordn pan Jeuova” an tel im wa an wa a gwaan iina wi laif an ou wi riili fiil.​—Sa. 55:22.

14. (a) Wa els wi kyan lorn fram wa Ana did du? (b) Wa mek wen wi riid an tingk bout wa de iina Gad Wod, it kyan elp wi fi nuo wa fi se iina wi prieya dem? (Luk pan di said paint.)

¹⁴ Kopl ier afta Samwel did baan, Ana kya im go gi di Liida fi di priis dem we niem Iilai. (1 Sam. 1:24-28) Shi tel Jeuova se shi tangk im fi ou im protek an kier fi im sorvant dem we aalwiez a stik tu im.c (1 Sam. 2:1, 8, 9) Ana guda did stil av prablem a ar yaad, bot insted-a fi a tingk bout ar prablem dem, shi tingk bout ou Jeuova did a bles ar. Wa wi kyan lorn fram dat? Wi a-go kyan go chuu eni prablem we wi a diil wid ef wi tingk bout ou Jeuova did elp wi aredi an ou im a elp wi ya nou.

15. Wen piipl naa chriit wi fier, wa wi kyan lorn fram wa di prafit Jerimaiya did se iina im prieya? (Jerimaiya 12:1)

¹⁵ Riid Jerimaiya 12:1. Wan a di taim, Jerimaiya did fiil a wie wen im si ou di wikid piipl dem did luk laik dem a liv big laif an evriting a gwaan gud fi dem. Im did fiil a wie tu kaa di Izrelait dem did a chriit im bad. (Jer. 20:7, 8) An a siem so wi fiil tu wen wi si ou laif luk laik it a gwaan gud fi di wikid piipl dem, ar wen piipl chriit wi bad. Aalduo Jerimaiya did mek Jeuova nuo se im beks bout wa im si a gwaan, im neva did fiil se a Jeuova a kaaz it fi apm. Wen im si ou Jeuova jraa op di Izrelait dem we did ton dem bak pan im, dat mos did elp im fi si se Jeuova aalwiez a-go du di rait ting. (Jer. 32:19) Ef wi beks bout sopm, wi no fi fried fi tel Jeuova bout it. Jos gwaan chos se im suun saat out tingz fi wi an dat im a-go aalwiez du wa rait.

16. Ef wi kyaahn du wa wi wuda waahn fi du fi Jeuova, wa wi kyan lorn fram wan Liivait we kudn get fi go a Gad ous? (Saam 42:1-4) (Luk pan di picha dem tu.)

¹⁶ Riid Saam 42:1-4. A wan Liivait we kudn go a Gad ous go worship wid di ada Izrelait dem did rait da sang ya. Iina da Saamz ya, im taak bout ou im did a fiil. An a so wi mait-a fiil tu ef wi kyaahn lef wi yaad, ar wi de iina prizn kaaz a wa wi biliiv iina. Som a di taim wi mait-a fiil aarait, an som ada taim wi mait-a fiil sad, bot no mata ou wi fiil, wi fi aalwiez taak tu Jeuova bout it. Wen wi du dis, it wi elp wi fi andastan wa wi a go chuu an elp wi fi luk pan tingz difrant. Laik di Liivait did get fi si se im wuda get som ada chaans we im kuda priez Jeuova. (Sa. 42:5) Im did tingk bout ou Jeuova did a tek kier a im. (Sa. 42:8) Wen wi prie tu Jeuova an tel im evriting we wi a go chuu, it wi elp wi fi andastan wa mek wi a fiil sortn an sortn wie, an it wi elp wi fi iizi wiself an diil wid eniting we wi a go chuu.

17. (a) Wa wi kyan lorn fram wa Juona did se iina im prieya? (Juona 2:1, 2) (b) Ou som a di sitn dem iina di Saamz dem kyan elp wi wen wi a go chuu wan aad taim? (Luk pan di said paint.)

¹⁷ Riid Juona 2:1, 2. A wen im did de iina di beli a wan big fish Juona did se da prieya de. Iivn duo im neehn du wa Jeuova did se im fi du, Juona did nuo se Jeuova wuda lisn tu im. Iina im prieya, Juona se wol iip a tingz we wi kyan fain iina di Saamz dem.d An wan riizn fi dis a kuda dat Juona did nuo di Saamz dem gud. So wen im tingk bout dem, im did nuo fi shuor se Jeuova wuda elp im. A siem wie so wen yu chrai fi memba som a di skripcha dem iina di Baibl, dem wi osh wi an elp wi fi prie tu Jeuova wen wi a go chuu wan rof taim.

MEK YU PRIEYA DEM JRAA YU NIERA TU JEUOVA

18-19. Ef wi no nuo wa fi se wen wi a prie tu Jeuova, ou Ruoman 8:26, 27 kyan elp wi? Tel wi wa did gwaan wid Yelena.

¹⁸ Riid Ruoman 8:26, 27. Som a di taim wi mait-a schres out so bad dat wi nat iivn nuo ou fi tel Jeuova ou wi riili fiil. Wen wi fiil da wie de, Gad spirit ‘se tingz’ wen wi no nuo wa fi se. Wa dat miin? A Jeuova yuuz im spirit fi mek di man dem rait dong dem prieya de iina di Baibl. So ef wi no nuo wa fi se, notn no rang ef wi yuuz som a di ting dem we dem se iina dem prieya de, kaa Jeuova wi lisn tu dem an im mait-a ansa dem tu.

¹⁹ Dat did elp wan sista we kom fram Rosha we niem Yelena. Dem did lak ar op iina prizn kaa shi did a prie an a riid ar Baibl. Yelena did so schres out dat shi did fain it aad fi prie tu Jeuova. Shi se: “Wen mi fiil da wie de, mi memba se ef mi yuuz di sitn dem we de iina dem prieya de we rait dong iina di Baibl, Jeuova wi lisn tu it, an it wuda komiin laik se a mi it a kom fram. . . . An dis did riili elp mi wen mi did a go chuu wan aad taim.”

20. Wa wi kyan du fi redi op wi main fi prie wen wi schres out?

²⁰ Wen wi schres out, it mait-a aad fi wi prie kaa wi main de aal uova di plies. Fi get wi main redi fi prie, wi kyan lisn tu som a di Saamz dem. Pan tap a dat, wi kyan rait dong aal a wa wi waahn fi se jos laik wa King Dievid did du. (Sa. 18, 34, 142; di likl sitn dem we rait op a tap.) Ye, no ruul no de bout fi tel yu se yu mos du dis ar yu mos du dat wen yu a get yuself redi fi prie. (Sa. 141:2) Jos du wa wok fi yu.

21. Wa mek wi kyan prie tu Jeuova fram wi aat?

²¹ Wi fiil gud fi nuo se Jeuova nuo ou wi fiil bifuo wi iivn se notn tu im. (Sa. 139:4) Bot Jeuova wel waahn wi fi tel im ou wi riili fiil an fi shuo umoch wi chos iina im. So no ich fi prie tu yu Faada we de iina evn. Mek di prieya dem iina di Baibl elp yu fi nuo wa fi se tu Jeuova. Prie fram diip dong iina yu aat. Mek Jeuova nuo wen yu fiil sad an wen yu api. Jeuova a yu gud gud fren an im aalwiez a-go de de fi yu!